ଭୁବନେଶ୍ବର: ସରିଲା ବଜେଟ ଅଧିବେଶନର ପ୍ରଥମ ପର୍ଯ୍ୟାୟ ବୈଠକ । ବୁଧବାର ସରିଛି ସାଧାରଣ ବଜେଟ ଆଲୋଚନା । ଗୃହରେ ବିବୃତି ରଖିଛନ୍ତି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ । ସେ ରାଜ୍ୟ ସରକାରଙ୍କ ସଫଳତା କଥା କହିଥିବା ବେଳେ ପରୋକ୍ଷରେ କେନ୍ଦ୍ରକୁ ପେଞ୍ଚ ମାରିଛନ୍ତି l ଚତୁର୍ଦ୍ଦଶ ଅର୍ଥ କମିଶନ ଓଡିଶାକୁ 48 ହଜାର କୋଟି ଟଙ୍କା ଦେବାକୁ ସୁପାରିଶ କରିଥିଲେ । ସେହି ଅନୁସାରେ ରାଜ୍ୟ ତାର ପ୍ରାପ୍ୟ ପାଇବା କଥା । ହେଲେ କେନ୍ଦ୍ର ସରକାର 30 ହଜାର କୋଟି ଟଙ୍କା ଦେଲା । ବାକି 18 ହଜାର କୋଟି ଟଙ୍କା ମିଳିନାହିଁ । ଯାହାକୁ ନେଇ ସେ ଆପତ୍ତି ଉଠାଇବା ସହିତ କେନ୍ଦ୍ର ଦୋଷ ଦେଇଛନ୍ତି । ଏହି 18 ହଜାର କୋଟି ମିଳିଥିଲେ ରାଜ୍ୟ ବଜେଟର ଆକାର ବଢ଼ିଥାନ୍ତା । ବିଭିନ୍ନ ବିଭାଗକୁ ଅଧିକ ଅର୍ଥ ଅନୁଦାନ ମିଳିଥାନ୍ତା ।
ବଜେଟ ରାଜ୍ୟ ସରକାରଙ୍କ 5‘ଟି’ ତଥା ମୋ ସରକାର ପ୍ରକ୍ରିୟାର ପ୍ରତିବଦ୍ଧତାକୁ ପ୍ରତିପାଦନ କରୁଛି । 2003 ରୁ 2013 ମଧ୍ୟରେ ରାଜ୍ୟରେ ଚାଷୀଙ୍କ ଆୟ ଦ୍ଵିଗୁଣିତ ହୋଇଛି । ଆଗାମୀ ଦିନରେ କଟକ ଶ୍ରୀ ରାମ ଚନ୍ଦ୍ର ଭେଷଜ ମହାବିଦ୍ୟାଳୟକୁ ବିଶ୍ଵସ୍ତରୀୟ କରାଯାଇ ଏହାର ଶଯ୍ୟା ସଂଖ୍ୟା 3000କୁ ବୃଦ୍ଧି କରାଯିବ । ଆସନ୍ତା ଦୁଇ ବର୍ଷ ମଧ୍ୟରେ ଏଥିପାଇଁ ଏକ ହଜାରରୁ ଅଧିକ କୋଟି ଟଙ୍କା ବ୍ୟୟ କରାଯିବ ।
ଏପର୍ଯ୍ୟନ୍ତ ରାଜ୍ୟରେ 577 ଷ୍ଟାର୍ଟଅପକୁ ପଞ୍ଜିକୃତ କରାଯାଇଛି । 2020-21ରୁ ବଜେଟ ତଥ୍ୟ ଏକ୍ସେଲ ସିଟରେ ପ୍ରଦାନ କରାଯିବ । ରାଜ୍ୟରେ ଦରମା ପାଇଁ ବାର୍ଷିକ 28,083 କୋଟି ଟଙ୍କା, ପେନସନ୍ ପାଇଁ 15,900 କୋଟି ଟଙ୍କା ଓ ଋଣ ପରିଶୋଧ ବାବଦକୁ 7160 କୋଟି ଟଙ୍କାର ଆବଶ୍ୟକତା ରହିଛି । ଏ ସମସ୍ତ ଅର୍ଥ ପାଇଁ ରାଜ୍ୟ କୌଣସି ଋଣ କରୁନାହିଁ । ନିଜେ କରୁଥିବା ଆୟରୁ ଏ ସବୁ ଖର୍ଚ୍ଚ କରାଯାଉଛି । ଋଣ କରିଥିବା ସୁଧ ଅର୍ଥ ପରିଶୋଧ ପାଇଁ ରାଜ୍ୟ କୌଣସି ବାହାର ବଜାରରୁ ଋଣ କରୁନାହିଁ । ସ୍ବାସ୍ଥ୍ୟ ଓ ଶିକ୍ଷା କ୍ଷେତ୍ରରେ ଅଧିକ ବ୍ୟୟ ବରାଦ ହୋଇଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
