ଭୁବନେଶ୍ବର: ବ୍ରାଉନସୁଗାର ବେପାରୀ ସାଜିଲେ ବିଏମସିର ଠିକା କର୍ମଚାରୀ । ଛଦ୍ମବେଶରେ କମିସନରେଟ ପୋଲିସ ପହଞ୍ଚି ବ୍ରାଉନସୁଗାର ବେପାରୀ ବିଏମସି କର୍ମଚାରୀକୁ କାବୁ କରିଛି ।
ସୂଚନା ଅନୁଯାୟୀ ଅଭିଯୁକ୍ତ ଜଣଙ୍କ ହେଲେ ବିଏମସି ଅଫିସରେ ଠିକାରେ କାମ କରୁଥିବା ଚତୁର୍ଥଶ୍ରେଣୀ କର୍ମଚାରୀ ଦୀଲିପ କୁମାର ବେହେରା । ସେ ବିଏମସି ବ୍ଲଡବ୍ୟାଙ୍କ ନିକଟରେ ବ୍ରାଉନସୁଗାର ବେପାର ଚଳାଇଥିଲେ । ସୂଚନା ପାଇଁ ଗ୍ରାହକ ବେଶରେ ପହଞ୍ଚିଲା କମିସନରେଟ ପୋଲିସ । ବ୍ରାଉନସୁଗାର ଡିଲ ବେଳେ ସାଢେ ୭ ଗ୍ରାମର ବ୍ରାଉନସୁଗାର ସହ ହଣ୍ଡା ଆକ୍ଟିଭା ବାଇକ ଜବତ କରିଛି ପୋଲିସ । ତେବେ ସବୁଠୁ ବଡ କଥା ହେଉଛି ତାଙ୍କ ଗାଡିର ଡିକିରୁ ୭ଟି ବ୍ୟାଙ୍କ ଆକାଉଣ୍ଟ ପାସବୁକ ଜବତ କରାଯାଇଛି । ତା ସହିତ ୪୦ ଗ୍ରାମ ସୁନା ଯାହାର ଆନୁମାନିକ ମୂଲ୍ୟ ୨ ଲକ୍ଷ ଟଙ୍କା ସହ ନଗଦ ୪୦ ହଜାର ଟଙ୍କା ମଧ୍ୟ ଜବତ କରାଯାଇଛି ।
ଗିରଫ ପରେ ଅଭିଯୁକ୍ତକୁ କୋର୍ଟ ଚାଲାଣ କରାଯାଇଛି । ତେବେ ବିଭିନ୍ନ ପୁଡିଆ କରି ଔଷଧ ବାହାନାରେ ବ୍ରାଉନସୁଗାର ବିକୁଥିଲେ ଏହି କର୍ମଚାରୀ । ବିଭିନ୍ନ ପୁଡିଆ କରି ଏଭଳି ବେପାର କରୁଥିବାର ନେଇ ପୋଲିସ ସୂଚନା ପାଇ ଠିକଣା ସମୟରେ ଗିରଫ କରିଛି ।
ଭୁବନେଶ୍ବରରୁ ତାପସ ପରିଡା,ଇଟିଭି ଭାରତ
