ଭୁବନେଶ୍ବର: ରାଜ୍ୟରେ କୋରୋନାର ଦ୍ବିତୀୟ ଲହର ଭୟଙ୍କର ହେଉଛି । କୋଭିଡ ସଂକ୍ରମଣ ରୋକିବା ଓ ପରିଚାଳନା ନେଇ ଗତକାଲି ସନ୍ଧ୍ୟାରେ ସ୍ଥିତିର ସମୀକ୍ଷା କରିଥିଲେ ମୁଖ୍ୟ ଶାସନ ସଚିବ ସୁରେଶ ମହାପାତ୍ର । ଭିଡିଓ କନଫରେନ୍ସି ଜରିଆରେ ସମସ୍ତ ଜିଲ୍ଲାପାଳ, ଏସପି, ମେଡିକାଲ କଲେଜ ଅଧ୍ୟକ୍ଷ, ସିଡିଏମଓ ଏବଂ ସମ୍ପୃକ୍ତ ଜିଲ୍ଲା ଅଧିକାରୀଙ୍କ ସହ ସେ ଆଲୋଚନା କରିଥିଲେ । ଏହାପରେ ନୂତନ କୋଭିଡ ବାବଦରେ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ।
କୋଭିଡ କେୟାର ସେଣ୍ଟରଗୁଡିକର କାର୍ଯ୍ୟକାରିତା, କୋଭିଡ କଟକଣା, ବଜାର ସ୍ଥାନ ବିସ୍ତାର, ସହରାଞ୍ଚଳରେ ରାତ୍ରିବନ୍ଦ, ସୀମାନ୍ତବର୍ତ୍ତୀ ଜିଲ୍ଲାର ସହରାଞ୍ଚଳରେ ସପ୍ତାହନ୍ତ ବନ୍ଦ, ଟେଷ୍ଟିଂ ବୃଦ୍ଧି, ଗୃହ ଏକାନ୍ତବାସ ଉପରେ ନଜର ରଖିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ବିଭିନ୍ନ ଜିଲ୍ଲାରେ କୋଭିଡର ମାଇକ୍ରୋ-ମ୍ୟାନେଜମେଣ୍ଟ, ବିଦ୍ୟାଳୟ, କଲେଜ, କୋଚିଂ ପ୍ରତିଷ୍ଠାନ ବନ୍ଦ ନେଇ ନିର୍ଦ୍ଦେଶ ଦିଆଯାଇଛି । ସେହିପରି କୋଭିଡ ମୁକାବିଲା କରିବାକୁ କ୍ୟୁଇକ ରେସ୍ପନ୍ସ ଟିମ ପ୍ରସ୍ତୁତ ରହିବାକୁ କୁହାଯାଇଛି । ଜିଲ୍ଲାପାଳମାନେ ବିପର୍ଯ୍ୟୟ ପରିଚାଳନା ଅଧିନିୟମ ଅନୁସାରେ, କୋଭିଡ କାର୍ଯ୍ୟ ପାଇଁ ବିଭିନ୍ନ ବିଭାଗର ଅଧିକାରୀଙ୍କୁ ନିୟୋଜିତ କରିବେ। ସମସ୍ତ ସରକାରୀ କର୍ମଚାରୀ ସମ୍ପୃକ୍ତ ଜିଲ୍ଲାର ଜିଲ୍ଲାପାଳଙ୍କ ସମ୍ପୂର୍ଣ୍ଣ ନିୟନ୍ତ୍ରଣରେ ରହିବେ ।
କୋଭିଡ ଡାକ୍ତରଖାନାରେ ଆଡମିଶନ ଏବଂ ଡିସଚାର୍ଜ ପାଇଁ ସିଡିଏମଓ ଏବଂ ଡାକ୍ତରୀ ଅଧିକାରୀଙ୍କୁ SOP ଅନୁସରଣ କରିବାକୁ ନିର୍ଦ୍ଦେଶ ରହିଛି। ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ କୁମାର ମହାପାତ୍ର ମଧ୍ୟ କୋଭିଡ ରୋଗୀଙ୍କ ରେଫରାଲ ସମ୍ବନ୍ଧରେ SOP ମାନଙ୍କୁ କଡାକଡି କରିବାକୁ ନିର୍ଦ୍ଦେଶ ଦେଇଛନ୍ତି । ସଂଗ୍ରହକାରୀମାନଙ୍କୁ ମଧ୍ୟ CCCରେ ଅମ୍ଳଜାନ ବ୍ୟବସ୍ଥା କରିବାକୁ ଏବଂ ସେଠାରେ ଥିବା ଗୁରୁତର ରୋଗୀଙ୍କୁ ଚିକିତ୍ସା କରିବାକୁ କୁହାଯାଇଛି ।
ଭୁବନେଶ୍ବରରୁ ଭବାନୀଶଙ୍କର ଦାସ, ଇଟିଭି ଭାରତ
