ଭୁବନେଶ୍ବର: ଜାଡ ମାଡରେ ଘାଇଲା ସାରା ଓଡ଼ିଶା । ଉତ୍ତରରୁ ଦକ୍ଷିଣ, ପୂର୍ବରୁ ପଶ୍ଚିମ ସବୁଠି ପ୍ରବଳ ଶୀତ । କେଉଁଠି ଉଷୁମ ପୋଷାକ ପିନ୍ଧି କିଏ ଶୀତରୁ ଦୂରେଇବାକୁ ଚେଷ୍ଟା କରୁଛି ତ ଅନ୍ୟ କେଉଁଠି ନିଆଁ ପୁଇଁ ହେଉଛନ୍ତି । କିନ୍ତୁ ଏମିତି ବି ଅନେକ ଲୋକ ଅଛନ୍ତି ଯେଉଁମାନେ ଅସମ୍ଭାଳ ଶୀତରେ ରାଜଧାନୀର ଖୋଲା ଆକାଶ ତଳେ ଶୀତ କାକରରେ ରାତ୍ରୀ ଯାପନ କରୁଛନ୍ତି ।
ବାସହୀନ ଲୋକଙ୍କ ପାଇଁ ନିକଟରେ ରାଜ୍ୟ ସ୍ବତନ୍ତ୍ର ରିଲିଫ କମିଶନଙ୍କର ପକ୍ଷରୁ ରାଜ୍ୟର ସମସ୍ତ ଜିଲ୍ଲାପାଳଙ୍କୁ ନିର୍ଦ୍ଦେଶ ଜାରି କରିଥିଲେ । ଯେଉଁଥିରେ ଏମାନେ ଆଶ୍ରୟସ୍ଥଳୀ ଭାବେ ସ୍କୁଲ ଘରେ ରହିବାକୁ ନିର୍ଦ୍ଦେଶ ରହିଛି । ଏପରିକି ସହରାଞ୍ଚଳରେ ରାତିରେ ରହିବା ପାଇଁ ରାତ୍ରୀ ଆଶ୍ରୟସ୍ଥଳ ନିର୍ମାଣ କରାଯାଇଛି । ହେଲେ ଆଶ୍ରୟସ୍ଥଳୀମାନଙ୍କରେ ତାଲା ଝୁଲୁଥିବାବେଳେ, କେତେକ ସ୍ଥାନରେ ଏମାନଙ୍କୁ ଘଉଡାଇ ଦିଆଯାଉଥିବା ଅଭିଯୋଗ ହୋଇଛି । ୟୁନିଟ-3 ନମ୍ବରରେ ଥିବା ଏକ ରାତ୍ରି ଆଶ୍ରୟସ୍ଥଳୀ ବନ୍ଦ ଥିବାର ଦେଖିବାକୁ ମିଳିଛି ।
ସେହିପରି ସହରର ବିଭିନ୍ନ ଖୋଲା ସ୍ଥାନ ମାନଙ୍କରେ ଏପରି ଭାବେ ରହୁଥିବା ଲୋକଙ୍କୁ ସରକାରୀ ଭାବେ ଆଣି ଆଶ୍ରୟସ୍ଥଳୀରେ ରଖିବା ପାଇଁ ବ୍ୟବସ୍ଥା ଥିବା ସତ୍ତ୍ବେ ସେପରି କାର୍ଯ୍ୟ ପ୍ରଶାସନ ପକ୍ଷରୁ କରାଯାଉନଥିବାରୁ ସାଧାରଣ ନାଗରିକମାନେ କ୍ଷୋଭ ପ୍ରକାଶ କରିଛନ୍ତି। ରାଜଧାନୀର ଛାତି ଉପରେ ଏପରି ଭାବେ ଶହ ଶହ ଲୋକ ରହୁଥିବାବେଳେ ସରକାର କେବଳ ମିଛ ପ୍ରଚାର କରି 5 ଟି ଓ 'ମୋ ସରକାର' କଥା କହୁଛନ୍ତି। ଯଦି ସତରେ 5ଟି କାର୍ଯ୍ୟକରୁଛି ତେବେ ଏମାନଙ୍କ ପାଇଁ ଥିବା ବ୍ୟବସ୍ଥାରେ କେବେ ସୁଧାର ଆସିବ ବୋଲି ସେମାନେ କହିଛନ୍ତି।
ଭୁବନେଶ୍ବର ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
