ଭୁବନେଶ୍ବର: ଯାଜପୁର ଭିଏଲଡବ୍ଲ୍ୟୁ ସ୍ମିତାରାଣୀଙ୍କ ହତ୍ୟା ଆଜିକୁ ୭ ଦିନ ପୂରିଲାଣି । ହେଲେ ପୋଲିସ କେବଳ ତଦନ୍ତ ନାଁରେ ତାଙ୍କ ବ୍ୟକ୍ତିଗତ ଜୀବନର ଗୋଟିଏ ପରେ ଗୋଟିଏ ଫର୍ଦ୍ଦ ଓଲଟାଇ ଚାଲିଛି । ହେଲେ କାହିଁକି ତାଙ୍କ ବୃତ୍ତିଗତ ଜୀବନକୁ ତଦନ୍ତ ପରିସରକୁ ଅଣାଯାଉ ନାହିଁ ବୋଲି ବିଜେପି ଅଭିଯୋଗ କରିବା ସହ ଗୃହ ସଚିବଙ୍କୁ ପ୍ରଶ୍ନ କରିଛି ।
ମଙ୍ଗଳବାର ସ୍ମିତାରାଣୀଙ୍କ ସ୍ଵାମୀ ମହିଳା କମିଶନ ଓ ପୋଲିସ ଡିଜିଙ୍କ ପାଖରେ କହିଛନ୍ତି ଯେ, ସ୍ମିତାରାଣୀଙ୍କ ଉପରେ ବୃତ୍ତିଗତ ଚାପ ଥିଲା । ଶାସକ ଦଳର କିଛି ନେତା ମିଥ୍ୟା ବିଲ୍ ପାସ୍ କରାଇବା ସହ ପକ୍କାଘର ହିତାଧିକାରୀଙ୍କ ଚୟନରେ ଚଞ୍ଚକତା କରିବା ପାଇଁ ଚାପ ପକାଉଥିଲେ ।
ଏ କଥା ସ୍ମିତାରାଣୀଙ୍କ ସ୍ଵାମୀ ଅନେକ ଥର କହିଛି । ପୋଲିସ ସେ ଦିଗରେ ତଦନ୍ତ କରୁ । ବିଜୁ ପକ୍କାଘର ଯୋଜନା କେଳେଙ୍କାରୀକୁ ଲୁଚାଇବା ପାଇଁ ତାଙ୍କୁ ହତ୍ୟା କରାଯାଇଛି । ଧର୍ମଶାଳା ବିଡ଼ିଓ କାହିଁକି ଏଯାଏଁ ମାମଲା ଦେଇନାହାନ୍ତି ବୋଲି ବିଜେପି ପକ୍ଷରୁ କୁହାଯାଇଛି ।
ବୁଧବାର ଏନେଇ ବିଜେପି ପ୍ରତିନିଧି ଦଳ ପକ୍ଷରୁ ଏକ ଟିମ ମୁଖ୍ୟ ଶାସନ ସଚିବଙ୍କ ହସ୍ତକ୍ଷେପ ଦାବି କରିଛି । ମୃତ ସ୍ମିତାରାଣୀଙ୍କୁ ନ୍ୟାୟ ଦାବି କରିଛି ଦଳ । ରାଜ୍ୟ ଉପସଭାପତି ସମୀର ମହାନ୍ତିଙ୍କ ନେତୃତ୍ବରେ ଏକ ଦଳ ଗୃହ ସଚିବଙ୍କୁ ଭେଟିଛନ୍ତି । ତୁରନ୍ତ ଏହି ଘଟଣାରେ ମୁଖ୍ୟ ଶାସନ ସଚିବ ହସ୍ତକ୍ଷେପ କରି ମୃତ ସ୍ମିତାରାଣୀଙ୍କୁ
ନ୍ୟାୟ ଦିଅନ୍ତୁ ବୋଲି ପ୍ରତିନିଧି ଦଳ ଦାବି କରିଛି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
