ଭୁବନେଶ୍ବର: ରାଜ୍ୟରେ ବିକଶିତ ହେବ ଗ୍ରୀନ ଏନର୍ଜି(green energy) । ଏନେଇ ଗେଲ୍ ଏବଂ ଇପିକଲ୍(Gail and Ipicol) ମଧ୍ୟରେ ବୁଝାମଣା ପତ୍ର(MoU ) ସ୍ବାକ୍ଷରିତ ହୋଇଛି । ଏହାଦ୍ବାରା ରାଜ୍ୟରେ ଗ୍ରୀନ ହ୍ରାଇଡ୍ରୋଜେନ, ଗ୍ରୀନ ଆମୋନିଆ (Green Hydrogen, Green Ammonia)କ୍ଷେତ୍ରରେ ବ୍ୟାପକ ସୁଯୋଗ ସୃଷ୍ଟି କରିବ । ଓଡିଶାରେ ଇକୋ-ଫ୍ରେଣ୍ଡଲି(Eco-friendly) ଇନ୍ଧନ ଉତ୍ପାଦନକୁ ପ୍ରୋତ୍ସାହିତ କରିବା ପାଇଁ MOUରେ ଗୁରୁତ୍ବାରୋପ କରାଯାଇଛି । ତେବେ ଗ୍ରୀନ ହାଇଡ୍ରୋଜେନ ଶିଳ୍ପଗୁଡିକ ଗ୍ରୀନ ହାଉସ ଗ୍ୟାସର ନିର୍ଗମନ ହ୍ରାସ କରିବାରେ ସାହାଯ୍ୟ କରିବ । ଯାହା ଭାରତ ସରକାରଙ୍କ ସାମଗ୍ରିକ ଉଦ୍ଦେଶ୍ୟରେ ସହାୟକ ହେବ । ବିଦ୍ୟୁତ ବଳକା ରାଜ୍ୟ ହୋଇଥିବାରୁ ଓଡିଶା ଶକ୍ତିରେ ନିଜର ସ୍ଥିତିକୁ ଆହୁରି ଦୃଢ କରିବାକୁ ଚେଷ୍ଟା କରୁଛି । ଏହା ରାଜ୍ୟ ଅବସ୍ଥାପିତ କାରଖାନାଗୁଡ଼ିକର ଶକ୍ତି ଆବଶ୍ୟକତାକୁ ପୂରଣ କରିବାରେ ମଧ୍ୟ ସହାୟକ ହେବ ।
ତେବେ ଭୁବନେଶ୍ବରରେ ଆୟୋଜିତ ଚୁକ୍ତିନାମା ସ୍ବାକ୍ଷର କାର୍ଯ୍ୟକ୍ରମରେ ଯୋଗ ଦେଇଥିଲେ ମୁଖ୍ୟମନ୍ତ୍ରୀଙ୍କ ପ୍ରମୁଖ ପରାମର୍ଶଦାତା ଅସିତ ତ୍ରିପାଠୀ(Asit Tripathi, Chief Adviser to the Chief Minister) । ସେ କହିଛନ୍ତି ଯେ “ସମଗ୍ର ବିଶ୍ବ କାର୍ବନ ନିର୍ଗମନକୁ ହ୍ରାସ କରିବାକୁ ଚେଷ୍ଟା କରୁଛି । କିନ୍ତୁ ଏହାକୁ କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାର ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି । ଏଥିପାଇଁ ରାଜ୍ୟ ସରକାର ଭିତ୍ତିଭୂମିର ବିକାଶ କରୁଛନ୍ତି ।
ଏପଟେ ଶିଳ୍ପ ବିଭାଗ ପ୍ରମୁଖ ଶାସନ ସଚିବ ହେମନ୍ତ ଶର୍ମା ଗ୍ରୀନ ହାଇଡ୍ରୋଜେନ ପ୍ଲାଣ୍ଟ ପ୍ରତିଷ୍ଠା ପାଇଁ GAILର ଆଗ୍ରହକୁ ପ୍ରଶଂସା କରିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ବର୍ତ୍ତମାନ ହାଇଡ୍ରୋଜେନ ପାଇଁ ଓଡିଶାରେ ଏକ ବୃହତ ବଜାର ଅଛି । ବହୁ ପରିମାଣରେ ସବୁଜ ହାଇଡ୍ରୋଜେନ ଉତ୍ପାଦନ ପାଇଁ ଏହି ମିଳିତ ପ୍ରୟାସରେ ଶିଳ୍ପ ବ୍ୟବହାର ପାଇଁ ସବୁଜ ହାଇଡ୍ରୋଜେନର ମୂଲ୍ୟ ହ୍ରାସ ପାଇବ । ଓଡିଶା ତଥା ଦେଶର ଅନ୍ୟାନ୍ୟ ରାଜ୍ୟରେ ପ୍ରାକୃତିକ ଗ୍ୟାସ ଭିତ୍ତିଭୂମି ତଥା ସ୍ବଚ୍ଛ ଶକ୍ତି ପ୍ରକଳ୍ପର ବିକାଶ ଉପରେ ଧ୍ୟାନ ଦେଉଛୁ ।
ତେବେ ଏହି କାର୍ଯ୍ୟକ୍ରମରେ ଇପିକଲର ପରିଚାଳନା ନିର୍ଦ୍ଦେଶକ ଭୁପିନ୍ଦର ସିଂ ପୁନିଆ ଉପସ୍ଥିତ ଥିଲେ । ଏହାସହ FICCI, ICC, CII ଏବଂ UCCI ଭଳି ଅଗ୍ରଣୀ ଶିଳ୍ପ ସଂସ୍ଥା ସହିତ ଅଗ୍ରଣୀ ଇସ୍ପାତ, ଆଲୁମିନିୟମ୍ ଏବଂ ରାସାୟନିକ ଉତ୍ପାଦକମାନେ ଉପସ୍ଥିତ ରହି ରାଜ୍ୟ ସରକାରଙ୍କ ଉଦ୍ୟମକୁ ପ୍ରଶଂସା କରିଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
