ଭୁବନେଶ୍ବର: ଭୁବନେଶ୍ବର ଏସ୍ପ୍ଲାନେଡ ମଲରେ ଫୁଟିଲା ବୋମା । ସତସତିକା ନୁହେଁ, ମିଛିମିଛିକା। ପ୍ରାୟୋଜିତ ଭାବେ ଫୁଟାଯାଇଛି ଏହି ବୋମା । ଆଉ ବୋମା ଫୁଟିଲେ ବା କୌଣସି ପ୍ରକାର ବିସ୍ଫୋରଣ ଘଟିଲେ, ସେଥିରୁ କିପରି ଭାବେ ରକ୍ଷା ପାଇପାରିବେ ସେଥିପାଇଁ କରାଯାଇଛି ଏକ ମକ ଡ୍ରିଲ । ଏହି ମକଡ୍ରିଲ କରିଛନ୍ତି ଏନଡିଆରଏଫ, ଫାୟାର ସର୍ଭିସ, ସିଭଲ ଡିଫେନସ, ଓଡ୍ରାଫ ଟିମ ।
ଏହି ମକଡ୍ରିଲରେ ହଠାତ ବୋମା ଫୁଟିବା ପରେ ଫାୟାର ସର୍ଭିସ ଟିମ୍ ପହଞ୍ଚି ନିଜର କର୍ମଚାରୀଙ୍କ ଜରିଆରେ ନିଆଁ ଲିଭାଇବାକୁ ଉଦ୍ୟମ କରିଛନ୍ତି । ଅନ୍ୟପଟେ ଏଭଳି ଘଟଣା ଘଟିବା ପରେ ବେହୋସ ଲୋକଙ୍କୁ ମେଡିକାଲ ସ୍ଥାନାନନ୍ତର ପାଇଁ ପ୍ରୟାସ କରିଛନ୍ତି ଏନଡିଆରଏଫ ଟିମ୍ ।
ଏହାପରେ ଷ୍ଟ୍ରେଚର ସାହାଯ୍ୟରେ ଲୋକଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ହସପିଟାଲକୁ ପଠାଯାଇଛି । ପରେ ବୋମା ନିଷ୍କ୍ରିୟ ବା ଅନ୍ୟାନ୍ୟ ସ୍ଥାନରେ ବୋମା ବା ରାସାୟନିକ ପଦାର୍ଥ ଅନୁସନ୍ଧାନ କରିଛନ୍ତି ରାଡିଏସନ ଡିଟେକ୍ଟ ଟିମ୍ । ଏହାପରେ ମଲ ଭିତରେ କୌଣସି ସ୍ଥାନରେ ଏଭଳି ପଦାର୍ଥ ଥିବାର ଆଶଙ୍କାରେ ସନ୍ଧାନୀ କୁକୁରର ସହାୟତା ନିଆଯାଇଛି । ପରେପରେ ବୋମା ନିଷ୍କ୍ରିୟ ଟିମର ଛାନଭିନ ପରେ ଉଚ୍ଚ ବିଲ୍ଡିଂ ରେ ଥିବା ମୃତାହତଙ୍କୁ କିପରି ଉଦ୍ଧାର କରାଯାଏ ତାହାର ମଧ୍ୟ ମକଡ୍ରିଲ କରାଯାଇଛି ।
ତୁରନ୍ତ ଏଭଳି ଦୁର୍ଘଟଣାକୁ କିପରି ସମସ୍ତ ପ୍ରକାର ସାହାଯ୍ୟ ଦ୍ବାରା ସାଧାରଣ ଲୋକଙ୍କୁ ଏସମ୍ପର୍କରେ କିପରି ଅବଗତ କରାଯିବ ଓ କିଭଳି ଏଭଳି ସମ୍ବେଦନଶୀଳ ଘଟଣାକୁ ସାମ୍ନା କରିବା ସମୟରେ ଆବଶ୍ୟକୀୟ ଯନ୍ତ୍ରପାତିର ବ୍ୟବହାର କରାଯିବ ଏହି ଦିଗ ଉପରେ ଏକ ମକଡ୍ରିଲ କରାଯାଇଛି । ଯାହାଦ୍ବାରା ଏନଡିଆରଏଫ, ଫାୟାର ସର୍ଭିସ, କମିସନରେଟ ପୋଲିସ, ଓଡ୍ରାଫ, ସିଭିଲ ଡିଫେନସ ଆଦି କର୍ମଚାରୀଙ୍କ ମଧ୍ୟରେ କିଭଳି ସମନ୍ବୟ ହୋଇ ଏଭଳି ପରିସ୍ଥିତି ମୁକାବିଲା ହୋଇପାରିବ ସେ ଦିଗରେ ଫୋକସ ଦିଆଯାଇଛି।
ଭୁବନେଶ୍ବରରୁ ତାପସ କୁମାର ପରିଡା, ଇଟିଭି ଭାରତ
