ଭୁବନେଶ୍ବର: ସୀମା ଲଂଙ୍ଘିଲା ମାନବିକତା । ସାମାନ୍ୟ 10 ଟଙ୍କା ପାଇଁ ଭୁଲିଗଲା ହିତାହିତ ଜ୍ଞାନ । ଜଣେ 12 ବର୍ଷର ଶିଶୁ 10 ଟଙ୍କା ମାଗିବାରୁ ଚାଓମିନ ମାଲିକ ଦେଇଛି 10ଟି ଚେଙ୍କ । ରାଜଧାନୀର ଏୟାରଫିଲ୍ଡ ଥାନା ଅନ୍ତର୍ଗତ ଆଦିତ୍ଯନଗରର ବୋତଣ୍ଡାର ଚାଉମିନ ଫ୍ଯାକ୍ଟ୍ରିର ମାଲିକକୁ ଶିଶୁ ଶ୍ରମିକ ଭାବେ ପିଲାଙ୍କୁ ଖଟାଉଥିବା ଅଭିଯୋଗରେ ପୋଲିସ ଗିରଫ କରିଛି।
ଗିରଫ ହୋଇଥିବା ଅଭିଯୁକ୍ତ ଚାଓମିନ ମାଲିକ ଜଣକ ହେଲେ ରାହୁଲ କୁମାର । ସୂଚନା ମୁତାବକ, ରବିବାର ପ୍ରାୟ ଦିନ ୪ଟା ସମୟରେ ଶିଶୁ ଶ୍ରମିକ ଅଭିଯୋଗ ନେଇ ଚାଇଲ୍ଡ ଲାଇନକୁ ଖବର ମିଳିଥିଲା ।
ଜଣେ ଚାଉମିନ ଫ୍ଯାକ୍ଟ୍ରିର ମାଲିକ ୧୨ ବର୍ଷର ଶିଶୁକୁ ନିଜ ଫ୍ଯାକ୍ଟ୍ରିରେ କାମ କରାଇବା ସହ ନିର୍ଯ୍ୟାତନା ଦେଉଛନ୍ତି । ମାଲିକର ନିର୍ଯ୍ୟାତନା ଆଉ ସହ୍ଯ କରି ନପାରି ଶିଶୁଟି ଲୁଚି ପାଖ ପଡୋଶୀଙ୍କ ପାଖରେ କହିଥିଲା। ଏନେଇ ସବୁ ଜାଣିବା ପରେ ପଡୋଶୀ ଜଣକ ଚାଇଲ୍ଡ ଲାଇନକୁ ଖବର ଦେଇଥିଲେ ।
ପରେ ଚାଇଲ୍ଡ ଲାଇନ ପକ୍ଷରୁ ଶିଶୁଟିକୁ ଉଦ୍ଧାର କରି ପୋଲିସକୁ ଜଣାଇବା ପରେ ସମ୍ପୃକ୍ତ ଚାଉମିନ ଫ୍ଯାକ୍ଟ୍ରି ମାଲିକ ରାହୁଲ କୁମାରକୁ ଗିରଫ କରିଛି କମିସନରେଟ ପୋଲିସ। ତେବେ ଉଦ୍ଧାର ହୋଇଥିବା ପିଲାଟି ଝାରଖଣ୍ଡ ଅଞ୍ଚଳର ବୋଲି ଜଣାପଡିଛି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
