ଭୁବନେଶ୍ବର: କଂଗ୍ରେସର ସଚ୍ଚା ସିପାହୀ କୁହାଯାଉଥିବା ବରିଷ୍ଠ ବିଧାୟକ ସୁରେଶ ରାଉତରାୟଙ୍କ ଉପରେ ଏବେ ପିସିସି ମୁଖିଆଙ୍କ କୋପ ଦୃଷ୍ଟି ପଡ଼ିଛି । କଂଗ୍ରେସର ତୁଣ୍ଡ କୁହାଯାଉଥିବା ସୁର ରାଉତରାୟ ଜଣେ ଆଶାବାଦୀ ବ୍ୟକ୍ତିତ୍ବ । ରାଜ୍ୟ, ଜାତୀୟ ହେଉ କି ଅନ୍ତର୍ଜାତୀୟ, ସମସ୍ତ ପ୍ରସଙ୍ଗ ଉପରେ ନିଜର ମତ ରଖିବାକୁ ପଛାନ୍ତି ନାହିଁ ସୁରେଶ ରାଉତାରାୟ । କିଛି ମତକୁ ନାପସନ୍ଦ କରିଛନ୍ତି ପିସିସି ମୁଖିଆ । ଏଥିପାଇଁ ସୁରଙ୍କୁ କାରଣ ଦର୍ଶାଅ ନୋଟିସ ବି କରିବାକୁ ପଛାଇଲେନି । ଯାହାକୁ କ୍ଷୋଭ ପ୍ରକାଶ କରିବା ସହ ନୋଟିସର ଉତ୍ତର ରଖିଛନ୍ତି ଏହି ବରିଷ୍ଠ କଂଗ୍ରେସ ବିଧାୟକ ।
ଜୟଦେବ, ଶରତ, ତାରା, ସାଲୁଜା ବେଳେ କୋଉଠି ଥିଲା ନୋଟିସ ବୋଲି ପ୍ରଶ୍ନ କରିଛନ୍ତି ବରିଷ୍ଠ କଂଗ୍ରେସ ନେତା । କାରଣ ଦର୍ଶାଅ ନୋଟିସକୁ ନେଇ ପ୍ରତିକ୍ରିୟା ରଖିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ । ସେ କହିଛନ୍ତି ଯେ, "ମୁଁ କେବେ ସୁରଙ୍କ ଭଳି ନବୀନଙ୍କୁ ନେଇ ମନ୍ତବ୍ୟ ଦେଇନି। ଜୟଦେବ ଜେନାଙ୍କ କଥା ମୁଁ ଜାଣିନି । ବିଶୃଙ୍ଖଳିତ ଆଚରଣ ପାଇଁ ସୁରେଶ ରାଉତରାୟଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଏ ପ୍ରକ୍ରିୟା ଆରମ୍ଭ ହେଲା । ଯିଏ ବିଶୃଙ୍ଖଳିତ ହେବ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବା ଉଚିତ ।"
ଆଗରୁ କାହିଁକି କାହାରିକୁ ନୋଟିସ ହେଉନଥିଲା, ଏବେ କାହିଁକି କାର୍ଯ୍ୟାନୁଷ୍ଠାନ ନେଉଛନ୍ତି ପ୍ରଶ୍ନର ଉତ୍ତର ରଖି ନିରଞ୍ଜନ କହିଛନ୍ତି ଯେ, "ହନୁ ମଲାବେଳେ ସତ କହେ" । ଦଳର ସାଂଗଠନିକ ପରିବର୍ତ୍ତନକୁ ନେଇ ୩ ଦିନ ତଳେ ବିଧାୟକ ସୁର କହିଥିଲେ ଯେ, "ପିସିସି କିଏ ହେବ ? ପ୍ରଭାରୀ କିଏ ହେବ ତାହା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଇଛା ଅନୁସାରେ ହୁଏ ।" ଯାହାକୁ ନେଇ ଦଳର ଭାବମୂର୍ତ୍ତୀରେ ଆଞ୍ଚ ଆସିଥିବା ନେଇ ତାଙ୍କୁ କାରଣ ଦର୍ଶାଅ ନୋଟି କରାଯାଇଥିଲା ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
