ଭୁବନେଶ୍ବର: ରାଜ୍ୟରେ ନାବାଳିକା ଓ ମହିଳାଙ୍କ ପ୍ରତି ଦୁଷ୍କର୍ମ ବଢୁଛି । ପ୍ରତିଦିନ ପ୍ରାୟ ୭ ଜଣ ମହିଳା ଦୁଷ୍କର୍ମର ଶିକାର ହେଉଛନ୍ତି । ଏମିତି ଚାଞ୍ଚଲ୍ୟକର ତଥ୍ୟ ସୋମବାର ବିଧାନସଭାରେ ସରକାର ଦେଇଥିଲେ । ଏହାକୁ ନେଇ ମଙ୍ଗଳବାର ସରକାରଙ୍କୁ ଘେରିଛି ବିଜେପି ।
ମଙ୍ଗଳବାର ବିଜେପି ସାଧାରଣ ସମ୍ପାଦିକା ଲେଖାଶ୍ରୀ ସମାନ୍ତ ସିଂହାର ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ସରକାରଙ୍କୁ ଘେରିଛନ୍ତି । ଜଗତସିଂହପୁର ଜିଲ୍ଲା ନାଉଗାଁରେ ହୋଇଥିବା ଦୁଷ୍କର୍ମକୁ ନେଇ ରାଜ୍ୟ ସରକାରଙ୍କୁ କାଠଗଡାକୁ ଟାଣିଛନ୍ତି ଲେଖାଶ୍ରୀ । ଜଣେ ଦଳିତ ଝିଅକୁ ବାରମ୍ବାର ଦୁଷ୍କର୍ମ କରିବା ଓ ସେ ଭୟରେ ଆତ୍ମହତ୍ୟା କରିବା ପରେ ବିଜେପି ଏହାକୁ ଗମ୍ଭୀରତାର ସହ ନେଇ ସରକାରଙ୍କ ଉପରେ ବର୍ଷିଛି ।
ମୁଖ୍ୟମନ୍ତ୍ରୀଙ୍କ ଉପରେ ହମଲା କରି ଦଳ କହିଛି ବିଧାନସଭାରେ ମହିଳାଙ୍କ ଉପରେ ହେଉଥିବା ଅତ୍ୟାଚାର ପ୍ରସଙ୍ଗରେ ଆଲୋଚନା ପାଇଁ ବିରୋଧୀ ଚାହିଁଲେ ମୁଖ୍ୟମନ୍ତ୍ରୀ କହୁଛନ୍ତି ରାଜନୀତି କରୁଛ । ହେଲେ ଏଠି ଜଣେ ଦଳିତ ଝିଅ ଦୁଷ୍କର୍ମର ଶୀକାର ହୋଇ ଆତ୍ମହତ୍ୟା କରୁଛି ଏହା କିପ୍ରକାର ମୁଖ୍ୟମନ୍ତ୍ରୀଙ୍କର ମହିଳାଙ୍କୁ ସମ୍ମାନ ବୋଲି ପ୍ରଶ୍ନ କରିଛି ଦଳ ।
ବିଧାନସଭାରେ ସରକାର ଉତ୍ତର ଦେଇ କହିଛନ୍ତି ଗତ ଛ’ ମାସରେ 604 ଜଣ ଦୁଷ୍କର୍ମର ଶିକାର ହୋଇଛନ୍ତି ଓ ପ୍ରତିଦିନ 7ଜଣ ନାବାଳିକା ଦୁଷ୍କର୍ମର ଶିକାର ହେଉଛନ୍ତି | ହେଲେ ଏହି ପ୍ରସଙ୍ଗରେ ବିରୋଧୀ ଗୃହରେ ଆଲୋଚନା ଚାହିଁଲେ ମୁଖ୍ୟମନ୍ତ୍ରୀ କହୁଛନ୍ତି ରାଜନୀତି କରୁଛ । ଏଠି ଫାସୀବାଦର ସରକାର ଚାଲିଥିବା କହିଛନ୍ତି ଲେଖଶ୍ରୀ ।
ଏଠି ଯିଏ ସରକାରଙ୍କ ନିର୍ଦ୍ଦେଶରେ କାମ କରିବ ନାହିଁ ସେ ବଳି ପଡିବ, ଉଦାହରଣ ଦେଇ କହିଛନ୍ତି ନିକଟରେ ଏଥିପାଇଁ ଡିଜିପି ପଦରୁ ହଟିଲେ ବିଜୟ ଶର୍ମା ।
ସେପଟେ ବିଜେପି ଅଭିଯୋଗର ଜବାବ ଦେଇଛନ୍ତି ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ । ସେ କହିଛନ୍ତି ବିଜେପି ଯେଉଁ ଅଭିଯୋଗ କରୁଛି ବିଜେପି ଶାସିତ ରାଜ୍ୟରେ ଦୁଷ୍କର୍ମର ସ୍ଥିତି କଣ ତାହା ମଧ୍ୟ କୁହନ୍ତୁ । ଏହାକହି ସେ ବିଜେପିକୁ ପାଲଟା ଆଟାକ କରିଛନ୍ତି ପ୍ରମିଳା ।
ଭୁବନେଶ୍ବରରୁ ତପନ ଦାସ ଓ ଜ୍ଞାନଦର୍ଶୀ ସାହୁ, ଇଟିଭି ଭାରତ
