ଭୁବନେଶ୍ବର: ନୂଆ କୃଷିନୀତି ପାଇଁ ଚିଠା ପ୍ରସ୍ତୁତ ହୋଇଛି । ଏଥିରେ ‘କାଳିଆ’ ଯୋଜନାର ଅବଧି ବୃଦ୍ଧି କରାଯାଇଛି । ଆସନ୍ତା 5 ବର୍ଷ ପାଇଁ ‘କାଳିଆ’ ଯୋଜନା କର୍ଯ୍ୟକାରୀ ହେବ । କୃଷି ଓ କୃଷକ ଏବଂ ମହିଳା ଚାଷୀଙ୍କ ବିକାଶ ପାଇଁ ଏହି ଯୋଜନା ଆସନ୍ତା 5 ବର୍ଷ ଯାଏଁ ଲାଗୁ କରାଯିବା ବୋଲି କୃଷି ବିଭାଗ ପକ୍ଷରୁ ଏକ ବିଜ୍ଞପ୍ତି ପ୍ରକାଶ ପାଇଛି । କୃଷି ଯୋଜନା 2019 ଅନୁଯାୟୀ ଶୁକ୍ରବାର ଏହି ବିଜ୍ଞପ୍ତି ପ୍ରକାଶ କରିଛନ୍ତି ସରକାର । ଏଥିରେ ସଫଳ ଚାଷୀଙ୍କୁ ପୁରସ୍କୃତ କରାଯିବା ନେଇ ମଧ୍ୟ ସରକାରଙ୍କ ପକ୍ଷରୁ କୁହାଯାଇଛି ।
6 ବର୍ଷ ପରେ ସରକାର ନୂତନ କୃଷି ନୀତି ପାଇଁ ଚିଠା ପ୍ରସ୍ତୁତ କରିଛନ୍ତି । ଏଥିରେ କାଳିଆ ଯୋଜନା ଓ ମହିଳା ଚାଷୀ ଫୋକସରେ ରହିଛନ୍ତି । ଏଥିଲାଗି କୃଷିନୀତି-୨୦୧୯ର ଚିଠା ପ୍ରକାଶ ପାଇଛି । ଯେଉଁଥିରେ ଚାଷୀଙ୍କ ବିକାଶକୁ ଦୃଷ୍ଟିରେ ରଖି ବିସ୍ତୃତ ଖସଡା ପ୍ରସ୍ତୁତ କରାଯାଇଛି ।
ଚାଷୀଙ୍କ କ୍ରମାଗତ ଆୟ ବହୁଗୁଣିତ ବୃଦ୍ଧି, କ୍ଷୁଦ୍ର ଏବଂ ନାମମାତ୍ର ଚାଷୀଙ୍କ ସାମଗ୍ରିକ ବିକାଶକୁ ଗୁରୁତ୍ବ ଦେଇଛନ୍ତି ରାଜ୍ୟ ସରକାର । ସେହିପରି ପ୍ରସ୍ତାବିତ କୃଷି ନୀତିରେ ମହିଳା ଚାଷୀଙ୍କୁ ପ୍ରାଧାନ୍ୟ ଦିଆଯାଇଛି । ରାଜ୍ୟରେ ମୋଟ ଶ୍ରମିକଙ୍କ ମଧ୍ୟରୁ ୪୮ ପ୍ରତିଶତ ମହିଳା ଶ୍ରମିକ ଥିବାରୁ ସେମାନଙ୍କ ବିକାଶକୁ ପ୍ରାଧାନ୍ୟ ଦିଆଯାଇଛି । ଏହା ସହ ରାଜ୍ୟରେ ଥିବା ୫ ଲକ୍ଷ ଭୂମିହୀନ ମହିଳାଙ୍କୁ ସ୍ବତନ୍ତ୍ର ଶ୍ରେଣୀରେ ଗ୍ରହଣ କରାଯାଇ ସେମାନଙ୍କ ଉତ୍ଥାନ ପାଇଁ ପଦକ୍ଷେପ ନିଆଯିବ ବୋଲି ଜଣାପଡିଛି ।
ସେହିପରି ମହିଳା ଚାଷୀଙ୍କ ଉତ୍ପାଦ ବିକ୍ରି ପାଇଁ ବଜାର ସୁବିଧା କରାଯିବାକୁ ସରକାର କୃଷି ନୀତିରେ ଗୁରୁତ୍ବ ଦେଇଛନ୍ତି । ମହିଳା ଚାଷୀଙ୍କୁ ତାଲିମ ଦେବା ପାଇଁ ଯୋଜନାରେ ସ୍ଥାନ ଦିଆଯାଇଛି । ଉଦ୍ୟାନ କୃଷି ଓ ପଶୁ ପାଳନ ଯୋଜନାରେ ମହିଳା ଚାଷୀଙ୍କୁ ପ୍ରାଧାନ୍ୟ ଦିଆଯିବା ସହ ମହିଳା ଚାଷୀଙ୍କୁ ସୁହାଇବା ଭଳି ଯନ୍ତ୍ରପାତି ବିକାଶ କରିବାକୁ ପ୍ରାଧାନ୍ୟ ଦେଇଛନ୍ତି ସରକାର ।
ତେବେ ଏହି କୃଷିନୀତି ଚାଷୀ ଓ ବୈଜ୍ଞାନିକଙ୍କ ମତ ନିଆଯାଇ ହୋଇଥିବା କୃଷିମନ୍ତ୍ରୀ ଅରୁଣ ସାହୁ କହିଛନ୍ତି ।
ସେପଟେ ରାଜ୍ୟ ସରକାର ଏ ପର୍ଯ୍ୟନ୍ତ ଚାଷ ଜମିକୁ ପାଣି ଦେଇପାରିଲେ ନାହିଁ । ଏବେ ନୂଆ କୃଷିନୀତି କେବଳ ଦିନରେ ଲଣ୍ଠନ ଦେଖାଇବା ସଦୃଶ ବୋଲି ବିଜେପି କହିଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
