ଭୁବନେଶ୍ବର: ରାଜ୍ୟରେ କୋରୋନା ପ୍ରଭାବ ବଢି ଚାଲିଥିବା ବେଳେ ଗତ 24 ଘଣ୍ଟାରେ ଏହାର ପ୍ରଭାବରେ ଗଡିଛି 12 ମୁଣ୍ଡ । ଏହାକୁ ମିଶାଇ ରାଜ୍ୟରେ ମୋଟ ମୃତ୍ୟୁ ସଂଖ୍ୟା 247ରେ ପହଞ୍ଚିଛି । ସେପଟେ ଗଞ୍ଜାମରେ କୋରୋନା ପ୍ରଭାବ ଲଗାତାର ବଢି ଚାଲିଥିବା ମଧ୍ୟ ଦେଖାଯାଉଛି । ଯାହା ଜିଲ୍ଲା ପ୍ରଶାସନର ଚିନ୍ତା ଦ୍ବିଗୁଣିତ କରିଛି ।
ସୂଚନା ମୁତାବକ ରାଜ୍ୟରେ ଗଡିଥିବା 12 ମୁଣ୍ଡ ମଧ୍ୟରେ ଗଞ୍ଜାମରେ ସର୍ବାଧିକ 3 ଜଣଙ୍କ ମୃତ୍ୟୁ ହୋଇଛି । ସେପଟେ ମୟୂରଭଞ୍ଜରେ ଜଣେ 55 ବର୍ଷୀୟ ପୁରୁଷ, କେନ୍ଦ୍ରାପଡାରେ ଜଣେ 36 ବର୍ଷୀୟ ଯୁବକ, ସମ୍ବଲପୁରରେ ଜଣେ 78 ବର୍ଷୀୟ ବୃଦ୍ଧା, ଭଦ୍ରକରେ 55 ବର୍ଷୀୟ ପୁରୁଷ, ଢେଙ୍କାନାଳରେ 61 ବର୍ଷୀୟ ବୃଦ୍ଧ, ସୁନ୍ଦରଗଡରେ ଜଣେ 77 ବର୍ଷୀୟ ବୃଦ୍ଧ ଓ ସୁନ୍ଦରଗଡରେ ଜଣେ 66 ବର୍ଷୀୟ ବୃଦ୍ଧଙ୍କର ମୃତ୍ୟୁ ହୋଇଥିବା ଜଣା ପଡିଛି । ଏଥିସହ ଗଜପତିରେ ଜଣେ 34 ବର୍ଷୀୟ ଯୁବକଙ୍କର ମଧ୍ୟ ମୃତ୍ୟୁ ହୋଇଥିବା ଜଣା ପଡିଛି ।
ପ୍ରକାଶ ଥାଉ କି ରାଜ୍ୟରେ ଗତ 24 ଘଣ୍ଟା ମଧ୍ୟରେ ସର୍ବାଧିକ 1833 କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ଏମାନଙ୍କ ମଧ୍ୟରୁ କ୍ବାରେଣ୍ଟାଇନ ସେଣ୍ଟରରୁ 1,118 ଓ ସ୍ଥାନୀୟ ଅଞ୍ଚଳରୁ 715 ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିସହ ରାଜ୍ୟରେ ମୋଟ ଆକ୍ରାନ୍ତ ସଂଖ୍ୟା 42,550ରେ ପହଞ୍ଚିଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
