ଭୁବନେଶ୍ବର: ଥାନା ସାମ୍ନାରେ ଯୁବକକୁ ହତ୍ୟା ! ଗ୍ୟାଙ୍ଗରୁ ଅଲଗା ହୋଇ ଅପରାଧ ଛାଡିଦେବାରୁ ଥାନା ସାମ୍ନାରେ ଗାଡି ଧକ୍କା କରି ଜୀବନ ନେଇଥିବା ଅଭିଯୋଗ କଲେ ମୃତକ ପି ରାମା ରାଓଙ୍କ ପରିବାର । ଅପରାଧୀଙ୍କ ଠାରୁ ଅଲଗା ହେବା ପରେ ନିଶା ବେପାରଠୁ ଆରମ୍ଭ କରି ଦେହବ୍ୟବସାୟର ସମସ୍ତ ତଥ୍ୟ ପଦାକୁ ଆସିଯିବା ଭୟରେ ତାଙ୍କୁ ହତ୍ୟା କରି ଦୁର୍ଘଟଣାର ରୂପ ଦିଆଯାଇଥିବା ହୋଇଛି ଅଭିଯୋଗ ।
ଏହା ବି ପଢ଼ନ୍ତୁ: ରାଜଧାନୀରେ ଅପରାଧୀଙ୍କ ଜୁଲୁମ, ଅପରାଧ ଛାଡିଦେବାରୁ ରାସ୍ତାରେ ହାଣିଲେ ଦୁର୍ବୁତ୍ତ !
ତେବେ ଗତ ଜୁନ ୪ରେ ଗୌତମ ନଗର ବସ୍ତିରେ ରାମା ରାଓକୁ କିଛି ଦୁର୍ବୃତ୍ତ ହାଣି ଦେଇଥିଲେ । ସେତେବେଳେ ସେ ନିଜେ ଇଟିଭିକୁ ପ୍ରତିକ୍ରିୟା ଦେଇ ଅପରାଧ ଛାଡିଦେବାରୁ ତାଙ୍କୁ କ୍ରିମିନାଲ ହଇରାଣ କରୁଥିବା କହିଥିଲେ । ଏପରିକି ସେହି ସମୟରେ ପୋଲିସ ତାଙ୍କୁ ସୁରକ୍ଷା ଦେବ ବୋଲି ମଧ୍ୟ ପ୍ରତିଶ୍ରୁତି ଦେଇଥିଲେ । ହେଲେ ତାପରେ ମଧ୍ୟ ତାଙ୍କୁ ମରଣାନ୍ତକ ଆକ୍ରମଣ ହୋଇଥିଲା । ଏନେଇ ବଡଗଡ ଥାନାରେ ଅଭିଯୋଗ ମଧ୍ୟ ହୋଇଥିଲା । ତେବେ ଗତକାଲି (ଗୁରୁବାର) ରାତିରେ ତାଙ୍କୁ ହତ୍ୟା କରାଯାଇଥିବା ପରିବାର ଲୋକ ଅଭିଯୋଗ ଆଣିଛନ୍ତି ।
ପୋଲିସ ପାଇଁ ଏହା ବଡ ଚ୍ୟାଲେଞ୍ଜ ହୋଇଥିବା ବେଳେ ସେଠାରେ ଥିବା କିଛି ପ୍ରତ୍ୟକ୍ଷଦର୍ଶୀଙ୍କ ସୂଚନା ଆଧାରରେ ଏକ ଅପମୃତ୍ୟୁ ମାମଲା ରୁଜୁ କରିଥିବା ପୋଲିସ କହିଛି । ଏଇ ଘଟଣା ସାମ୍ନାକୁ ଆସିବା ପରେ ଏହା ପ୍ରକୃତରେ ହତ୍ୟା ନା ଦୁର୍ଘଟଣା ତାକୁ ନେଇ ପ୍ରଶ୍ନ ଉଠିଛି । ତେବେ ମୃତକର ପୂର୍ବ ବୟାନ ଓ ପରିବାର ଲୋକଙ୍କ ଅଭିଯୋଗ ସତ୍ତ୍ବେ ପୋଲିସ କାହିଁକି ହତ୍ୟା ଅଭିଯୋଗ ଗ୍ରହଣ କରୁନି ତାହା ଉପରେ ପ୍ରଶ୍ନବାଚି ସୃଷ୍ଟି ହୋଇଛି । ପୋଲିସ ଅପରାଧରେ ରୋକ ଲଗାଇବା ପରିବର୍ତ୍ତେ ଅପରାଧୀଙ୍କୁ ପ୍ରୋତ୍ସାହନ ଦେଉଥିବା ପରିବାର ଲୋକେ ଅଭିଯୋଗ ବାଢିଛନ୍ତି ।
ଇଟିଭି ଭାରତ, ଭୁବନେଶ୍ବର
