ଭୁବନେଶ୍ବର: ଶରତ ଆକାଶରେ କଳାମେଘର ବାଦଲ ଅପସରି ଯାଉଥିବା ବେଳେ ନୀଳ ଗଗନରେ ଧଳା ବାଦଲର ମନଲୋଭା ଦୃଶ୍ୟ ଧରାପୃଷ୍ଠକୁ ଦଶଭୂଜା ମା’ ଆଦ୍ୟାଶକ୍ତିଙ୍କ ଆବିର୍ଭାବକୁ ପ୍ରତୀକ୍ଷା କରିଛି । ଏହା ସାଙ୍ଗକୁ ମଳୟ ପବନର ସୂକ୍ଷ୍ମ ଆଲିଙ୍ଗନରେ ନଦୀ ପଠା ଓ ବିଲ ପ୍ରାନ୍ତରେ କାଶତଣ୍ଡି ଫୁଲର ଧବଳ ଆସ୍ତରଣ ସତେ ଆନନ୍ଦରେ ନୃତ୍ୟ କରୁଥିବା ପ୍ରତୀୟମାନ ହେଉଛି । ମା'ଙ୍କର ସ୍ୱାଗତ ପାଇଁ ଧରଣୀ ରାଣୀ ସବୁଜିମାର ଶାଢୀରେ ସତେଜ ସତେଜ ଲାଗୁଥିବା ବେଳେ ବିଭିନ୍ନ ପୂଜା ମଣ୍ଡପ ପକ୍ଷରୁ ମଧ୍ୟ ପୂଜାର୍ଚ୍ଚନା ପାଇଁ ପ୍ରସ୍ତୁତି ଆରମ୍ଭ ହୋଇଗଲାଣି ।
ଏହି ତୋରଣ ବାଉଁଶ, ଫାଇବର ଓ କପଡାରେ ପ୍ରସ୍ତୁତ ହେବ ବୋଲି ସୂଚନା ମିଳିଛି । ଏଥର ସହିଦନଗର ପୂଜାମଣ୍ଡପରେ ମା' ଚାନ୍ଦି ମେଢ଼ ସାଙ୍ଗକୁ ସୁନା ମୁକୁଟରେ ଭକ୍ତମାନଙ୍କୁ ଦର୍ଶନ ଦେବେ ବୋଲି ସମ୍ପାଦକ କହିଛନ୍ତି । ସେହିପରି ଷ୍ଟେସନ ବଜାର ପୂଜା ମଣ୍ଡପ ବାହାର ପଟୁ ଲୋକଙ୍କୁ ଅଜନ୍ତା ଓ ଏଲୋରା ଗୁମ୍ଫା ଭଳି ଦୃଶ୍ୟମାନ ହେବ । କିନ୍ତୁ ଏହାର ଆଭ୍ୟନ୍ତରରେ ଆଦିମ କାଳରୁ ଆଧୁନିକ ଯୁଗ ପର୍ଯ୍ୟନ୍ତ ଲୋକମାନଙ୍କ ଜୀବନଶୈଳୀକୁ ନେଇ ସ୍ୱତନ୍ତ୍ର ପ୍ରଦର୍ଶନ ପାଇଁ ବ୍ୟବସ୍ଥା ହେଉଥିବା କହିଛନ୍ତି ଏହି ଅନୁଷ୍ଠାନର ସମ୍ପାଦକ ଦୀପକ ଜେନା । ଏଥିପାଇଁ 50 ଲକ୍ଷ ଟଙ୍କା ବଜେଟ ପ୍ରସ୍ତୁତ ହୋଇଥିବା ବେଳେ ଲୋକମାନଙ୍କ ସୁରକ୍ଷା ପ୍ରତି ବିଶେଷ ଦୃଷ୍ଟି ଦିଆଯାଉଥିବା ସେ କହିଛନ୍ତି ।
ରାଜଧାନୀର ଅନ୍ୟତମ ଆକର୍ଷଣ ରସୁଲଗଡ଼ ପୂଜା ମଣ୍ଡପରେ ମା’ ଦୁର୍ଗା ଫୁଲ ମହଲରେ ବିରାଜମାନ କରିବେ । ଏଥିପାଇଁ ଲୋକେ 9ଫୁଟ ଉପରକୁ ଚଢିବା ସହିତ 9 ଫୁଟ ତଳକୁ ଓଲ୍ହାଇ ମା'ଙ୍କ ଦର୍ଶନ ପାଇପାରିବେ ବୋଲି ପୂଜା କମିଟିର ସଭାପତି ଅନୀଲ ବଳିୟାର ସିଂହ କହିଛନ୍ତି । କମିଟି ପକ୍ଷରୁ ଏଥର 30ଲକ୍ଷ ବଜେଟ ଥିବା ବେଳେ ମଣ୍ଡପ ଅଞ୍ଚଳକୁ ବିଭିନ୍ନ ରଙ୍ଗୀନ ଆଲୋକମାଳାରେ ସଜାଇବା ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଅନ୍ୟପକ୍ଷେ ନୂଆପଲ୍ଲୀ ପୂଜା ମଣ୍ଡପକୁ ଏଥର 85 ଫୁଟ ଉଚ୍ଚ ଓ 120 ଫୁଟ ଓସାର ବିଶିଷ୍ଟ ରାଜସ୍ଥାନର ପଦ୍ମାବତୀ ପ୍ୟାଲେସରେ ଝଲସାଇବା ପାଇଁ 70ଜଣ କାରିଗର ଦିନ ରାତି କାର୍ଯ୍ୟରେ ଲାଗିଥିବା ସୂଚନା ମିଳିଛି । ଏଥିପାଇଁ 15 ଲକ୍ଷରୁ ଉର୍ଦ୍ଧ୍ବ ବଜେଟ ଥିବା ବେଳେ ଅନେକ ଦାତା ସ୍ୱଇଛାରେ ବିଭିନ୍ନ କାର୍ଯ୍ୟ କରାଇ ଦେବାର ପ୍ରତିଶୃତି ଦେଇଥିବା କହିଛନ୍ତି ଅନୁଷ୍ଠାନର ସଭାପତି ପବିତ୍ର ମୋହନ ବେହେରା ।
ରାଜଧାନୀରେ ଆୟୋଜିତ ହେଉଥିବା ମା' ଜଗତଜନନୀଙ୍କ ଏହି ପାର୍ବଣକୁ ସମସ୍ତେ ଆନନ୍ଦର ସହ ଉପଭୋଗ କରିବା ସହ ଦେବୀ ଦର୍ଶନ କରି ଆଶୀର୍ବାଦ ନେବା ପାଇଁ ସବୁ କମିଟି ପକ୍ଷରୁ କଡା ସୁରକ୍ଷାର ବନ୍ଦୋବସ୍ତ ହୋଇଥିବା ଜଣାପଡିଛି । ଏହା ସହିତ ଏଥର ସବୁ ମଣ୍ଡପ ପକ୍ଷରୁ ପ୍ଲାଷ୍ଟିକ ବ୍ୟବହାର ନ କରିବା ଓ ଓଡ଼ିଆ ସଂସ୍କୃତିକୁ ରୁଦ୍ଧିମନ୍ତ କରିବା ପାଇଁ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ଉପରେ ଗୁରୁତ୍ୱ ଦିଆଯାଇଥିବା ଜଣାପଡିଛି ।
ଭୁବନେଶ୍ୱରରୁ ଲକ୍ଷ୍ମୀକାନ୍ତ ଦାସ ,ଇଟିଭି ଭାରତ
