ଭୁବନେଶ୍ବର: ଟ୍ବିନସିଟିରେ ନୂଆ ମୁଖିଆଙ୍କ ନୂଆ ଯୋଜନା । ବର୍ଷକ ପରେ ଲୋକଙ୍କ କାମରେ ଆସେନା । ମୁଖିଆ ବଦଳିଲେ ଯୋଜନା ବଦଳେ । ସମସ୍ୟା ଆସିଲେ ପ୍ଲାନ୍ ତିଆରି ହୁଏ । ସମୟ ଗଡ଼ିଲେ ଯୋଜନା ବାଟବଣା ହୁଏ । ନା ଲୋକଙ୍କ କାମରେ ଆସେ, ନା ସହରବାସୀଙ୍କ ସମସ୍ୟା ସମାଧାନ ହୁଏ । ଟ୍ବିନିସିଟିର ଏମିତି କିଛି ଯୋଜନା ଲାଗୁ ହେବାପରେ ବନ୍ଦ ହୋଇଛି ପୂର୍ବରୁ ଲାଗୁଥିବା ଯୋଜନା । ଏହାରି ମଧ୍ୟରେ ସହରର ବିଗୁଡ଼ୁଥିବା ଅପରାଧ ପ୍ରତିଛବି ସୁଧାରିବା ପାଇଁ ପୋଲିସ ଖୋଜିଛି ବସ୍ତିର ସହାୟତା । ବସ୍ତିରେ ବନ୍ଧୁତ୍ବରେ ହାତ ବଢ଼ାଇବା ପାଇଁ ପୋଲିସ ମିତ୍ରଙ୍କ ସହାୟତା ନେଇଛି ।
ବସ୍ତିରେ ଅପରାଧ ଓ ଅପରାଧିକ କାର୍ଯ୍ୟକଳାପକୁ ରୋକିବାକୁ ବସ୍ତିର ବଛା ବଛା ଯୁବକଙ୍କୁ ପୋଲିସ ମିତ୍ର ନାଁରେ ତାଲିମ ଦେଉଛି ପୋଲିସ । OMCର ସହାୟତାରେ ଅନୁଦାନ ଯୋଗାଡ଼ କରି ନୂଆ ଯୋଜନାକୁ ଆପଣାଇଛି କମିଶନରେଟ ପୋଲିସ । ପ୍ରାଥମିକ ପର୍ଯ୍ୟାୟରେ ଭୁବନେଶ୍ବରର ବିଭିନ୍ନ ବସ୍ତିରେ ୧୦୦ ଜଣ ପୋଲିସ ମିତ୍ରଙ୍କୁ ତାଲିମ ଦେଇ ଯୋଜନାର ଶୁଭାରମ୍ଭ କରିଛନ୍ତି ପୋଲିସ କମିଶନର ଓ ଭୁବନେଶ୍ୱର ଡିସିପି । ଭୁବନେଶ୍ଵରରେ ଅପରାଧ ନିୟନ୍ତ୍ରଣ ଭିଜନ ନେଇ ଏହି ପଦକ୍ଷେପ ନିଆଯାଇଛି । ଅପରାଧ ମୁକ୍ତ ପାଇଁ ଏମାନେ ପୋଲିସକୁ ସହଯୋଗ କରିବେ ।
ବନ୍ଧୁତ୍ବର ହାତ ବଢାଇ ବସ୍ତିରେ ତିଆରି କରିବେ ବନ୍ଧୁତ୍ବର ପରିବେଶ । ବସ୍ତିରେ ନିଶା କାରବାର ଉପରେ ରୋକ ଲଗାଇବା ଏହାର ମୂଳ ଲକ୍ଷ୍ୟ । ଅପରାଧିକ କାର୍ଯର ଷଡ଼ଯନ୍ତ୍ରକାରୀ ଓ ଅପରାଧ କାର୍ଯ୍ୟକଳାପ ଉପରେ ନଜର ରଖିବେ ପୋଲିସ ମିତ୍ର । ପ୍ରାଥମିକ ପର୍ଯ୍ୟାୟରେ 100ଜଣଙ୍କୁ ଗୁରୁମନ୍ତ୍ର ଦେଲେ ପୋଲିସ କମିଶନର ଓ ଭୁବନେଶ୍ଵର ଡିସିପି । ସେମାନଙ୍କୁ ସ୍ୱତନ୍ତ୍ର ଟି-ସାର୍ଟ, ଆଇ କାର୍ଡ ଦେବା ସହ ସାମାଜିକ ଦାୟିତ୍ୱର ତାଲିମ ଦେଇ ଏହି ଅଭିଯାନର ଶୁଭାରମ୍ଭ କରିଛନ୍ତି । ଏହିଭଳି ଭାବରେ ୧ ହଜାର ଜଣ ଯୁବକଙ୍କୁ ତାଲିମ ଦେବାକୁ ଯୋଜନା ହୋଇଛି ।
ହେଲେ କମିଶନରେଟ ପୋଲିସର ଇତିହାସ କହୁଛି ପୂର୍ବରୁ ଅନେକ ପୋଲିସ କମିଶନରଙ୍କ ସମୟରେ ଲାଗୁ ହୋଇଛି ଅନେକ ଯୋଜନା । ହେଲେ ମୁଖିଆ ବଦଳିଲେ ଯୋଜନା ବାଟବଣା ହେଉଛି । ହେଲେ ନା ଏହା ଲୋକଙ୍କ ସ୍ବାର୍ଥରେ ଆସୁଛି ନା ସହରବାସୀ ଏହାଦ୍ବାରା ଉପକୃତ ହେଉଛନ୍ତି । କମିଶନରେଟ ପୋଲିସ ଗଠନର ୧୩ବର୍ଷ ପରେ ବି ସମାନ ଅବସ୍ଥା ଦେଖିବାକୁ ମିଳୁଛି । ରାସ୍ତାରେ ଭାଇଗିରି । କଲୋନୀରେ ଦାଦାଗିରି ଓ ବଟି ଆଦାୟ । ମହିଳା ସୁରକ୍ଷାରେ ବିଫଳ ପୋଲିସ । ମୁଖିଆଙ୍କ ପାଖେ ଅନେକ କାର୍ଯ୍ୟାନୁଷ୍ଠାନ ନେଲା ଭଳି କ୍ଷମତା ଥିଲେ ବି ଏହା କାର୍ଯକାରୀ ହେଉନି ।
ପୂର୍ବତନ ପୋଲିସ କମିଶନରଙ୍କ ସମୟରେ ଲାଗୁ ହୋଇଥିବା ଯୋଜନା ଏବେ କିପରି ବାଟବଣା ହୋଇଛି, ତାହାରି ଉପରେ ନଜର ପକାନ୍ତୁ ।
ପିଙ୍କ୍ ଅଟୋ
ବହୁ ଚର୍ଚ୍ଚିତ ନିର୍ଭୟା ଗଣ ଦୁଷ୍କର୍ମ ଘଟଣା ପରେ ୨୦୧୩ ମସିହା ଜୁନ ୨୭ ତାରିଖରେ ସହରର ମହିଳାଙ୍କ ଯାତ୍ରା ସୁରକ୍ଷିତ ପାଇଁ ଆରମ୍ଭ ହୋଇଥିଲା ପିଙ୍କ ଅଟୋ ସେବା । ୩୦୦ ଅଟୋରେ ପିଙ୍କ୍ ଅଟୋ ଲେଖି କେବଳ ମହିଳାଙ୍କ ସୁରକ୍ଷିତ ଯାତ୍ରା ପାଇଁ ଲାଗୁ ହୋଇଥିଲା ଏହି ସେବା । ତାହା ଏବେ ପୁରା ଅଚଳ ନା ଏଥିପ୍ରତି ଧ୍ୟାନ ଦେଉଛନ୍ତି ଏବେକାର ଅଫିସର ।
ଆଇକ୍ଲିକ ସର୍ଭିସ
୨୦୧୪ ମସିହା ଜାନୁଆରି ୨୮ ତାରିଖରେ ଆଇ କ୍ଲିକ ସର୍ଭିସ ଲାଗୁ ହୋଇଥିଲା । ଏହାଦ୍ବାରା ମହିଳାମାନେ ଏକ ଏଟିଏମ କେନ୍ଦ୍ରକୁ ଯାଇ ଏକ ମେସିନରେ ନିଜ ଅଭିଯୋଗ ଫାଇଲ କରିବା ସୁବିଧା ରହିଥିଲା । ଶହୀଦନଗର ବ୍ୟାଙ୍କ ଅଫ୍ ବରୋଦା ଏଟିଏମ ପରିସରରେ ଏହି ଯୋଜନା ଆରମ୍ଭ ହୋଇଥିଲା । ତାହା ମଧ୍ୟ ଏବେ ଅଚଳ ହୋଇଯାଇଛି ।
ମୋ ସାଥି ଆପ୍
ତତ୍କାଳିନ ପୋଲିସ କମିଶନର ଆର.ପି ଶର୍ମାଙ୍କ ସମୟରେ ଆରମ୍ଭ ହୋଇଥିଲା ମୋ ସାଥି ଆପ ଯୋଜନା । ୨୦୧୫ ମସିହା ମେ' ମାସ ୧୫ ତାରିଖରେ ମହିଳାଙ୍କୁ ତୁରନ୍ତ ସହାୟତା ପାଇଁ ଏହି ଆପ୍ରେ ରହିଥିଲା ଏମରଜେନ୍ସି କଣ୍ଟାକ୍ଟ ସୁବିଧା । ଅର୍ଥାତ ଏହି ଆପ୍ ଇନ୍ଷ୍ଟଲ୍ କଲେ ଯଦି କୌଣସି ସମୟରେ ପୋଲିସ ସହାୟତା ଆବଶ୍ୟକ ପଡ଼େ, ତେବେ ମୋବାଇଲର କୌଣସି ବଟନକୁ ୫ ଥର ପ୍ରେସ୍ କଲେ ପୋଲିସ ସହାୟତା କେନ୍ଦ୍ର କଣ୍ଟ୍ରୋଲ ରୁମକୁ ଏକ କଲ୍ ଆପେଆପେ ଲାଗିଯାଏ । ଫଳରେ ମହିଳାଙ୍କ ଲୋକେସନ ଟ୍ରେସ୍ କରି ସମସ୍ୟାରେ ପଡିଥିବା ମହିଳାକୁ ସହଯୋଗ କରିଥାଏ ପୋଲିସ । ହେଲେ ଏହି ଯୋଜନା ମଧ୍ୟ ବାଟବଣା ହେଲା । ୨୧୯ ବେଳକୁ ସହାୟତା ଆପ୍ ସହ ଯୋଡ଼ି ହୋଇଛି କହି ଏବେ ସେହି ଆପର ଯେଉଁଥିପାଇ ହୋଇଥିଲା ତାହା ସେତେଟା ଫଳପ୍ରଦ ହେଉନି ।
ଅଟୋମେଟେଡ ଟ୍ରାଫିକ କଣ୍ଟ୍ରୋଲ୍
୨୦୧୮ ମସିହା ଜୁଲାଇ ମାସରେ ତତ୍କାଳିନ କମିଶନର ଓ୍ବାଇବି ଖୁରାନିଆଙ୍କ ସମୟରେ ଟ୍ବିନ୍ ସିଟିରେ ଲାଗୁ ହେଲା ଅଟୋମେଟେଡ ଟ୍ରାଫିକ୍ ସିଷ୍ଟମ୍ । ଅର୍ଥାତ ଟ୍ରାଫିକ ଭିଡ ଦେଖି ଆପେ ଆପେ ଗ୍ରିନ ସିଗନାଲ ଆସିବ । ତାସହିତ ଗୋଟିଏ ଟ୍ରାଫିକରୁ ଆଉ ଏକ ଟ୍ରାଫିକ ନିର୍ଦ୍ଧାରିତ ବେଗରେ ଗଲେ କେବଳ ଗ୍ରିନ୍ ସିଗ୍ନାଲ ଆସିବ ବା ଗ୍ରିନ୍ କରିଡର ଭଳି ସିଗ୍ନାଲ ଦେବ । ହେଲେ କିଛିଦିନ ପରେ ଏବେ ଏହା ଅଟୋମେଟେଡରୁ ମାନୁଆଲ୍ ଭଳି କାମ କରୁଛି । ଦୀର୍ଘଦିନ ଧରି ଏବେ ଶିଶୁଭବନ ଛକରେ ଗ୍ରିନ୍ ଲାଇଟ କାମ କରୁନି, ତାହାକୁ ନେଇ ଅଧିକାରୀଙ୍କ ପାଖରେ ଖବର ନାହିଁ । ଟ୍ରାଫିକ କଣ୍ଟ୍ରୋଲ କରିବା ଏବେ ସାଙ୍ଘାତିକ ହୋଇଛି ।
କ୍ନୋ ୟୁୟର ପୋଲିସ
୨୦୧୮ମସିହା ସେପ୍ଟେମ୍ବର ୮ତାରିଖରେ ତତ୍କାଳିନ ପୋଲିସ କମିଶନର ସତ୍ୟଜିତ ମହାନ୍ତିଙ୍କ ସମୟରେ ଲାଗୂ ହୋଇଥିଲା କ୍ନୋ ୟୁୟର ପୋଲିସ ସିଷ୍ଟମ । ସହରର ସ୍କୁଲ ଛାତ୍ରଛାତ୍ରୀଙ୍କୁ ଥାନାକୁ ଆଣି ପୋଲିସ କଣ କରେ ସେ ସମ୍ପର୍କରେ ଜଣାଇବା ପାଇଁ ଏହି ଯୋଜନା ଆରମ୍ଭ କରିଥିଲେ କମିଶନର । ସମାଜରେ କିଛି ଅପରାଧିକ କାର୍ଯ୍ୟ ଘଟିଲେ ସ୍କୁଲର ଛାତ୍ରଛାତ୍ରୀ ଭାବରେ କର୍ତ୍ତବ୍ୟ ସମ୍ପର୍କରେ ଜଣାଇବା ଥିଲା ଏହାର ମୂଳ ଉଦ୍ଦେଶ୍ୟ । ହେଲେ ତାହା ମଧ୍ୟ ଏବେ କାମରେ ଆସୁନି ।
ଆପୋସ ବ୍ୟବସ୍ଥା
୨୦୧୯ ମସିହା ଫେବୃଆରି ମାସ ତତ୍କାଳିନ କମିଶନର ସତ୍ୟଜିତ ମହାନ୍ତି ଲାଗୁ କରିଥିଲେ ଆପୋସ ଯୋଜନା । ବସ୍ତିର ଯୁବପିଢିଙ୍କ ସହ ଯୋଡ଼ି ହୋଇ କିଭଳି ବସ୍ତି ଅପରାଧ ନିୟନ୍ତ୍ରଣ ହୋଇପାରିବ ତାହା ଥିଲା ଏହାର ମୂଳ ଉଦ୍ଦେଶ୍ୟ । ଏହି ବ୍ୟବସ୍ଥାରେ ଖେଳ ଉପକରଣ ବାଣ୍ଟିବା ସହ ବିଭିନ୍ନ କାର୍ଯ୍ୟକ୍ରମ ଜରିଆରେ ଯୋଡି ହେବାକୁ ପ୍ରୟାସ କରାଯାଇଥିଲା । ହେଲେ ତାହା ବାଟବଣା ହୋଇ ଏବେ ନୂଆ ଯୋଜନା ଆସିଛି ବସ୍ତି ଚାଲ ଅଭିଯାନ ।
ମହିଳା SPO
୨୦୨୦ ମସିହା ତତ୍କାଳିନ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀଙ୍କ ସମୟରେ ଲାଗୁ ହୋଇଥିଲା ମହିଳା SPO ଯୋଜନା । ସହରରେ ମହିଳା ସୁରକ୍ଷାକୁ ନେଇ କିଛି କର୍ପୋରେଟ ହାଉସ ଶିକ୍ଷାନୁଷ୍ଠାନର ଯୁବତୀ, ମହିଳାଙ୍କୁ SPO ଭାବେ ନିଯୁକ୍ତ କରିଥିଲେ । ପୋଲିସର ଆଖି କାନ ସାଜି କିପରି ଅପରାଧ ଉପରେ ନଜର ରଖିବେ ତାହା ଏହାର ମୂଳ ଲକ୍ଷ୍ୟ । କିନ୍ତୁ ଅପରାଧ ହେବା ସତ୍ତ୍ବେ କାମ ଦେଲାନି ଯୋଜନା । ଲୁଟ ଓ ଛିନତାଇ ସହ କର୍ମସ୍ଥଳୀରେ ଅସଦାଚରଣ ଶିକାର ହେଲେ ମହିଳା । ଏହି ଯୋଜନା ଏବେ ବାଟବଣା ହୋଇଛି ।
ଦାଦାବଟିକୁ ନା
ସହରରେ ଦାଦାବଟି ଆଦାୟ ଉପରେ ରୋକ ଲଗାଇବାକୁ ସୁଧାଂଶୁ ଷଡ଼ଙ୍ଗୀଙ୍କ ସମୟରେ ଅକ୍ଟୋବର ୨୦୨୦ ରେ ଲାଗୁ ହୋଇଥିଲା ଦାଦାବଟି କୁ ନା ଅଭିଯାନ । ପୂଜା ପୂର୍ବରୁ ଓ ପେସାଗତ ଅପରାଧିଙ୍କୁ ଏହି ଯୋଜନା ଜରିଆରେ ଗିରଫ କରିବାକୁ ସଫଳ ହୋଇଥିଲା ଏହି ଯୋଜନା । ହେଲେ ମୁଖିଆଙ୍କ ବଦଳି ପରେ ତାହା ବେକାବୁ ହୋଇ ଏବେ ଖୁଲମଖୁଲା ଦାଦାବଟି ଆଦାୟ ହେଉଛି । ଏହାସତ୍ତ୍ବେ ଦାଦାବଟି ଆଦାୟକୁ ନେଇ ଆକ୍ରମଣର ଅନେକ ଭିଡିଓ ଭାଇରାଲ ହେଉଛି । ଦାଦବଟି ମାମଲା ଲଗାଇବାକୁ ଏବେ ପୋଲିସ ପଛଘୁଞ୍ଚା ଦେଉଛି ।
ଯୋଜନା ଏବେ ବାଟବଣା ହୋଇଥିବାବେଳେ ଏବେକାର କମିଶନର କହିଛନ୍ତି ଏବେବି ଦାଦାବଟି ବିରୋଧରେ ଜାରି ରହିଛି ଜିରୋ ଟଲେରାନ୍ସ ପଲିସି । ତେବେ ଗୋଟିଏ ପରେ ଗୋଟିଏ ଯୋଜନା ଆସୁଛି, ହେଲେ ଏହା ଲୋକଙ୍କ କାମରେ ଆସିବ ନା ପୁଣି ପୂର୍ବଭଳି ଏବେକାର ଯୋଜନା ବାଟବଣା ହେବ, ତାହାରି ଉପରେ ନଜର ରଖିଛନ୍ତି ସହରବାସୀ ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
