ଭୁବନେଶ୍ବର: କୋମାରେ କଞ୍ଜରଭେନ୍ସି ଲେନ । କେଉଁଠି ଗଛଲତା ମାଡିଗଲାଣି ତ କେଉଁଠି ଜବରଦଖଲରେ ରହିଛି ଲେନ । କେଉଁଠି ଡ୍ରେନ ହୋଇଯାଇଛି ତ କେଉଁଠି ଲୋକେ ଘର କଲେଣି । ଏପରି ଦୟନୀୟ ସ୍ଥିତିରେ ରହିଛି ଭୁବନେଶ୍ବରର କଞ୍ଜରଭେନ୍ସି ଲେନ ।
80 ଦଶକରେ ରାଜଧାନୀରେ ଗଢି ଉଠିଥିବା ସରକାରୀ କ୍ବାର୍ଟସ କଲୋନୀ ମଧ୍ୟରେ ବାୟୁ ଚଳାଚଳ ତଥା ବୃକ୍ଷରୋପଣ ଲକ୍ଷ୍ୟରେ ଦୁଇଟି ଲେନ ମଧ୍ୟରେ କିଛି ଫାଙ୍କା ଜାଗା ରଖାଯାଇଥିଲା, ଯାହାକୁ କଞ୍ଜରଭେନ୍ସି ଲେନ କୁହାଯାଏ । ହେଲେ ତାହା ଏବେ ବାଟବଣା ହୋଇଛି ।
ଖାଲି ସେତିକି ନୁହେଁ କଞ୍ଜରଭେନ୍ସି ଲେନରେ ଏବେ ଅଳିଆର ପାହାଡ ଦେଖିବାକୁ ମିଳୁଛି । ଯାହାକୁ ଲକ୍ଷ୍ୟ କରି ସରକାରଙ୍କ ଏପରି ଅନେକ ଯୋଜନା କେବଳ ଖାତା କଲମରେ ସୀମିତ ରହୁଛି । ପ୍ରକୃତରେ ତାହାର କୌଣସି କାର୍ଯ୍ୟକାରିତା ଦେଖିବାକୁ ମିଳୁନାହିଁ ବୋଲି କୁହାଯାଉଛି ।
ସେପଟେ କଞ୍ଜରଭେନ୍ସି ଲେନକୁ ଏବେ ପାର୍କିଂରେ ପରିଣତ କରାଯିବ । ଏହାସହ କିଛି ସ୍ଥାନରେ ବୃକ୍ଷରୋପଣ କରାଯିବ ସହିତ ସ୍ବଚ୍ଛତା ଉପରେ ଧ୍ୟାନ ଦିଆଯିବ ବୋଲି ବିଏମସି କହିଛି ।
ତେବେ ସ୍ମାର୍ଟ ସିଟି ଭାବେ ପରିଚିତ ହାସଲ କରିଥିବା ଭୁବନେଶ୍ବରର, କଞ୍ଜରଭେନ୍ସି ଲେନର ଏ ବିକଳ ଚିତ୍ର ଦେଖିଲେ ରାଜଧାନୀ କେତେ ସ୍ବଚ୍ଛ ତାହା ସ୍ପଷ୍ଟ ଜଣାପଡୁଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
