ଭୁବନେଶ୍ବର: ସାମ୍ବାଦିକଙ୍କୁ ତୁରନ୍ତ ନ୍ୟାୟ ମିଳୁ । ସେମାନଙ୍କ ଉପରେ ଆକ୍ରମଣ ଘଟଣାକୁ ବିଜେପି ଦୃଢ ନିନ୍ଦା କରୁଛି । ରବିବାର ଭୁବନେଶ୍ବର ରାଜ୍ୟ ବିଜେପି କାର୍ଯ୍ୟାଳୟରେ ଏକ ସାମ୍ବାଦିକ ସମ୍ମିଳନୀରେ ଏପରି କହିଛନ୍ତି ବିଜେପି ମୁଖପାତ୍ର ଗୋଲକ ମହାପାତ୍ର ।
ଶନିବାର ଏସପ୍ଲାନେଡ ମଲରେ ବେଆଇନ ପାର୍କିଂ ଫି ଆଦାୟକୁ ନେଇ କାର୍ଯ୍ୟରତ ମହିଳା ସାମ୍ବାଦିକଙ୍କୁ ମଲ କର୍ମଚାରୀଙ୍କ ସଙ୍ଘବଦ୍ଧ ଆକ୍ରମଣ ଘଟଣାକୁ ବିଜେପି ଦୃଢ ନିନ୍ଦା କରିଛି । ଏହା ଅତ୍ୟନ୍ତ ଦୁଃଖଦ ଓ ନିନ୍ଦନୀୟ ଘଟଣା । ପୋଲିସ ଆକ୍ରମଣକାରୀକୁ ଘଣ୍ଟ ଘୋଡାଉଛି ବୋଲି ଗୋଲକ ମହାପାତ୍ର ଅଭିଯୋଗ କରିଛନ୍ତି । ଏହା ସହ ତୁରନ୍ତ ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛନ୍ତି ।
ସେ ଏହା ମଧ୍ୟ କହିଛନ୍ତି ଯେ, ସାମ୍ବାଦିକଙ୍କ ସୁରକ୍ଷା ପାଇଁ ସାମ୍ବାଦିକ ସୁରକ୍ଷା ଆଇନ ଆଣିବାକୁ ବିଜେପି ପକ୍ଷରୁ ଅନେକ ଥର ଦାବି ହୋଇଛି । ଏପରିକି ବିଧାନସଭାରେ ମଧ୍ୟ ଉକ୍ତ ଆଇନ ଲାଗୁ କରିବାକୁ ଦାବି କରିଥିଲେ ବିରୋଧୀ ଦଳ ନେତା । ଯଦି ଏହି ଆଇନ ଲାଗୁ ନହୁଏ ତେବେ ସାମ୍ବାଦିକଙ୍କ ସହ ବାରମ୍ବାର ଏଭଳି ଘଟଣା ଘଟିବ । ଯାହା ଅତ୍ୟନ୍ତ ନିନ୍ଦନୀୟ ଘଟଣା । ଏଥିରୁ ସାମ୍ବାଦିକଙ୍କୁ ନିସ୍ତାର ଦେବାକୁ ହେଲେ ରାଜ୍ୟ ସରକାରଙ୍କ ଆଗକୁ ଆସିବାକୁ ହେବ ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
