ଭୁବନେଶ୍ବର: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓଡ଼ିଶାର ସୀମା ବିବାଦର ଆପୋଷ ସମାଧାନ ନେଇ ଆନ୍ଧ୍ର ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବା ପରେ ସମସ୍ୟା ବାବାଦରେ କେନ୍ଦ୍ର ସରକାରଙ୍କ ହସ୍ତକ୍ଷେପ ଲୋଡିଲା କଂଗ୍ରେସ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କେନ୍ଦ୍ର ଗହମନ୍ତ୍ରୀଙ୍କୁ ସମସ୍ୟା ସମ୍ପର୍କରେ ଅବଗତ କରାଇବାର ଆବଶ୍ୟକତା ରହିଥିବା କହିଛନ୍ତି ଦଳର ମିଡିଆ ସେଲ ଅଧ୍ୟକ୍ଷ ଗଣେଶ୍ବର ବେହେରା ।
ଓଡ଼ିଶାର ସୀମା ବିବାଦ ବହୁ ପୁରୁଣା, ଖାଲି କୋଟିଆ ନୁହେଁ,ରାଜ୍ୟର ଚତୁପାର୍ଶ୍ବରେ ସୀମା ବିବାଦ ବଡ଼ ଜଟିଳ ଅବସ୍ଥାରେ ରହିଛି। ଦକ୍ଷିଣ ଓଡ଼ିଶାର କୋଟିଆ, ଗଜପତି ,ପଶ୍ଚିମବଙ୍ଗ, ଛତିଶଗଡ଼, ଝାରଖଣ୍ଡ ରାଜ୍ୟର ସୀମାରେ ବିବାଦ ଲାଗି ରହିଛି । ତେବେ ଏହାର ସମାଧାନ ହେବା ନେଇ ରାଜ୍ୟ ସରକାର ଆଇନଗତ ଲଢେଇ ଲଢ଼ୁଛନ୍ତି ବୋଲି ରାଜ୍ୟ ରାଜସ୍ୱ ମନ୍ତ୍ରୀ କହିଥିଲେ ।
ହେଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆନ୍ଧ୍ର ସରକାରଙ୍କୁ ସୀମା ବିବାଦର ଆପୋଷ ସମାଧାନ କରିବାକୁ ଚିଠି ଲେଖିବା ପରେ ବିରୋଧୀ ରାଜ୍ୟ ସରକାରଙ୍କୁ ଘେରିଛନ୍ତି । ଉଭୟ ରାଜ୍ୟ ଓ କେନ୍ଦ୍ର ସରକାର ଏଥିପାଇଁ ଦାୟୀ ବୋଲି କହିଛି କଂଗ୍ରେସ । ଧର୍ମେନ୍ଦ୍ର କେନ୍ଦ୍ର ଗୃହମନ୍ତ୍ରୀଙ୍କୁ ଏ ବିଷୟରେ ଅବଗତ କରେଇବାର ଆବଶ୍ୟକତା ରହିଛି । କେନ୍ଦ୍ର ସରକାରଙ୍କ ହସ୍ତକ୍ଷେପ ହେଲେ ହୁଏତ ସୀମା ବିବାଦର ତ୍ବରିତ ସମାଧାନ ହୋଇପାରେ।
ସୀମା ବିବାଦକୁ ନେଇ ଆନ୍ଧ୍ର ସରକାର ସବୁବେଳେ ଓଡିଶା ପ୍ରତି ନକରାତ୍ମକ ବ୍ୟବହାର କରୁଛନ୍ତି । ତେଣୁ ସୀମା ବିବାଦ ଖାଲି ଉଭୟ ରାଜ୍ୟ ଭିତରେ ସମାଧାନ ହେବା ଅପେକ୍ଷା କେନ୍ଦ୍ର ସରକାରଙ୍କ ମଧ୍ୟସ୍ଥି ଦ୍ୱାରା ସମାଧାନର ଆଶା ଆହୁରି ଉଜ୍ବଳ ହେବ ବୋଲି କହିଛନ୍ତି ଗଣେଶ୍ବର ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
