ଭୁବନେଶ୍ବର: ଶ୍ରୀମନ୍ଦିର ବିକାଶ ବାବଦରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲେଖିଥିବା ଚିଠିର ଜବାବ ରଖିଲେ ଗଜପତି ମହାରାଜା । ଚିଠି ମାଧ୍ୟମରେ ଧର୍ମେନ୍ଦ୍ର ଦେଇଥିବା ପ୍ରସ୍ତାବର ଜବାବ ରଖିଛନ୍ତି ମହାରାଜ ଦିବ୍ୟ ସିଂହଦେଓ ।
ଜବାବରେ ଗଜପତି ମହାରାଜ ଲେଖିଛନ୍ତି ଯେ, ମହାପ୍ରଭୁ ଶ୍ରୀ ଜଗନ୍ନାଥ ହେଉଛି ଇଶ୍ୱରୀୟ ପ୍ରେରଣାର ଉତ୍ସ । ଯାହାକି ସମଗ୍ର ବିଶ୍ୱରେ ଅଗଣିତ ଭକ୍ତଙ୍କ ଜୀବନକୁ ପ୍ରଭାବିତ କରିଥାଏ । ବିଶେଷ କରି ଓଡ଼ିଶା ଏବଂ ଓଡିଆ ଲୋକଙ୍କ ପାଇଁ ଏହା ଶ୍ରୀ ମହାପ୍ରଭୁଙ୍କ ପାଦ ପଦ୍ମରେ ଉତ୍ସର୍ଗୀକୃତ । ଅନାଦି କାଳରୁ ଉତ୍ସର୍ଗୀକୃତ ହୋଇଆସୁଛି । ଯାହା ଶତାବ୍ଦୀ ଧରି ଶାନ୍ତି, ସମୃଦ୍ଧତା ଏବଂ ଗୌରବର ପ୍ରକୃତ କାରଣ ହୋଇପାରିଛି ।
କେବଳ ମହାପ୍ରଭୁ ଆମ ଲୋକଙ୍କ ପାଇଁ ସର୍ବଶ୍ରେଷ୍ଠ ପ୍ରେରଣାଦାୟକର କାରକ । ଇତିହାସରୁ ଜଣାପଡିଛି ଯେ, ଆମର ରାଜ୍ୟ ଏହାର ସମସ୍ତ ସମ୍ବଳ ସହିତ ମହାପ୍ରଭୁଙ୍କ ପାଦ ପଦ୍ମରେ ଉତ୍ସର୍ଗୀକୃତ ହୋଇଥିଲା । ରାଜ୍ୟ କାର୍ଯ୍ୟରେ ମହାପ୍ରଭୁଙ୍କ କାର୍ଯ୍ୟଗୁଡିକ ସର୍ବାଧିକ ପ୍ରାଧାନ୍ୟ ରଖେ । ଶ୍ରୀ ଜଗନ୍ନାଥ ମହାପ୍ରଭୁଙ୍କ ଅନୁଗ୍ରହରେ ରାଜ୍ୟ ସରକାର ଶ୍ରୀମନ୍ଦିର ପରିକ୍ରମା ଏବଂ ଅନ୍ୟାନ୍ୟ ବିକାଶମୂଳକ ପ୍ରକଳ୍ପ ଆରମ୍ଭ କରିଛନ୍ତି । ଶ୍ରୀ ଜଗନ୍ନାଥ ଧାମ ପୁରୀକୁ ବିଶ୍ୱର ଏକ ପ୍ରମୁଖ ଧାର୍ମିକ, ଆଧ୍ୟାତ୍ମିକ ଏବଂ ସାଂସ୍କୃତିକ କେନ୍ଦ୍ରରେ ପରିଣତ କରିବା ଉଦ୍ଦେଶ୍ୟରେ ଏହି କାର୍ଯ୍ୟ ଚାଲିଛି ।
ଏହା ପ୍ରକୃତରେ ସବୁଠାରୁ ଉପଯୁକ୍ତ, ଯେହେତୁ ମହାପ୍ରଭୁ ଶ୍ରୀ ଜଗନ୍ନାଥ ହେଉଛନ୍ତି ଭଗବାନ ସର୍ବୋଚ୍ଚ ଅଟନ୍ତି । ଯାହାକି ପୃଥିବୀର ସମସ୍ତ ଧର୍ମରେ ବିଭିନ୍ନ ନାମ ଏବଂ ରୂପରେ ପୂଜା କରାଯାଇଥାଏ । ଏବଂ ପବିତ୍ର ଶାସ୍ତ୍ର ଅନୁଯାୟୀ, ଶ୍ରୀ ପୁରୁଷୋତ୍ତମ-କ୍ଷେତ୍ର ପୁରୀ ଏହି ଗ୍ରହରେ ତାଙ୍କର ଅନନ୍ତ ଇଶ୍ୱରୀୟ ବାସସ୍ଥାନ ଅଟେ । ଆପଣ ଠିକ୍ କହିଛନ୍ତି ଯେ, ଐତିହାସିକ କାର୍ଯ୍ୟ ପାଇଁ ଉଭୟ ରାଜ୍ୟ ତଥା କେନ୍ଦ୍ର ସରକାର ତଥା ଓଡିଶା ତଥା ବିଶ୍ୱର ଭକ୍ତଙ୍କ ସମର୍ଥନ ଆବଶ୍ୟକ ହେବ ।
ଏଥିରେ ମୋର କୌଣସି ସନ୍ଦେହ ନାହିଁ ଯେ, ଏହା ସମ୍ଭବ ହେବ । ଯେହେତୁ ଆମର ଇତିହାସ ଦର୍ଶାଇଛି, ପ୍ରଭୁ ସର୍ବୋଚ୍ଚ । ପ୍ରଭୁଙ୍କ ସେବା କରିବାକୁ ଆହ୍ୱାନଠାରୁ ଅଧିକ ଏକତ୍ରିତ ଶକ୍ତି ହୋଇପାରିବ ନାହିଁ । ଆପଣଙ୍କ ମୂଲ୍ୟବାନ ପରାମର୍ଶ ଏବଂ ସମର୍ଥନ ପାଇଁ ମୁଁ କୃତଜ୍ଞତା ଜଣାଉଛି । ମୁଁ ଶ୍ରୀ ଜଗନ୍ନାଥ ମନ୍ଦିର ପରିଚାଳନା କମିଟି ତରଫରୁ ତଥା ବ୍ୟକ୍ତିଗତ ଭାବରେ ଆପଣଙ୍କୁ ନିଶ୍ଚିତ କରିବାକୁ ଚାହୁଁଛି ଯେ ଶ୍ରୀମନ୍ଦିର ଏବଂ ଶ୍ରୀକ୍ଷେତ୍ରର ସର୍ବଦଳୀୟ ବିକାଶ ପାଇଁ ଆମେ ଆନ୍ତରିକତାର ସହ ପଦକ୍ଷେପ ଗ୍ରହଣ କରିବୁ । ବିଶ୍ୱର ଅଗଣିତ ଭକ୍ତଙ୍କ ଆଗ୍ରହ ଏବଂ ଆମର ପ୍ରାଚୀନ ସାଂସ୍କୃତିକ ଐତିହର ମୂଳ ଗୌରବକୁ ପୁନର୍ଜୀବିତ କରିବା ପାଇଁ ସମସ୍ତ ପଦକ୍ଷେପ ନିଆଯିବ ।
ଗତକାଲି ଧର୍ମେନ୍ଦ୍ର ଲେଖିଥିବା ଚିଠିରେ ଦର୍ଶାଇଥିଲେ ଯେ, ଶ୍ରୀଜଗନ୍ନାଥଙ୍କ ମହତ କାର୍ଯ୍ୟରେ ଶ୍ରମ କିମ୍ବା ଅର୍ଥଦାନ ମାଧ୍ୟମରେ ବିଶ୍ବର ସମଗ୍ର ହିନ୍ଦୁ ସମାଜ ଏଥିରେ ସାମିଲ ହେବାକୁ ଇଚ୍ଛା ରଖିଛନ୍ତି । ତେଣୁ ମହାପ୍ରଭୁ ଶ୍ରୀଜଗନ୍ନାଥଙ୍କ ପାଇଁ ସମର୍ପଣ ନିଧି ସଂଗ୍ରହ ବ୍ୟବସ୍ଥା କରିବା ପାଇଁ ଗଜପତି ମହାରାଜା ଦିବ୍ୟସିଂହ ଦେବଙ୍କୁ ପତ୍ର ଲେଖି ସହଯୋଗ ଲୋଡିଥିଲେ ଧର୍ମେନ୍ଦ୍ର । ଗଜପତିଙ୍କ ମାର୍ଗଦର୍ଶନରେ ଏପରି ବ୍ୟବସ୍ଥା କରାଗଲେ ସମଗ୍ର ବିଶ୍ଵର ହିନ୍ଦୁ ମହାପ୍ରଭୁଙ୍କୁ ଦାନ କରିବାର ସୁଯୋଗ ପାଇପାରିବେ ବୋଲି ଧର୍ମେନ୍ଦ୍ର କହିଥିଲେ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
