ଭୁବନେଶ୍ବର: ଗତ ୨୧ ତାରିଖରେ କୁଆଖାଇ ନଦୀ ପଠାରୁ ପୋତା ହୋଇଥିବା ମୃତଦେହକୁ ଉଦ୍ଧାର କରାଯାଇଥିଲା । ଏହି ଘଟଣାରେ ପୋଲିସ ମୃତକର ସାର୍ଟପ୍ୟାଣ୍ଟ ସହ କୁଣ୍ଡଳ ଓ ଚପଲ ଦେଖାଇ ଧିରିକୁଟ ବସ୍ତିରେ ପରିଚୟ ଖୋଜୁଥିବା ସୂଚନା ମିଳିଛି ।
ଭୁବନେଶ୍ବର ଉପକଣ୍ଠ ମଞ୍ଚେଶ୍ବର ଥାନା ବରିମୁଣ୍ଡ ବାଲିଯାତ୍ରା ପଡିଆରୁ ଅଧାପୋତା ମୃତଦେହକୁ ଗୁରୁବାର ଉଦ୍ଧାର କରାଯାଇଥିଲା । ଗୁରୁବାର ସକାଳେ ସାଇଣ୍ଟିଫିକ ଟିମ ସହ କମିଶନରେଟ ପୋଲିସ ପହଞ୍ଚି ପାରିପାର୍ଶ୍ବିକ ସ୍ଥିତି ପରଖିବା ସହ ମୃତଦେହକୁ ଖୋଳିକି ବାହାର କରିଥିଲା । ଡିସିପି ଏବଂ ବରିଷ୍ଠ ପୋଲିସ ଅଧିକାରୀଙ୍କ ଉପସ୍ଥିତିରେ ମୃତଦେହ ଉଦ୍ଧାର କରାଯାଇଥିଲା ।
ତେବେ ମୃତଦେହଟି ଜଣେ ପୁରୁଷଙ୍କର ହୋଇଥିବା ଜଣାପଡିଛି । ପାରିପାର୍ଶ୍ବିକ ସ୍ଥିତିରୁ ଏହା ଏକ ହତ୍ୟା ଘଟଣା ସନ୍ଦେହ କରୁଛି ପୋଲିସ । ପୁରୁଷର ପରିଚୟ ଖୋଜିବା ପାଇଁ ଧିରିକୁଟ ବସ୍ତିରେ ପୋଲିସ ପଚରା ଉଚୁରା ଆରମ୍ଭ କରିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
