ଭୁବନେଶ୍ବର: କୋରୋନାର ଦୁଇଟି ଲହରରେ ବହୁ ଲୋକ ପ୍ରଭାବିତ ହୋଇଛନ୍ତି । ଏପରି କି ଅନେକ ଜୀବନ ମଧ୍ୟ ଗଲାଣି । ଏଭଳି ସ୍ଥିତିରେ ତୃତୀୟ ଲହରକୁ ଏଡ଼ାଇ ଦିଆଯାଇ ନ ପାରେ ବୋଲି ବିଶେଷଜ୍ଞମାନେ ମତ ଦେଉଛନ୍ତି । ସାମାଜିକ ଦୂରତା, ଠିକ ଭାବେ ମାସ୍କ ପରିଧାନ ହିଁ କୋରୋନା ପ୍ରଭାବରୁ ଦୂରେଇ ରଖିବାରେ ସହାୟକ ହେବ। କିନ୍ତୁ ଏହି ପାର୍ବଣରେ ଲୋକଙ୍କ ଭିଡ଼ ନିଶ୍ଚିତ ଭାବରେ 7 ରୁ 10 ଦିନ ମଧ୍ୟରେ ଏହାର ପ୍ରଭାବ ଦେଖାଇବ ବୋଲି ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର କହିଛନ୍ତି ।
ତାଙ୍କ ମତରେ, ପାର୍ବଣରେ ଯେଉଁଭଳି ଭାବରେ ଲୋକମାନେ ଭିଡ଼ ଜମାଇଥିଲେ, ଏହାର ପ୍ରଭାବ ନିଶ୍ଚିନ୍ତ ଭାବରେ ପକାଇବ। ଏନେଇ ସରକାର ପ୍ରସ୍ତୁତ ଅଛନ୍ତି। ଯଦି ସେଭଳି କିଛି ସଂକ୍ରମଣ ବଢିବାର ଆଶଙ୍କା ବଢେ, ତେବେ ସର୍ଭେଲାନ୍ସକୁ ଜୋରଦାର କରାଯିବ। ଗ୍ରାମାଞ୍ଚଳରେ ଆଶା ଓ ସହରାଞ୍ଚଳରେ ମୁନିସିପାଲିଟି କର୍ତ୍ତୃପକ୍ଷ କଡା ନଜର ରଖିଛନ୍ତି । ସେଭଳି କିଛି ସଂକ୍ରମଣର ଆଭାସ ଆସିଲେ ସର୍ଭେଲାନ୍ସ କରାଯିବ। ଯେଉଁମାନେ ବାହାରୁ ଆସୁଛନ୍ତି ସେମାନଙ୍କୁ ମଧ୍ୟ ଜିଲ୍ଲା ସ୍ତରରେ ଟ୍ରାକିଂ କରାଯାଉଛି।
ତେବେ କେଉଁଠି ସର୍ଭେଲାନ୍ସ ବଢ଼ାଯିବ ଏବଂ କଣ୍ଟେନମେଣ୍ଟ କରାଯିବ, ତାହା କଲେକ୍ଟରମାନେ ନିଷ୍ପତ୍ତି ନେବେ । ଅନ୍ୟପଟେ ଦେଖିବାକୁ ଗଲେ ଛୋଟ ଶିଶୁଙ୍କର ଗୁରୁତର ସଂଖ୍ୟା କମ ରହୁଛି। ଭେଣ୍ଟିଲେଟରରେ କୌଣସି ଶିଶୁ ନାହାନ୍ତି ବୋଲି କହିଛନ୍ତି ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
