ଭୁବନେଶ୍ବର: 16ତମ ଧଉଳି କଳିଙ୍ଗ ମହୋତ୍ସବ ଆରମ୍ଭ ହେବାକୁ ଯାଉଛି । ଏହି ଉତ୍ସବ ଆସନ୍ତା 7 ତାରିଖରୁ 3 ଦିନ ଧରି ଚାଲିବ। ଯେଉଁଥିରେ ବିଭିନ୍ନ ପ୍ରକାର ଶାସ୍ତ୍ରୀୟ ଓ ସାମରିକ ନୃତ୍ୟର ମଜା ନେବେ ଦର୍ଶକ। ଏ-ନେଇ ସାମ୍ବାଦିକ ସମ୍ମିଳନୀରେ ଏକାଡେମୀର ମୁଖ୍ୟ ଗୁରୁ ଅରୁଣା ମହାନ୍ତି ପ୍ରକାଶ କରୁଛନ୍ତି। ଧଉଳୀକୁ ଦେଶବିଦେଶ ପର୍ଯ୍ୟଟକଙ୍କ ନିକଟରେ ଉପସ୍ଥାପିତ କରିବା ଏହି ଉତ୍ସବର ମୁଖ୍ୟ ଲକ୍ଷ୍ୟ ବୋଲି ସେ କହିଛନ୍ତି। ଧଉଳି ଶାନ୍ତିସ୍ତୁପର ପାଦ ଦେଶରେ ଆୟୋଜିତ ହେବାକୁ ଥିବା ଉତ୍ସବରେ ଭାରତନାଟ୍ୟମ୍ ଓ କଥକ ନୃତ୍ୟ ମଧ୍ୟ ସ୍ଥାନ ପାଇବ। ଏଥିପାଇଁ ଦେଶର ବିଭିନ୍ନ ସ୍ଥାନରୁ ନୃତ୍ୟ ଶିଳ୍ପୀମାନେ ଆସୁଥିବା ସେ କହିଛନ୍ତି।
ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ନୃତ୍ୟ ଶିଳ୍ପି ମାୟାଧରଙ୍କୁ କଳିଙ୍ଗ ବୁଦ୍ଧ ସମ୍ମାନ ଦିଆଯିବ। ସେହିପରି 4 ଜଣ ବ୍ୟକ୍ତି ବିଶେଷଙ୍କୁ ଗୁରୁ ଗଙ୍ଗାଧର ପ୍ରଧାନ ସ୍ମୃତି ସମ୍ମାନ ପ୍ରଦାନ କରାଯିବ ବୋଲି ଏକାଡେମୀର ମୁଖ୍ୟ କହିଛନ୍ତି। ଏହି ସାମ୍ବାଦିକ ସମ୍ମିଳନୀରେ ବହୁ ମାନ୍ୟଗନ୍ୟ ବ୍ୟକ୍ତି ଉପସ୍ଥିତ ଥିଲେ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସଙ୍କ ରିପୋର୍ଟ ଇଟିଭି ଭାରତ
