ଭୁବନେଶ୍ବର: କୋରୋନା ମହାମାରୀ ମଧ୍ୟରେ କାୟା ମେଲାଇଛି ଡେଙ୍ଗୁ । ରାଜ୍ୟ ରାଜଧାନୀରେ ବ୍ୟାପିବାରେ ଲାଗିଛି ଡେଙ୍ଗୁ ଜ୍ବର । ଯାହାକୁ ନେଇ ସରକାରଙ୍କୁ ଟାର୍ଗେଟ କରୁଛନ୍ତି ବିରୋଧୀ । ସରକାରଙ୍କ ଅବହେଳା ଯୋଗୁଁ ରାଜଧାନୀରେ ଡେଙ୍ଗୁ ଆତଙ୍କ ଖେଳାଇଥିବା ଅଭିଯୋଗ କରି ଶୁକ୍ରବାର ବିଜେପି ଭୁବନେଶ୍ବରର ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରିଛି ।
କଳ୍ପନା ଛକ, ମାଷ୍ଟରକ୍ୟାଣ୍ଟିନ, ସିଆରପି, ଡମଣା, ଇନ୍ଦ୍ରଧନୁ ମାର୍କେଟ ଆଦି 12ଟି ସ୍ଥାନରେ ଦଳ ପକ୍ଷରୁ ବିକ୍ଷୋଭ କରାଯାଇଛି । ବିଜେପି ବିକ୍ଷୋଭ ପ୍ରଦର୍ଶନ କରିବା ସହ ଲୋକଙ୍କୁ ସଚେତନ ମଧ୍ୟ କରାଉଛି । ଯେତେବେଳେ ସରକାର ସ୍ଥାଣୁ ପାଲଟିଛନ୍ତି ସେତେବେଳେ ଭାରତୀୟ ଜନତା ପାର୍ଟିର କାର୍ଯ୍ୟକର୍ତ୍ତା ଲୋକଙ୍କୁ ସଚେତନତା କରିବା ସହିତ ସେବା ଓ ଚିକିତ୍ସାର ଦାୟିତ୍ୱ ନେବ ବୋଲି ଦଳ କହିଛି ।
ସେପଟେ ଡେଙ୍ଗୁର ମୁକାବିଲା ଲାଗି ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତଙ୍କ ଆହ୍ୱାନ କ୍ରମେ ରାଜଧାନୀର 8 ନମ୍ବର ୱାର୍ଡରେ ଡେଙ୍ଗୁ ସଚେତନତା କାର୍ଯ୍ୟକ୍ରମ ଆୟୋଜିତ କରାଯାଇଛି । ଏହି କାର୍ଯ୍ୟକ୍ରମରେ ଭୁବନେଶ୍ୱର ବିଜୁ ଜନତା ଦଳର ସାଙ୍ଗଠନିକ ଜିଲ୍ଲା ସାଧାରଣ ସମ୍ପାଦକ ମନୋଜ କୁମାର ସାହୁ ଓ ୱାର୍ଡ ସଭାପତି ଲଷ୍ମୀଧର ସାହୁ ପ୍ରମୁଖ ଯୋଗଦାନ କରି ଘର ଘର ବୁଲି ଲୋକଙ୍କୁ ସଚେତନ କରାଇଛନ୍ତି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
