ଭୁବନେଶ୍ବର: ବହୁଚର୍ଚ୍ଚିତ ନାଗରିକ ସଂଶୋଧନ ବିଲ ସମର୍ଥନ ପଛରେ ବିଜେଡି ବିଜେପି ମଧ୍ୟରେ ହୋଇଛି କି ଡିଲ୍ । ଯାହାକୁ ନେଇ ସରଗରମ ହେଉଛି ରାଜ୍ୟ ରାଜନୀତି । ସମସ୍ତ କେନ୍ଦ୍ରୀୟ ବିଲ ସମେତ ଲୋକସଭାରେ CAB ବିଲକୁ ବିଜେଡିର ଆକୁଣ୍ଠ ସମର୍ଥନ ପରେ ଏଭଳି ଏକ ଚର୍ଚ୍ଚା ସାମ୍ନାକୁ ଆସିଛି ।
ବୁଧବାର CAB ବିଲକୁ ସମର୍ଥନ ପରେ ବିଜେଡି ସାଂସଦଙ୍କ ସହ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହାଙ୍କୁ ସାକ୍ଷାତ ଏହି ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି । ଅନ୍ୟପଟେ ବିଧାନ ପରିଷଦ ବିଲ ପାସ କରିବାକୁ ବିଜେଡି ବ୍ଲାକମେଲ୍ କରୁଛି ବୋଲି ଅଭିଯୋଗ କରିଛନ୍ତି ବିରୋଧୀ । ଯାହାର ଜବାବ ରଖିଛି ବିଜେଡି ।
ବିଜୁ ଜନତା ଦଳ ନିଜ ଦଳର ନେତା ମାନଙ୍କୁ ଥଇଥାନ କରିବା ନେଇ ଏଭଳି କରୁଛନ୍ତି ବୋଲି ବିରୋଧୀ ଅଭିଯୋଗ କରିଛନ୍ତି । ଖାସ ଏଥିପାଇଁ ଗୋଟିଏ ପରେ ଗୋଟିଏ କେନ୍ଦ୍ରୀୟ ବିଲକୁ ସମର୍ଥନ ଦେଉଛି ବିଜେଡି । ଏଭଳି ଅଭିଯୋଗ କରିଛନ୍ତି ଉଭୟ ବିଜେପି ଓ କଂଗ୍ରେସ । ତେବେ ବିଲକୁ ପ୍ରଥମେ ସମର୍ଥନ ଓ ପରେ ବିଧାନ ପରିଷଦ ସମ୍ପର୍କରେ ଆଲୋଚନା ହିଁ ଡିଲ୍କୁ ପ୍ରମାଣିତ କରୁଛି । ରାଜ୍ୟସରକାର ଥଇଥାନ ରାଜନୀତିରେ ମାତିଥିବା କହିଛନ୍ତି କଂଗ୍ରେସ ନେତା ସୁରେଶ କୁମାର ରାଉତରାୟ ।
ଅନ୍ୟପଟେ ରାଜ୍ୟ ବିଜେପି ପକ୍ଷରୁ ମଧ୍ୟରୁ ସମାନ ଧରଣର ଅଭିଯୋଗ ହୋଇଛି । ଏପରିକି ବିଧାନ ପରିଷଦ ପାଇଁ ବ୍ଲାକମେଲ କରୁଛି ବିଜେଡି ବୋଲି କହିଛନ୍ତି ବିଜେପି ନେତା ପ୍ରଦୀପ ପୁରୋହିତ । ଏହାର ଜବାବ ରଖିବାକୁ ଯାଇ ବିଜେଡି ବିଧାୟକ ନୃସିଂହ ସାହୁ କହିଛନ୍ତି କି, ବିଧାନ ପରିଷଦ ବିଲ କିଭଳି ପାରିତ ହେବ ସେନେଇ ସାସଂଦ ମାନେ କେନ୍ଦ୍ର ଗୃହମନ୍ତ୍ରୀଙ୍କ ସହ ଆଲୋଚନା କରିଛନ୍ତି । ପୂର୍ବରୁ ଏହି ବିଲ ସର୍ବସମ୍ମତି କ୍ରମେ ଲୋକସଭାରେ ପାସ ହୋଇସାରିଛି । ବିଧାନ ପରିଷଦ ହେଲେ ସବୁ ବର୍ଗର ଲୋକଙ୍କୁ ପ୍ରତିନିଧିତ୍ଵ କରିବାର ସୁଯୋଗ ମିଳିବ ।
ପ୍ରକାଶ ଯେ, ବିଧାନ ପରିଷଦ ଗଠନ ହେଲେ,ଏଥିରେ ୪୯ଜଣ ସଦସ୍ୟ ରହିବେ,ସେମାନଙ୍କ ମଧ୍ୟରୁ ୧୬ଜଣଙ୍କୁ ଜିଲ୍ଲା ପରିଷଦ, ପଞ୍ଚାୟତ ସମିତି ଓ ୟୁଏଲବି ସଦସ୍ୟ ମାନେ ନିର୍ବାଚିତ କରିବେ । ସେହିଭଳି ଆଉ ୧୬ଜଣଙ୍କୁ ବିଧାୟକ ମାନେ ନିର୍ବାଚିତ କରାଇବେ। ଏହା ବ୍ୟତୀତ ୯ଜଣଙ୍କୁ ରାଜ୍ୟପାଳ ମନୋନୀତ କରିବେ ।
ଭୁବନେଶ୍ବରରୁ ତପନ ଦାଶ, ଇଟିଭି ଭାରତ
