ଭୁବନେଶ୍ବର: ମମିତା ମର୍ଡର କେସରେ ମହାଅଭିଯୋଗ ଆଣିଲେ କଂଗ୍ରେସ ନେତା ସତ୍ୟ ପ୍ରକାଶ ନାୟକ । ସାମ୍ବାଦିକ ସମ୍ମିଳନୀରେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଇସ୍ତଫା ଦାବି କରିବା ସହ 2013 ରେ କେମେଷ୍ଟ୍ରି ପେପର ଲିକ୍ ମାମଲାରେ ମହାଲିଙ୍ଗ ସନସାଇନ କଲେଜର ଲିଙ୍କ୍ ଥିବା ଅଭିଯୋଗ ଆଣିଛନ୍ତି ।
ସତ୍ୟ ପ୍ରକାଶ କହିଛନ୍ତି ଯେ, 'ସମସ୍ତେ ଜାଣନ୍ତି ଏହି ହତ୍ୟାକାଣ୍ଡରେ ମୁଖ୍ୟ ଅଭିଯୁକ୍ତ ଗୋବିନ୍ଦକୁ ମନ୍ତ୍ରୀ ଦିବ୍ୟଶଙ୍କର ମିଶ୍ର ଘଣ୍ଟ ଘୋଡାଇ ରଖିଥିଲେ । କାହିଁକି ନବୀନ ବାବୁ ତାଙ୍କୁ ବରଖାସ୍ତ କରୁନାହାନ୍ତି ? ନବୀନ ବାବୁ ଆଇ ଲଭ ୟୁ ଓ ଆଇ ହେଟ ୟୁ ଭିତରେ ଦ୍ଵନ୍ଦରେ ଅଛନ୍ତି । କଂଗ୍ରେସ ଦ୍ଵନ୍ଦରେ ପୂର୍ଣ୍ଣଚ୍ଛେଦ ପକାଇବ । 2013 ମସିହାରେ କେମିଷ୍ଟ୍ରି ପେପେର ଲିକ ହୋଇଥିଲା । ଏହାର ଚେର ମହାଲିଙ୍ଗ କଲେଜ ପର୍ଯନ୍ତ ଲମ୍ବିଥିଲା । ସେତେବେଳେ କ୍ରାଇମବ୍ରାଞ୍ଚ କହିଥିଲା ଏହା ପଛରେ ଏକ ରାକେଟ କାମ କରୁଛି ।' ଏଭଳି ଅନୁଷ୍ଠାନ ସହ ମନ୍ତ୍ରୀମାନେ କାହିଁକି ସମ୍ପର୍କ ରଖିଥିଲେ ବୋଲି ପ୍ରଶ୍ନ କରିଛନ୍ତି କଂଗ୍ରେସ ନେତା ସତ୍ୟପ୍ରକାଶ ।
ଏଥିସହ ସେ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ, ପଞ୍ଚାୟତରାଜ ବିଭାଗ ତରଫରୁ ନିର୍ମାଣ ନ ହୋଇଥିବା କଲେଜକୁ ସରକାରୀ ଅର୍ଥ ପ୍ରଦାନ କରାଯାଇଛି । ଯେଉଁଠି କଳାହାଣ୍ଡି ଜିଲ୍ଲାରେ 5 ହଜାରରୁ ଅଧିକ ସ୍କୁଲ ବିପଦ ସଙ୍କୁଳ ଅବସ୍ଥାରେ ଚାଲୁଛି । ଏଭଳି ସ୍ଥିତିରେ ଏହି ବେସରକାରୀ କଲେଜକୁ କାହିଁକି ଅର୍ଥ ଦିଆଯାଇଛି । ଆମର ଦାବି ହେଉଛି ଗୋବିନ୍ଦ ସାହୁ ମନ୍ତ୍ରୀଙ୍କୁ କେତେଥର ଫୋନ କରିଛନ୍ତି ତାର ଅନୁସନ୍ଧାନ ହେଉ ତା' ସହ ମନ୍ତ୍ରୀଙ୍କୁ ତଦନ୍ତ ପରିସରଭୁକ୍ତ କରାଯାଉ । ଗୋବିନ୍ଦ ସାହୁ କେତେଥର ମନ୍ତ୍ରୀଙ୍କୁ ଭେଟିବାକୁ ଲୋକସେବା ଭବନ ଆସିଛନ୍ତି ତା'ର ମଧ୍ୟ ତଦନ୍ତ ହେଉ ବୋଲି ସତ୍ୟପ୍ରକାଶ ଦାବି କରିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
