ଭୁବନେଶ୍ବର: କିଛି ଦିନର ବ୍ୟବଧାନ ପରେ ଫିଲ୍ମ ଇଣ୍ଡଷ୍ଟ୍ରିକୁ ପୁଣି ଫେରିଛି କାଷ୍ଟିଂ କାଉଚ। ପ୍ରଥମେ ହିରୋଇନ କରିଦେବାର ଆଶା ଏହାପରେ ଯୁବତୀ ଜଣଙ୍କ ସହ ଅସଦାଚରଣ କରିବା ସହ ଅଶ୍ଳୀଳ ଫଟୋ ଓ ଭିଡିଓ କରିଛନ୍ତି ଜଣେ ଯୁବକ। ଯୁବକ ଜଣଙ୍କ ନିଜକୁ ପ୍ରଯୋଜକ କହୁଥିବା ବେଳେ ଏଭଳି ମଡେଲ ମାନଙ୍କୁ ନେଇ ବିଭିନ୍ନ ଫଟୋସୁଟ କରିଥାଏ। ଉକ୍ତ ଯୁବକକୁ ସହିଦ ନଗର ପୋଲିସ ଗିରଫ କରି କୋର୍ଟ ଚାଲାଣ କରିଛି।
ସୂଚନା ମୁତାବକ, କଟକର ଜଣେ ମଡେଲ ସହ ଗିରଫ ଯୁବକ ଅବିନାଶ ରାଉତଙ୍କ ସାକ୍ଷାତ ହୋଇଥିଲା। ଏହାପରେ ସେ ମଡେଲ ଜଣଙ୍କୁ ଫିଲ୍ମ ଜଗତରେ ହିରୋଇନ୍ କରିଦେବାକୁ ପ୍ରତିଶ୍ରୁତି ଦେଇଥିଲେ। ଏହାପରେ ମଡେଲ ଜଣଙ୍କୁ ନେଇ ବିଭିନ୍ନ ପ୍ରକାରର ଅଶ୍ଳୀଳ ଫଟୋ ସୁଟ କରିବା ସହ ବିନା ବସ୍ତ୍ରରେ ରାମ୍ପରେ ଚାଲିବାକୁ କହିଥିଲେ। ଏପରି ଭାବରେ ବାରମ୍ବାର କରିବା ପରେ ଉକ୍ତ ମଡେଲ ଜଣଙ୍କ ସହିଦ ନଗର ଥାନାରେ ଅଭିଯୋଗ ଆଣିଥିଲେ।
ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ଅବିନାଶଙ୍କୁ ସହିଦନଗର ଅଞ୍ଚଳରୁ ଗିରଫ କରି ପଚରାଉଚରା କରିଥିଲା। ପଚରାଉଚରା କରିବା ପରେ ଅବିନାଶଙ୍କ ମୋବାଇଲରୁ ଅନେକ ଆପତ୍ତିଜନକ ଫଟୋ ଭିଡିଓ ପୋଲିସ ହାତରେ ପଡ଼ିଛି। ଏନେଇ ସହିଦ ନଗର ପୋଲିସ ଏକ ମାମଲା ରୁଜୁ କରି ଅଭିଯୁକ୍ତ ଯୁବକଙ୍କୁ କୋର୍ଟ ଚାଲାଣ କରିଛି।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
