ଭୁବନେଶ୍ବର: ପରିଚାଳନା ଓ ବ୍ୟବସାୟିକ ସଂସ୍କାର ମାଧ୍ୟମରେ ରାଜ୍ୟର ବିଦ୍ୟୁତ ଯୋଗାଣ ବ୍ୟବସ୍ଥାକୁ ଆତ୍ମନିର୍ଭରଶୀଳ କରିବା ପାଇଁ ମୁଖ୍ୟ ଶାସନ ସଚିବ ଓ.ପି.ଟି.ସି.ଏଲ୍, ଗ୍ରୀଡକୋ ଏବଂ ବିତରଣ କମ୍ପାନୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ବିଦ୍ୟୁତ ବ୍ୟବସ୍ଥାରେ କୋଭିଡର ପ୍ରଭାବ ଏବଂ ବର୍ତ୍ତମାନର ଆବଶ୍ୟକତା ଆଦି ବିଷୟରେ ସମୀକ୍ଷା କରି ମୁଖ୍ୟ ଶାସନ ସଚିବ ଏହି ନିର୍ଦ୍ଦେଶ ଦେଇଛନ୍ତି ।
ବର୍ତ୍ତମାନ ପର୍ଯ୍ୟନ୍ତ ସୃଷ୍ଟି କରାଯାଇଥିବା ଭିତ୍ତିଭୂମିକୁ ପୂର୍ଣ୍ଣ ଉପଯୋଗ କରି ବିଦ୍ୟୁତ ଯୋଗାଣର ମାନ ବୃଦ୍ଧି କରିବାକୁ ଶ୍ରୀ ତ୍ରିପାଠୀ ଓ.ପି.ଟି.ସି.ଏଲ୍ ଏବଂ ବିତରକ କମ୍ପାନୀ ମାନଙ୍କୁ ନିର୍ଦ୍ଦେଶ ଦେଇଥିଲେ ।
ସେ କହିଥିଲେ ଯେ ଗୁଣାତ୍ମକ ବିଦ୍ୟୁତ ଯୋଗାଣ ନିଶ୍ଚିତ କରାଗଲେ ଶିଳ୍ପାନୁଷ୍ଠାନ ମାନେ ଗ୍ରୀଡକୋରୁ ବିଦ୍ୟୁତ କିଣିବେ । ନିଜସ୍ୱ ପାୱାର ପ୍ଲାଣ୍ଟରେ ବିଦ୍ୟୁତ ଉତ୍ପାଦନ ଅପେକ୍ଷା ଏହା ସେମାନଙ୍କୁ ଅଧିକ ଶସ୍ତା ଓ ସୁବିଧାଜନକ ହେବ । ଗ୍ରୀଡକୋରୁ ବିଦ୍ୟୁତ ନେବା ପାଇଁ ରାଜ୍ୟରେ ପ୍ରତିଷ୍ଠା ହେଉଥିବା ଶିଳ୍ପାନୁଷ୍ଠାନମାନଙ୍କୁ ଉତ୍ସାହିତ କରିବା ନିମନ୍ତେ ମୁଖ୍ୟ ଶାସନ ସଚିବ ଶିଳ୍ପ ବିଭାଗଙ୍କୁ ନିର୍ଦ୍ଦେଶ ଦେଇଥିଲେ ।
ଶକ୍ତି ବିଭାଗ ପ୍ରମୁଖ ଶାସନ ସଚିବ ଶ୍ରୀ ନିକୁଞ୍ଜବିହାରୀ ଧଳ ରାଜ୍ୟରେ ବିଦ୍ୟୁତ ଯୋଗାଣ ସ୍ଥିତି ବିଷୟରେ ସୂଚନା ଦେଇ କହିଥିଲେ ଯେ ରାଜ୍ୟରେ ବର୍ତ୍ତମାନ ବିଭିନ୍ନ ସ୍ରୋତରୁ ୭.୧୫ ଜିଗାୱାଟ୍ ବିଦ୍ୟୁତ ଉତ୍ପାଦନ ହେଉଛି । ସରକାରଙ୍କ ଲଗାତାର ସାହାଯ୍ୟ ଫଳରେ ବିଦ୍ୟୁତ ଭିତ୍ତିଭୂମିରେ ବ୍ୟାପକ ସଂପ୍ରସାରଣ ହୋଇଛି । ରାଜ୍ୟରେ ଗ୍ରୀଡ୍ ଏବଂ ୩୩/୧୧ କେ.ଭି. ସବଷ୍ଟେସନ୍ ସଂଙ୍ଖ୍ୟା ଯଥାକ୍ରମେ୧୫୬ ଏବଂ ୯୧୯ କୁ ବୃଦ୍ଧି ପାଇଛି । ଏଚ୍.ଟି.ଲାଇନ୍ ୧,୫୮,୪୪୫ କି.ମି. ଏବଂ ଏଲ୍.ଟି. ଲାଇନ୍ ୧,୮୪,୦୧୦ କି.ମି. କୁ ସଂପ୍ରସାରଣ କରାଯାଇଛି ଗ୍ରାହକଙ୍କ ସଂଙ୍ଖ୍ୟା ୮୯ ଲକ୍ଷକୁ ବୃଦ୍ଧି ପାଇଛି ।
ବର୍ତ୍ତମାନ ଓଡ଼ିଶା ବିଦ୍ୟୁତ ବଳକା ରାଜ୍ୟର ମାନ୍ୟତା ହାସଲ କରିଛି । ବାହାର ରାଜ୍ୟକୁ ବିକ୍ରି କରିବା ପାଇଁ ବାର୍ଷିକ ପ୍ରାୟ ୧୦୦୦ ମେଗାୱାଟ୍ ବଳକା ବିଦ୍ୟୁତ ଓଡ଼ିଶା ପାଖରେ ଅଛି
ସମୀକ୍ଷାରୁ ଜଣାପଡିଥିଲା ଯେ କୋଭିଡ୍ -୧୯ ସଟ୍ଡ଼ାଉନ୍ ଓ ଳକଡ଼ାଉନ୍ ଆଦି ଯୋଗୁଁ ବିଦ୍ୟୁତ କ୍ଷେତ୍ର କ୍ଷତିଗ୍ରସ୍ତ ହୋଇଛି । ଗତବର୍ଷ ତୁଳନାରେ ଚଳିତ ବର୍ଷ ମାର୍ଚ୍ଚରୁ ଜୁନ୍ ମାସ ମଧ୍ୟରେ ବିଦ୍ୟୁତ ଚାହିଦା ଓ ବିକ୍ରୀ ଶତକଡା ୧୪ ଭାଗ କମିଛି । ସେହିପରି ଶିଳ୍ପାନୁଷ୍ଠାନ ମାନଙ୍କର ନିଜସ୍ୱ କାପଟିଭ୍ ବିଦ୍ୟୁତ ଉତ୍ପାଦନ ଓ ବ୍ୟବହାର ମଧ୍ୟ ଏପ୍ରିଲ୍ ଓ ମେ ମାସରେ ଯଥାକ୍ରମେ ଶତକଡା ୨୫ ଓ ୧୨ ଭାଗ କମିଛି ।
ଚାହିଦା କମ ଥିବାରୁ ଗ୍ରୀଡ଼କୋର ରାଜସ୍ୱ କମିଥିବା ବେଳେ ପାୱାର ସଂଗ୍ରହ ବୁଝାମଣା ଅନୁସାରେ ଗ୍ରୀଡ଼କୋଙ୍କୁ ନିର୍ଦ୍ଧାରିତ ରାଶି ଶକ୍ତି ଉତ୍ପାଦନକାରୀ ପ୍ଲାଣ୍ଟ୍ ମାନଙ୍କୁ ଦେବାକୁ ହେଉଛି ।
ବିଶେଷତଃ ସାମୁଦାୟିକ ବୈଷୟିକ ଏବଂ ବ୍ୟବସାୟିକ (ଏ.ଟି. ଆଣ୍ଡ ସି.) କ୍ଷତି କମାଇବା ଉପରେ ମୁଖ୍ୟ ଶାସନ ସଚିବ ଶ୍ରୀ ତ୍ରିପାଠୀ ଗୁରୁତ୍ୱ ଆରୋପ କରିଥିଲେ । ବିଗତ ବର୍ଷମାନଙ୍କ ମଧ୍ୟରେ ଏହି କ୍ଷତି ଶତକଡା ୫୭ ରୁ ଶତକଡା ୩୦ ଭାଗକୁ କମାଯାଇ ପାରିଛି । ଶତକଡା ୧ ଭାଗ ଏ.ଟି.ଆଣ୍ଡ ସି. କ୍ଷତି କମିଲେ ୧୩୦ କୋଟି ଟଙ୍କାର ରାଜସ୍ୱ ଅଧିକ ମିଳିବ । ତେଣୁ ଓ.ପି.ଟି.ସି.ଏଲ୍, ଗ୍ରୀଡ଼କୋ ଏବଂ ବିତରକ କଂପାନୀମାନେ ମିଳିତ ଲକ୍ଷ୍ୟଭେଦୀ କାର୍ଯ୍ୟଯୋଜନା ମାଧ୍ୟମରେ ଏହି କ୍ଷତିକୁ ୧୫ % ପର୍ଯ୍ୟନ୍ତ କମାଇବା ପାଇଁ ମୁଖ୍ୟ ଶାସନ ସଚିବ ଶ୍ରୀ ତ୍ରିପାଠୀ ନିର୍ଦ୍ଦେଶ ଦେଇଥିଲେ । ନୂତନ ବୈଷୟିକ କୌଶଳ ଗୁଡିକ ମାଧ୍ୟମରେ ନିଜର ପରିଚାଳନାଗତ ଦକ୍ଷତା ବୃଦ୍ଧି କରିବା ପାଇଁ ମଧ୍ୟ ବୁଦ୍ୟୁତ୍ କମ୍ପାନୀମାନଙ୍କୁ ପରାମର୍ଶ ଦିଆଯାଇଥିଲା ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
