ଭୁବନେଶ୍ବର: କଂଗ୍ରେସର ଟାଣୁଆ ଆଦିବାସୀ ନେତା ତଥା ସୁନ୍ଦରଗଡ ତଳସରାର (Sundargarh Talsara) ପୂର୍ବତନ ବିଧାୟକ ଡ. ପ୍ରଫୁଲ୍ଲ ମାଝୀ ଆଜି ବିଦ୍ଧିବଧ ଭାବେ ଶାସକ ବିଜୁ ଜନତା ଦଳରେ ସାମିଲ ହୋଇଛନ୍ତି । ଆଜି ବିଜେଡି କାର୍ଯ୍ୟାଳୟରେ ଆୟୋଜିତ ମିଶ୍ରଣ ପର୍ବରେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ତାଙ୍କୁ ଦଳରେ ପୁଷ୍ପଗୁଚ୍ଛ ଦେଇ ସ୍ବାଗତ କରିଥିଲେ ।
ବିଜେଡିରେ ସାମିଲ ହେବାପରେ ପ୍ରଫୁଲ୍ଲ କହିଛନ୍ତି କଂଗ୍ରେସରେ ନା ନେତୃତ୍ବ ଅଛି, ନା ନୀତି ଅଛି । ଦଳରେ ଚରମ ବିଶୃଙ୍ଖଳା ଜାରି ରହିଛି । ଦଳ ତାଙ୍କୁ ଖାଲି ଅବହେଳା କରିନାହିଁ ଅପମାନିତ ମଧ୍ୟ କରିଛି । ଏହି ଧାରା ସାରା ଦେଶରେ ଜାରି ରହିଛି । ଦଳ ଏବେ ନିମ୍ନଗାମୀ ହେବାରେ ଲାଗିଛି । ରାଜ୍ୟ କଂଗ୍ରେସ ନେତୃତ୍ବ ଦିଶାହୀନ ହୋଇପଡିଛି । ତେଣୁ କଂଗ୍ରେସ ଛାଡିବାକୁ ବାଧ୍ୟ ହୋଇଥିବା କହିଛନ୍ତି ।
ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶଂସା କରି ପ୍ରଫୁଲ୍ଲ କହିଛନ୍ତି ସେ ଜଣେ ସଫଳ ଓ ଦକ୍ଷ ନେତା । ଖାଲି ଦେଶ ନୁହେଁ ସାରା ବିଶ୍ବ ପାଇଁ ଆଦର୍ଶ ମୁଖ୍ୟମନ୍ତ୍ରୀ । ତାଙ୍କ ଚିନ୍ତାଧାରା ବିକାଶ ମୂଳକ କାର୍ଯ୍ୟକ୍ରମରେ ଅନୁପ୍ରାଣିତ ହୋଇ ବିଜେଡିରେ ସାମିଲ ହୋଇଥିବା କହିଛନ୍ତି ପ୍ରଫୁଲ୍ଲ । ଆଗାମୀ ଦିନରେ ଦଳ ଯାହା ଦାୟିତ୍ବ ଦେବ ତାହାକୁ ସେ ତୁଳାଇବେ ବୋଲି କହିଛନ୍ତି ।
ସୂଚନାଯୋଗ୍ୟଯେ ସୁନ୍ଦରଗଡ ଜିଲ୍ଲା ତଳସରାର ପୂର୍ବତନ କଂଗ୍ରେସ ବିଧାୟକ ତଥା ପୂର୍ବତନ ମନ୍ତ୍ରୀ ଗଜାଧର ମାଝୀ (Former Minister Gajadhar Majhi)ଙ୍କ ଝିଆରୀ ଜ୍ଵାଇଁ ହେଉଛନ୍ତି ପ୍ରଫୁଲ୍ଲ । ଗଜାଧରଙ୍କ ରାଜନୈତିକ ଉତ୍ତରାଧିକାରୀ ଭାବେ ରାଜନୀତିକୁ ଆସିଥିଲେ । ୨୦୦୬ ମସିହାରେ ଗଜାଧରଙ୍କ ଦେହାନ୍ତ ପରେ ହୋଇଥିବା ଉପ-ନିର୍ବାଚନରେ କଂଗ୍ରେସରୁ ପ୍ରାର୍ଥୀ ହୋଇଥିଲେ ପ୍ରଫୁଲ୍ଲ । ଉପ ନିର୍ବାଚିତରେ ବିଜୟୀ ହୋଇ ରାଜନୈତିକ କ୍ୟାରିୟର ଆରମ୍ଭ କରିଥିଲେ ।
ପରେ ୨୦୦୯ ଓ ୨୦୧୪ (2009 and 2014 General Elections) ବିଧାନସଭା ନିର୍ବାଚନରେ ସେ ବିଜୟୀ ହୋଇଥିଲେ । ଲଗାତାର ୩ ଥର ବିଜୟୀ ହୋଇ ହ୍ୟାଟ୍ରିକ ମାରିଥିଲେ । କିନ୍ତୁ ୨୦୧୯ ନିର୍ବାଚନରେ ପରାଜିତ ହୋଇଥିଲେ ପ୍ରଫୁଲ୍ଲ । କିଛି ଦିନ ପୂର୍ବରୁ କଂଗ୍ରେସ ଶିବିର ଛାଡି ବିଜେଡିରେ ସାମିଲ ହୋଇଥିବା ନବରଙ୍ଗପୁରର ପୂର୍ବତନ ସାଂସଦ ପ୍ରଦୀପ ମାଝୀଙ୍କ ସହ ନିବିଡ ସମ୍ପର୍କ ଥିବାରୁ ପ୍ରଫୁଲ୍ଲ ମଧ୍ୟ ବିଜେଡିରେ ସାମିଲ ହେବା ନେଇ ଚର୍ଚ୍ଚା ଆରମ୍ଭ ହୋଇଥିଲା । ଯାହା ଆଜି ସ୍ପଷ୍ଟ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
