ଭୁବନେଶ୍ବର: ଗୌରବମୟ ଓଡ଼ିଆ ନୌବାଣିଜ୍ୟ ପରମ୍ପରାର ସ୍ମୃତି ସ୍ବରୂପ ବୋଇତ ବନ୍ଦାଣ ଉତ୍ସବ ପାରମ୍ପରିକ ରୀତିନୀତି ସହିତ ବାହାରିନ ଓଡ଼ିଆ ସମାଜ ଦ୍ବାରା ପାଳିତ ହୋଇଯାଇଛି । ପବିତ୍ର କାର୍ତ୍ତିକ ପୂର୍ଣ୍ଣିମା ଶୁଭ ଅବସରରେ ବାହାରିନ ଓଡ଼ିଆ ସାମାଜର ପ୍ରତିଷ୍ଠାତା ସଭାପତି ଡ. ଅରୁଣ କୁମାର ପ୍ରହରାଜଙ୍କ ନେତୃତ୍ବରେ ପ୍ରବାସୀ ଓଡ଼ିଆ ଭାଇ ଭଉଣୀମାନେ ଅତ୍ୟନ୍ତ ଆନନ୍ଦ ଉଲ୍ଲାସର ସହିତ ଉତ୍ସବ ପାଳନ କରିଛନ୍ତି । ଆ-କା-ମା ବୈ ଲୋକଗୀତ ସହିତ କୋଣାର୍କ ଚକ୍ର, ଭାରତୀୟ ଜାତୀୟ ପତାକା, ପାନ ଗୁଆ, କଦଳୀପତ୍ର, ପୁଷ୍ପ ଓ ଆଲୋକରେ ସୁଶୋଭିତ ସ୍ମାରକ ବୋଇତକୁ ଧୂପ ଦ୍ବୀପ ସହିତ ଆରବ ସାଗରରେ ବନ୍ଦନା କରିଛନ୍ତି । ପରେ ପରେ ମାନମା ସ୍ଥିତ ଦୁଇଶହ ବର୍ଷ ପୁରାତନ ଶ୍ରୀନାଥଜୀ ମନ୍ଦିର ଦର୍ଶନ କରିଥିଲେ ।
ଏହି ଅବସରରେ ଉପସ୍ଥିତ ଓଡ଼ିଆ ଭାଇ ଭଉଣୀଙ୍କୁ ଉଦବୋଧନ ଦେଇ ଡ. ପ୍ରହରାଜ କହିଛନ୍ତି ଯେ, ଏହି ବୋଇତ ମାଧ୍ୟମରେ ଓଡ଼ିଆ ସାଧବପୁଅ ସାତ ଦରିଆ ପାରି ହୋଇ ଓଡ଼ିଶାର ଗ୍ରାମ୍ୟ ଉତ୍ପାଦିତ ଦ୍ରବ୍ୟ ବିଦେଶରେ ବାଣିଜ୍ୟ କରିବାକୁ ଯାଉଥିଲେ । ଓଡ଼ିଶାର ମହାନଦୀରୁ ଏହି ଯାତ୍ରା ଆରମ୍ଭ ହୋଇ କଳିଙ୍ଗ ସାଗରଦେଇ ସେମାନେ ଇଣ୍ଡୋନେସିଆ ତଥା ବୋର୍ଣ୍ଣିଓ, ଜାଭା, ସୁମାତ୍ରା ଆଦି ଅଞ୍ଚଳରେ ବାଣିଜ୍ୟ କରୁଥିଲେ ଏବଂ ଫେରିବା ବାଟରେ ନାନାଦି ବିଦେଶୀ ଦ୍ରବ୍ୟ ସହିତ ଓଡ଼ିଶାକୁ ସମୃଦ୍ଧି ନେଇ ଫେରୁଥିଲେ । ସାଧଵମାନଙ୍କ ଶୁଭଯାତ୍ରା ମଙ୍ଗଳ କାମନା କରି ସାଧବ ବୋହୂମାନେ ବୋଇତର ବନ୍ଦନା କରି ଥାଆନ୍ତି । ଏହାର ସ୍ମାରକୀ ସ୍ବରୂପ ଆଜି ବି କଟକ ମହାନଦୀ ପଠାରେ ବିଶ୍ବ ପ୍ରସିଦ୍ଧ ବାଲିଯାତ୍ରା ସମେତ ଓଡ଼ିଶାର ବିଭିନ୍ନ ସ୍ଥାନରେ ବାଲିଯାତ୍ରା ଅନୁଷ୍ଠିତ ହୋଇଥାଏ ।
ତେବେ ଭାରତ ସ୍ବାଧୀନତାର ଅମୃତ ମହୋତ୍ସବ ଓ ଭାରତ ବାହାରିନ କୂଟନୈତିକ ସମ୍ପର୍କର ସୁବର୍ଣ୍ଣ ଜୟନ୍ତି ଅବସରରେ ଏହି କାର୍ଯ୍ୟକ୍ରମକୁ ବିଶେଷ ଆନନ୍ଦ ଉଲ୍ଲାସ ସହିତ ବାହାରିନ ଓଡ଼ିଆ ସମାଜ ପାଳନ କରିଛି । ବାହାରିନ ନାଗରିକ ଅତ୍ୟନ୍ତ ଉତ୍ସାହ ଓ ଆଗ୍ରହ ସହିତ ଏହି ଉତ୍ସବକୁ ଉପଭୋଗ କରିବା ଓ ପ୍ରଶଂସା କରୁଥିବା ଦେଖାଯାଇଥିଲା । ଏହିପରି ଏକ ସାଂସ୍କୃତିକ ସ୍ବାଧୀନତା ଦେଇଥିବାରୁ ବାହାରିନ ଓଡ଼ିଆ ସମାଜ ପକ୍ଷରୁ ଡ. ପ୍ରହରାଜ ଭାରତୀୟ ଦୂତାବାସ, ବାହାରିନ ସରକାରଙ୍କ ସମେତ ସ୍ଥାନୀୟ ପ୍ରଶାସନକୁ ଧନ୍ୟବାଦ ଅର୍ପଣ କରିଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
