ଭୁବନେଶ୍ବର: ଭାଇ ଭଉଣୀଙ୍କ ପବିତ୍ର ସମ୍ପର୍କର ପର୍ବ ରାକ୍ଷୀ ପୂର୍ଣ୍ଣିମା । ଆଉ ଏହି ଦିନରେ ଭାଇ ହାତରେ ସ୍ନେହର ଡୋର ବାନ୍ଧିଥାଏ ଭଉଣୀ । ଆଉ ରାକ୍ଷୀ ବାନ୍ଧି ଭାଇଠାରୁ ସୁରକ୍ଷାର ପ୍ରତିଶ୍ରୁତି ନେଇଥାଏ ଭଉଣୀ । ତେବେ କୋରୋନା ମହାମାରୀ ବେଳେ ସାରା ବିଶ୍ବକୁ ସୁରକ୍ଷା ଯୋଗାଇ ଆସୁଛନ୍ତି କୋରୋନା ଯୋଦ୍ଧା । ଆଜି ଏହି ପବିତ୍ର ଦିନରେ ରାଜଧାନୀରେ 'ଏଇ ତ ସମ୍ପର୍କ' ଅନୁଷ୍ଠାନର ସଦସ୍ୟମାନେ କୋରୋନା ଯୋଦ୍ଧାଙ୍କୁ ରାକ୍ଷୀ ବାନ୍ଧିଛନ୍ତି ।
ଏହି ଅନୁଷ୍ଠାନର ଦିବ୍ୟାଙ୍ଗ ଓ କିନ୍ନରମାନେ କ୍ୟାପିଟାଲ ହସ୍ପିଟାଲରେ ଥିବା ଡାକ୍ତର, ନର୍ସ, ଆମ୍ବୁଲାନ୍ସ ଡ୍ରାଇଭର ଓ ପୋଲିସଙ୍କ କର୍ମଚାରୀଙ୍କ ହାତରେ ରାକ୍ଷୀ ବାନ୍ଧିଛନ୍ତି । ଏହାସହ ଟ୍ରାଫିକ ପୋଲିସ ମାନଙ୍କ ହାତରେ ମଧ୍ୟ ସେମାନେ ରାକ୍ଷୀ ବାନ୍ଧିଛନ୍ତି । କୋରୋନା କଟକଣା ଭିତରେ ଏହି ପ୍ରୀତିର ପର୍ବକୁ ପାଳନ କରି କର୍ମକର୍ତ୍ତାମାନେ ଖୁସିଥିବା ବେଳେ ମହାମାରୀ ସହ ସର୍ବଦା ଲଢ଼ି ସମସ୍ତଙ୍କୁ ସୁରକ୍ଷା ଯୋଗାଇବା ପାଇଁ ସଂକଳ୍ପ ନେଇଛନ୍ତି । ନିଜକୁ ଉତ୍ସର୍ଗୀକୃତ କରି ଲୋକଙ୍କୁ ସୁରକ୍ଷା ଯୋଗାଇବେ ବୋଲି ସେମାନେ କହିଛନ୍ତି ।
ଆଜିର ଦିନକୁ ଶ୍ରାବଣ ପୂର୍ଣ୍ଣିମା ବା ଗହ୍ମା ପୂର୍ଣ୍ଣିମା ବୋଲି ମଧ୍ୟ କୁହାଯାଏ । ପ୍ରଭୁ ବଳଭଦ୍ରଙ୍କ ଜନ୍ମ ତିଥିଭାବେ ଗ୍ରହଣ କରାଯାଏ । ବଳଭଦ୍ରଙ୍କୁ ସମ୍ମାନ ଜଣାଇ ଏହିଦିନ ଗୋମାତାଙ୍କୁ ପୂଜା କରାଯାଏ । ଗୋମାତାଙ୍କୁ ମଧ୍ୟ ରାକ୍ଷୀ ବାନ୍ଧିବାର ନିଦ୍ଦର୍ଶନ ରହିଛି । ସବୁ ପରେ ବି ରାକ୍ଷୀ ବାନ୍ଧିଲା ପରେ ଗେହ୍ଲୀ ଭଉଣୀଟି ଭାଇଠାରୁ ସବୁଦିନ ସୁରକ୍ଷାର ପ୍ରତିଶୃତି ନେଇଥାଏ । ଆଉ ଆଜିର ଦିନରେ କୋରୋନା ପରି ମହାମାରୀରୁ ରକ୍ଷା କରୁଥିବା ସମ୍ମୁଖ ଯୋଦ୍ଧା ବା କୋରୋନା ଯୋଦ୍ଧାଙ୍କୁ ରାକ୍ଷୀ ବାନ୍ଧିଛନ୍ତି ଏହି ଅନୁଷ୍ଠାନର ସଦସ୍ୟ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
