ଭୁବନେଶ୍ବର: ରାଜସ୍ବ ବୃଦ୍ଧି ନେଇ ବିଏମସିର ଅଭିନବ ପ୍ରୟାସ । ସ୍ମାର୍ଟସିଟିରେ ବାକି ପଡିଥିବା ହୋଲଡିଂ ଟିକସ ଆଦାୟ କଲେ ଟ୍ରାନ୍ସଜେଣ୍ଡର । ଶୁକ୍ରବାର ଆନୁଷ୍ଠାନିକ ଭାବେ ଟ୍ରାନ୍ସଜେଣ୍ଡର ସ୍କ୍ୱାର୍ଡ ଗାଡିକୁ ପତାକା ଦେଖାଇ ଶୁଭାରମ୍ଭ କରିଛନ୍ତି ବିଏମସି କମିଶନର । ଚଳିତ ଆର୍ଥିକ ବର୍ଷ ଶେଷ ସୁଦ୍ଧା, ରାଜସ୍ବ ବୃଦ୍ଧି ଲକ୍ଷ୍ୟ ନେଇ ଅଣ୍ଟା ଭିଡ଼ିଛି ବିଏମସି ।
ଭୁବନେଶ୍ବରରେ ବଡ ଧରଣର ଖିଲାପକାରୀଙ୍କ ଠାରୁ ବକେୟା ଥିବା ପ୍ରାୟ ୧୧ କୋଟି ଟଙ୍କାର ହୋଲଡିଂ ଟ୍ୟାକ୍ସ ଆଦାୟ କରିବେ ଟିଜି ସ୍ବୀକୃତି ନାମକ ଟ୍ରାନ୍ସଜେଣ୍ଡର ସ୍ବୟଂ ସହାୟକ ଗୋଷ୍ଠୀ । ପ୍ରାୟ ୨୦ ଜଣ ଟ୍ରାନ୍ସଜେଣ୍ଡର ଭୁବନେଶ୍ବର ସହୀଦ ନଗରରେ ବଡ ବଡ ଟ୍ୟାକ୍ସ ଖିଲାପକାରୀଙ୍କ ଘରକୁ ଯାଇ ବକେୟା ଥିବା ଟିକସ ଆଦାୟ କରିଛନ୍ତି ।
ଭୁବନେଶ୍ବରରେ ଟ୍ୟାକ୍ସ ଫାଙ୍କୁଥିବା ଜନସାଧାରଣଙ୍କ ଘରକୁ ଟ୍ରାନ୍ସଜେଣ୍ଡର ଗୋଷ୍ଠିର ସଦସ୍ୟାମାନେ ଯାଇ ଆଦାୟ କରିଛନ୍ତି ହୋଲଡିଂ ଏବଂ ଟ୍ରେଡ଼ ଲାଇସେନ୍ସ ଟିକସ । ଏନେଇ ବିଏମସି ପକ୍ଷରୁ ସେମାନଙ୍କୁ ପରିଚୟ ପତ୍ର, ଗାଡି ପ୍ରଦାନ କରାଯାଇଛି ।
ଶୁକ୍ରବାର ଶହୀଦ ନଗର ପ୍ଲଟ ନଂ 475ରୁ 41000, ପ୍ଲଟ ନଂ 535ରୁ 25000 ହୋଲଡିଂ ଟାକ୍ସ ଆଦାୟ ହୋଇଛି। ତେବେ ପ୍ରଥମ ଦିନରେ ଶହୀଦ ନଗରରୁ ପ୍ରାୟ ୬୬ ହଜାର ଟଙ୍କା ବାକି ପଡିଥିବା ପୁରୁଣା ହୋଲଡିଂ ଟିକସ ଆଦାୟ କରିଛି ଟିଜି ସ୍ବୀକୃତି ।
ସମାଜର ମୁଖ୍ୟ ସ୍ରୋତରେ ଟ୍ରାନ୍ସଜେଣ୍ଡରମାନଙ୍କୁ ସାମିଲ କରି ଏହି କାର୍ଯ୍ୟରେ ନିୟୋଜିତ କରାଯିବା ମୁଖ୍ୟ ଲକ୍ଷ୍ୟ। ତେବେ ପ୍ରଥମ ଦିନରେ ଶହୀଦ ନଗରରେ ଟିକସ ଆଦାୟ ହୋଇଛି ବୋଲି ଟିଜି ସ୍ବୀକୃତି ଟ୍ରାନ୍ସଜେଣ୍ଡର ଗୋଷ୍ଠିର ସଦସ୍ୟା ମେଘନା କହିଛନ୍ତି ।
ପାରିଶ୍ରମିକ ଭାବେ ଆଦାୟ ଟ୍ୟାକ୍ସର ୧ ପ୍ରତିଶତ କିନ୍ନରଙ୍କୁ ଦିଆଯିବ । ବର୍ତ୍ତମାନ ପରିସ୍ଥିତିରେ ପ୍ରାୟ ୧୧ କୋଟି ଟଙ୍କାର ପୁରୁଣା ଟିକସ ବକେୟା ପଡିଛି ବୋଲି ବିଏମସି କମିଶନର ପ୍ରେମ ଚନ୍ଦ୍ର ଚୌଧୁରୀ କହିଛନ୍ତି ।
ତେବେ ବିଏମସି ଗତ ମାସରେ ଟିଜି ସ୍ବୀକୃତି ନାମକ ଟ୍ରାନ୍ସଜେଣ୍ଡର ଏସଚଜି ସହ ସ୍ବାକ୍ଷରିତ ହୋଇଥିଲା । ଗତବର୍ଷ ରାଜସ୍ବ ଆଦାୟ କରିବାରେ ବିଫଳ ହୋଇଥିଲା । ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ହୋଲଡିଂ ଟିକସ ଆଦାୟ କରିବା ନେଇ ଜୋରଦାର କସରତ ଆରମ୍ଭ କରିଛି । ଏସଏଚଜି ଗ୍ରୁପ,ଟ୍ରାନ୍ସଜେଣ୍ଡର ଗ୍ରୁପ ଏବଂ ୱାର୍ଡ ଅଫିସରସଙ୍କ ନିଦ ହଜାଇଛି । ବିଏମସି ସୂଚନା ଅନୁସାରେ ଚଳିତ ବର୍ଷ ସରକାରଙ୍କ ହୋଲଡିଂ ଟ୍ୟାକ୍ସ ଟାର୍ଗେଟ ରହିଛି ୬୦ କୋଟି । ଏ ପର୍ଯ୍ୟନ୍ତ ମୋଟ ୧୬ କୋଟି ଟଙ୍କା ଆଦାୟ ହୋଇଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
