ଭୁବନେଶ୍ବର: ରାଜ୍ୟ ମୁଖ୍ୟ ଶାସନ ସଚିବ ପଦରୁ ବିଦାୟ ନେଇଛନ୍ତି ଆଦିତ୍ୟ ପ୍ରସାଦ ପାଢୀ । ଯଦିଓ ଦାୟିତ୍ବ ହସ୍ତାନ୍ତର ସୋମବାର କରିବେ ତେବେ ଶନିବାର ତାଙ୍କର ଶେଷ କାର୍ଯ୍ୟ ଦିବସ ଥିଲା । ଶନିବାର ଅନ୍ତିମ ଦିନରେ ଆଦିତ୍ୟ ପାଢୀ ନିଜ ସମୟରେ ହୋଇଥିବା ବିଭିନ୍ନ ଉନ୍ନୟନମୂଳକ କାମ ସହ ବିଭିନ୍ନ ବିଭାଗ ସହ ସମନ୍ବୟ ରଖିବା ବଡ ଉପଲବ୍ଧି ବୋଲି କହିଛନ୍ତି ।
ଏକ ସାମ୍ବାଦିକ ସମ୍ମିଳନୀରେ ମୁଖ୍ୟ ଶାସନ ସଚିବ ପାଢୀ ନିଜ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ଗତ ତିନି ବର୍ଷ ଆଠ ମାସ କାର୍ଯ୍ୟ ବେଶ ଆତ୍ମସନ୍ତୋଷ ଥିଲା । ସରକାରୀ ଯୋଜନାକୁ ତୃଣମୂଳ ସ୍ତରରେ ପହଞ୍ଚାଇବାରେ ସଫଳ ହୋଇଛୁ । ଏଥିପାଇଁ ସମସ୍ତ ବିଭାଗର ଅଧିକାରୀ ମାନେ କୋଠର ପରିଶ୍ରମ କରିଥିଲେ । ଏହାସହ ମୁଖ୍ୟମନ୍ତ୍ରୀଙ୍କ ବଳିଷ୍ଠ ନେତୃତ୍ବରେ ଆମ ରାଜ୍ୟ ପ୍ରଗତି କରିଛି । ମୁଖ୍ୟତଃ ଗ୍ରାମଞ୍ଚଳ ହାଉସିଂ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରାଯାଇଛି ବୋଲି କହିଛନ୍ତି ।
ଏଥିସହ ପାନୀୟ ଜଳ କ୍ଷେତ୍ରରେ ମଧ୍ୟ ବେଶ ଉଲ୍ଲେଖନୀୟ କାର୍ଯ୍ୟ ହୋଇଛି । ଆସନ୍ତା ତିନି ବର୍ଷ ପରେ ପ୍ରତ୍ୟେକ ଘରକୁ ପାଇପ ଯୋଗେ ଜଳ ଯୋଗାଇ ଦିଆଯିବ ବୋଲି ସେ କହିଛନ୍ତି । ସେହିପରି ସ୍ବାସ୍ଥ୍ୟ ସେବା କ୍ଷେତ୍ରରେ ବି ରାଜ୍ୟ ପ୍ରଗତି କରିଛି ବୋଲି କହିଛନ୍ତି ମୁଖ୍ୟ ଶାସନ ସଚିବ । ମ୍ୟାଲେରିଆ ରୋଗ କ୍ଷେତ୍ରରେ ଓଡିଶା ଆଶାନୁରୂପ ସଫଳତା ପାଇବା ପରେ ‘ଓ୍ଵାର୍ଲଡ ହେଲଥ ଅରଗାନାଇଜେସନ’ ତରଫରୁ ପୁରସ୍କୃତ ହୋଇଛି ରାଜ୍ୟ । ବିପର୍ଯ୍ୟୟ ପରିଚାଳନା କ୍ଷେତ୍ରରେ ମଧ୍ୟ ରାଜ୍ୟ ବେଶ ସଫଳତା ପାଇଛି । ବିଗତ ଦିନରେ ହୋଇଥିବା ପ୍ରାକୃତିକ ଦୁର୍ବିପାକକୁ ରାଜ୍ୟ ସଫଳତା ସହ ମୁକାବିଲା କରିଛି ବୋଲି ସେ କହିଛନ୍ତି ।
ଅନ୍ୟପଟେ କ୍ରୀଡା କ୍ଷେତ୍ରରେ ମଧ୍ୟ ରାଜ୍ୟ ବେଶ ଭଲ ପ୍ରଦର୍ଶନ କରିଛି । ହକି ଓ୍ଵାର୍ଲ୍ଡ କପ ଓ ଏସିଆନ ଆଥଲେଟିକ ଚମ୍ପିୟାନ୍ସସିପ ମଧ୍ୟ ରାଜ୍ୟ ସଫଳତାର ସହ ଆୟୋଜନ କରି ବିଶ୍ବ ଦରବାରରେ ପ୍ରଶଂସିତ ହୋଇଛି । ଖାଲି ଏତିକି ନୁହେଁ ନୂଆ ସରକାର ଆସିବା ପରେ ସରକାରଙ୍କ ମୁଖ୍ୟ ଲକ୍ଷ୍ୟ ଲୋକସେବା ଉପରେ ପ୍ରଧାନ୍ୟ ଦିଆଯାଇଛି । ନିଜ କାର୍ଯ୍ୟକାଳ ସମୟର ନିଜର ଏକମାତ୍ର ବ୍ୟକ୍ତିଗତ ସଫଳତା କହିଛନ୍ତି ଆଦିତ୍ୟ ପାଢୀ । ନିଜ ବ୍ୟକ୍ତିଗତ ସଫଳତା ଭାବେ ଇଣ୍ଡିଆନ ଅଏଲ ସହ ରାଜ୍ୟ ସରକାରଙ୍କ ବୁଝାମଣା । ଯାହାଦ୍ବାରା ରାଜ୍ୟ ସରକାର ବର୍ଷକୁ 2ହଜାର କୋଟି ଟଙ୍କା ସଞ୍ଚୟ କରୁଛନ୍ତି ବୋଲି ସେ କହିଛନ୍ତି ।
ତେବେ ନିଜର ଆଗାମୀ କାର୍ଯ୍ୟ ତୁଲାଇବାକୁ ସେ ଉତ୍ସୁକ ବୋଲି କହିଛନ୍ତି ।
ଭୁବନେଶ୍ବରରୁ ତପନ ଦାସ , ଇଟିଭି ଭାରତ
