ନୂଆଦିଲ୍ଲୀ: ବିଜେପିର ବରିଷ୍ଠ ନେତା ଓ ଦଳର ସଂକଟ ମୋଟକ କହିଲେ ଜେଟଲୀ ଙ୍କୁ ବୁଝାଉ ଥିଲା । ବିଶିଷ୍ଟ ରାଜନୈତିକ ରଣନୀତିକାର ତଥା ପୂର୍ବ ଅର୍ଥମନ୍ତ୍ରୀ ଅରୁଣ ଜେଟଲୀଙ୍କ ଆଜି 66 ବର୍ଷ ବୟସରେ ନିଧନ ହୋଇଛି । ଦୀର୍ଘଦିନ ଧରି ଜଟିଳ ରୋଗରେ ପୀଡିତ ଥିବା ଜେଟଲୀ ଗତ 10 ତାରିଖରୁ ଦିଲ୍ଲୀ ଏମ୍ସରେ ଚିକିତ୍ସିତ ହେଉଥିଲେ ।
ତେବେ ଜେଟଲୀଙ୍କ ଶେଷ ନିଶ୍ବାସ ତ୍ୟାଗ ସମୟରେ ବହୁ ବରିଷ୍ଠ ନେତା ଓ ମନ୍ତ୍ରୀ ଦିଲ୍ଲୀରେ ଅନୁପସ୍ଥିତ ଥିଲେ । ପ୍ରଥମତଃ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଦେଶ ଗସ୍ତରେ ଅଛନ୍ତି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ନିଜ ନିର୍ବାଚନ ମଣ୍ଡଳୀ ଲକ୍ଷ୍ମୌକୁ ତିନି ଦିନିଆ ଗସ୍ତରେ ଯାଇଥିଲେ । ଗୃହମନ୍ତ୍ରୀ ଅମିତ ଶାହା ହାଇଦ୍ରାବାଦ ଆଇପିଏସ ଅଧିକାରୀଙ୍କ ପାସିଙ୍ଗ ଆଉଟ ପ୍ୟାରେଡରେ ଭାଗ ନେବା ପାଇଁ ତେଲେଙ୍ଗାନା ଗସ୍ତରେ ଥିଲେ ।
ସେହିପରି ଦଳର ଅନେକ ନେତା ଦଳୀୟ ଓ ସରକାରୀ କାର୍ଯ୍ୟରେ ଦିଲ୍ଲୀ ବାହାରେ ଥିଲେ । ଉପ-ରାଷ୍ଟ୍ରପତି ଭେଙ୍କେୟା ନାଇଡୁ ଚେନ୍ନାଇ ଗସ୍ତରେ ମଧ୍ୟ ଯାଇଥିଲେ । ଏହାସହ ବିରୋଧୀ ଦଳର ପ୍ରମୁଖ ନେତା ମଧ୍ୟ ଦିଲ୍ଲୀ ବାହାରେ ଅଛନ୍ତି । କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀଙ୍କ ନେତୃତ୍ବରେ ଏକ ଟିମ ଆଜି ଶ୍ରୀନଗର ଗସ୍ତରେ ଯାଇଛନ୍ତି ।
କିନ୍ତୁ ଜେଟଲୀଙ୍କ ନିଧନ ଖବର ପାଇ ତୁରନ୍ତ ଅମିତ ଶାହା ହାଇଦ୍ରାବାଦ ଗସ୍ତ କାଣ୍ଟଛାଣ୍ଟ କରି ଦିଲ୍ଲୀ ଫେରିଆସିଛନ୍ତି । ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ମଧ୍ୟ ଦିଲ୍ଲୀକୁ ପ୍ରତ୍ୟାବର୍ତ୍ତନ କରିଛନ୍ତି । ଏପରିକି ଉପ-ରାଷ୍ଟ୍ରପତି ଭେଙ୍କେୟା ନାଇଡୁ ମଧ୍ୟ ସମସ୍ତ କାର୍ଯ୍ୟକ୍ରମ ବାତିଲ କରି ନୂଆଦିଲ୍ଲୀ ଆସି ଜେଟିଲୀଙ୍କୁ ଶ୍ରଦ୍ଧାଞ୍ଜଳୀ ଦେଇଛନ୍ତି । ବିଦେଶ ଗସ୍ତରେ ଥିବା ପ୍ରଧାନମନ୍ତ୍ରୀ ମଧ୍ୟ ଫେରିଆସିବା ପାଇଁ ଚାହୁଁଥିଲେ । କିନ୍ତୁ ସ୍ବର୍ଗତ ଜେଟଲୀଙ୍କ ପରିବାରର ଅନୁରୋଧକୁ ରକ୍ଷାକରି ସମସ୍ତ ସରକାରୀ କାର୍ଯ୍ୟକ୍ରମ ସାରି ଭାରତ ଫେରିବେ ନରେନ୍ଦ୍ର ମୋଦି ।
ବ୍ୟୁରୋ ରିପୋର୍ଟ ଇଟିଭି ଭାରତ
