ଭୁବନେଶ୍ବର: ଇନ୍ଦିରା ଆବାସ / ପ୍ରଧାନମନ୍ତ୍ରୀ ଆବାସ ଯୋଜନା ଓ ବିଜୁ ପକ୍କାଘର ଯୋଜନା ଭଳି ଦାରିଦ୍ର୍ୟ ଦୂରିକରଣ ଯୋଜନାରେ ଦୁର୍ନୀତି ଅଭିଯୋଗରେ ଗତ 2017ରୁ ଏପର୍ଯ୍ୟନ୍ତ 836ଜଣ ଅଫିସରଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଛି । ସେଥି ମଧ୍ୟରୁ 22ଜଣ ଅଧିକାରୀଙ୍କୁ ଚାକିରିରୁ ଅପସାରଣ କରାଯାଇଥିବାବେଳେ 35ଜଣଙ୍କ ବିରୋଧରେ ଚିଠା ଚାର୍ଜ ଦାଖଲ ହୋଇଛି । 79ଜଣ ଅଧିକାରୀ ଦୁର୍ନୀତି ଅଭିଯୋଗରେ ନିଲମ୍ବିତ ହୋଇଛନ୍ତି ।
268ଜଣ ଅଧିକାରୀଙ୍କୁ କାହିଁକି ଚାକିରିରୁ ଅପସାରଣ କରାଯିବ ନାହିଁ ସେନେଇ କାରଣ ଦର୍ଶାଅ ନୋଟିସ ଜାରି କରାଯାଇଥିବାବେଳେ 432ଜଣ ଅଧିକାରୀଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି । ଆଜି(ମଙ୍ଗଳବାର) କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜାଙ୍କ ଅତ ଅଣତାରକା ପ୍ରଶ୍ନର ଉତ୍ତରରେ ପଞ୍ଚାୟତିରାଜ ମନ୍ତ୍ରୀ ପ୍ରତାପ ଜେନା ବିଧାନସଭାରେ ଏହି ସୂଚନା ଦେଇଛନ୍ତି ।
ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୋଧରେ ହୋଇଥିବା କାର୍ଯ୍ୟାନୁଷ୍ଠାନରେ ଯାଜପୁର ସବୁଠୁ ଆଗରେ ରହିଛି । ଯାଜପୁରରେ ସର୍ବାଧିକ 162ଜଣ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଛି । ନବରଙ୍ଗପୁରରେ 89 ଓ ନୂଆପଡାରେ 81ଜଣ ଅଫିସରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଭଦ୍ରକରେ 61 ଓ ଢେଙ୍କାନାଳରେ 60ଜଣ ଅଫିସର ଦୁଇ ବର୍ଷରେ ଦୁର୍ନୀତି ଅଭିଯୋଗର ଶିକାର ହୋଇଛନ୍ତି । ସେମାନଙ୍କ ବିରୋଧରେ ସରକାରୀ କାର୍ଯ୍ୟାନୁଷ୍ଠାନ ପ୍ରକ୍ରିୟା ଆରମ୍ଭ ହୋଇଛି ।
ଭୁବନେଶ୍ବରରୁ ଅଜିତ ଦାଶ, ଇଟିଭି ଭାରତ
