ଭୁବନେଶ୍ବର: ଚପିଯାଉଛି ମାମଲା । ଦବିଯାଉଛି ତଦନ୍ତ । ଅନଫିଟ କମିଶନରେଟ ପୋଲିସ ଅଫିସର । ଥାନାଠୁ ଆରମ୍ଭ କରି ପୋଲିସ କମିଶନର । ଗୁରୁତ୍ବ ଦେଉନାହାନ୍ତି ବରିଷ୍ଠ ଅଫିସର । କମିସନରେଟ ପୋଲିସର କାର୍ଯ୍ୟଦକ୍ଷତାକୁ ନେଇ ଉଠୁଛି ପ୍ରଶ୍ନ ।
ଗତ ମାସେ ମଧ୍ୟରେ ରାଜଧାନୀରେ ଘଟିଛି ଚାଞ୍ଚଲ୍ୟକର ହତ୍ୟା ଓ ଆତ୍ମହତ୍ୟା ଘଟଣା । ହେଲେ ତଦନ୍ତର ଖିଅ ପାଉନାହାନ୍ତି କମିଶନରେଟ ପୋଲିସର ଦକ୍ଷ ଅଫିସର । ପାରିପାର୍ଶ୍ବିକ ସ୍ଥିତି ପରିବାର ଲୋକଙ୍କ ଅଭିଯୋଗ ସତ୍ତ୍ବେ ମଧ୍ୟ ଘଟଣାର ପର୍ଦ୍ଦାଫାସ ପାଇଁ ପଛଘୁଞ୍ଚା ଦେଉଛନ୍ତି ଅଫିସର ।
ଘଟଣା ନମ୍ବର - 1
ତାରିଖ ଅକ୍ଟୋବର 27 । ଏୟାର ଫିଲଡ ଥାନା ଏକାମ୍ର କଲେଜ କଡରେ ଦିପାବଳୀରେ ଅମରେଶ ନାୟକକୁ ହତ୍ୟା କଲେ ଦୁର୍ବୁତ୍ତ । ଅଭିଯୁକ୍ତଙ୍କ ତଥ୍ୟ ସହ ଥାନାରେ ଏତଲା ଦିଆଯାଇଥିଲେ ବି ଗିରଫ ହୋଇପାରୁନାହାନ୍ତି ଅଭିଯୁକ୍ତ । ସେପଟେ ପଲଟିକାଲ ଲିଙ୍କ ଥିବା ନେଇ ଗିରଫ କରିବାକୁ ପଛଘୁଞ୍ଚା ଦେଉଥିବା ଅଭିଯୋଗ କରିଛନ୍ତିତ ମୃତ ଅମରେଶ ନାୟକଙ୍କ ସାଙ୍ଗ ।
ଘଟଣା ନମ୍ବର -2
ଅକ୍ଟୋବର 24 ତାରିଖ । ଖଣ୍ଡଗିରି ଥାନା ଏମସ ହସପିଟାଲର କ୍ଲାସ ରୁମରୁ ସିକ୍ୟୁରିଟି ଗାର୍ଡ ସନ୍ତୋଷ ନାୟକଙ୍କ ଉଦ୍ଧାର ହୋଇଥିଲା ଝୁଲନ୍ତା ମୃତଦେହ । ହେଲେ ଏହି ମୃତ୍ୟୁ ପଛର ରହସ୍ୟ ଏବେବି ଅସ୍ପଷ୍ଟ ।
ଘଟଣା ନମ୍ବର - 3
ଅକ୍ଟୋବର 21 ତାରିଖ । ଜଟଣୀ ଥାନା ଅନ୍ତର୍ଗତ ଆଇଆଇଟି କ୍ୟାମ୍ପସରୁ ମିଳିଥିଲା ଛାତ୍ରଙ୍କ ମୃତଦେହ । ଛାତ ଉପରୁ ପଡି ଛାତ୍ରଙ୍କ ମୃତ୍ୟୁ ହୋଇଥିବା ପୋଲିସ ଦେଇଥିଲା ରିପୋର୍ଟ । ହେଲେ ଛାତ ଉପରୁ ଡେଇଁ ଆତ୍ମହତ୍ୟା କରିଥିଲେ ନା ତାଙ୍କୁ କେହି ଠେଲି ହତ୍ୟା କରିଥିଲେ ତାହାର ମିଳିଲାନି ସୁରାକ । ଯଦି ଏହା ଆତ୍ମହତ୍ୟା ତେବେ ଏହା ପଛର କାରଣ କଣ ଏଯାଏ ସ୍ପଷ୍ଟ ହୋଇନାହିଁ ।
ଘଟଣା ନମ୍ବର - 4
ଅକ୍ଟୋବର 20 ତାରିଖ । ଧଉଳି ଥାନା ଅନ୍ତର୍ଗତ ସାମନ୍ତରାପୁରରୁ ମିଳିଥିଲା ଲେଡି ଆଡଭୋକେଟଙ୍କ ଝୁଲନ୍ତା ମୃତଦେହ । ଆତ୍ମହତ୍ୟା କରିଥିବା ପୋଷ୍ଟମର୍ଟମ ରିପୋର୍ଟ ଆସିଥିବା ବେଳେ ମୃତ୍ୟୁ ପୂର୍ବରୁ ପୁରୁଷ ବନ୍ଧୁଙ୍କ ସହ ଥିବା ପରିବାର ଲୋକେ କରିଥିଲେ ଅଭିଯୋଗ । ହେଲେ ପୁରୁଷ ବନ୍ଧୁ ବିକ୍ରମ ମିଶ୍ରଙ୍କୁ ଖୋଜିବାରେ ବିଫଳ ମାରିଲା ପୋଲିସ । ଯାହାକୁ ନେଇ ଅଟକି ରହିଛି ତଦନ୍ତ ।
ଘଟଣା ନମ୍ବର - 5
ଅକ୍ଟୋବର 13 ତାରିଖ । ସହୀଦନଗର ଥାନା ମହାବୀର ବସ୍ତିରେ ପ୍ରେମିକା ଘର ଆଗରୁ ବିଜେଡି ଛାତ୍ର ନେତା ଅବକାଶ ପାଇକରାୟଙ୍କ ମୃତଦେହ ମିଳିବା ଘଟଣାରେ ଜଣାପଡିଲାନି କାରଣ । ମୃତକ ବାପା ଏନେଇ ପ୍ରେମିକା ଓ ତାର ପରିବାର ବିରୋଧରେ ଅଭିଯୋଗ କରିଥିଲେ ମଧ୍ୟ ମିଳିଲାନି ମୃତ୍ୟୁର କାରଣ ।
ସେପଟେ ଏସବୁ ବିଷୟକୁ ଭିନ୍ନ ପ୍ରସଙ୍ଗ କହି ଏଡାଇ ଯାଇଛନ୍ତି ପୋଲିସ କମିଶନର । ତେବେ ରାଜଧାନୀର ଏହି ଚର୍ଚ୍ଚିତ 5 ଘଟଣା କମିଶନରେଟ ପୋଲିସର କାର୍ଯ୍ୟଦକ୍ଷତା ଉପରେ ଉଠାଇଛି ପ୍ରଶ୍ନ । ଯାହାର ଉତ୍ତରକୁ ଅପେକ୍ଷା କରିଛନ୍ତି ଓଡିଶାବାସୀ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
