ଭୁବନେଶ୍ବର: ମିଛର ଆବରଣ ନେଇ କାଳିଆ ଯୋଜନା ପ୍ରଣୟନର ପରିଣତି । ଚାଷୀ ଆଜି ଭୟଭୀତ ଓ ଅପମାନିତ। ବିନା ହିତାଧିକାରୀ ତାଲିକାରେ ଅର୍ଥକୁ ଯାଚିକି ଦେଇଥିବା ଅଧିକାରୀ, କୃଷି ମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଉପରେ ଏହାର ଉତ୍ତରଦାୟିତ୍ବ ଲଦାଯାଉ । ତ୍ରୁଟିପୂର୍ଣ୍ଣ ପରିଚାଳନା ଓ ତାଲିକା ପାଇଁ ୧୭୦ କୋଟି ଟଙ୍କାର ଅପବ୍ୟୟର ଭାର ପାଇଁ ରାଜ୍ୟ ସରକାର ଦାୟୀ ବୋଲି ବିଜେପି ଆଜି ଅଭିଯୋଗ କରିଛି ।
କେବଳ ଏତିକି ନୁହେଁ, "ପ୍ରଧାନମନ୍ତ୍ରୀ କିଷାନ ନିଧି ଯୋଜନାରେ ୧୨ ଲକ୍ଷ ଚାଷୀ ତାଲିକାରୁ ଏମିତି ଚଞ୍ଚକତା ପାଇଁ ୩ ଲକ୍ଷ କଟିଗଲେ । ଆବଶ୍ୟକ ପଡିଲେ ବିଜେପି ନ୍ୟାୟାଳୟର ଦ୍ବାରସ୍ଥ ହେବାକୁ ପଛାଇବନି। କୃଷକଙ୍କ ତାଙ୍କ ଆବଶ୍ୟକତା ନଥିଲା । ଏମାନେ ଜବରଦସ୍ତ ସେମାନଙ୍କ ଆକାଉଣ୍ଟକୁ ତାଙ୍କ ପଠାଇଛନ୍ତି। ଚାଷୀ ଖର୍ଚ୍ଚ କରିସାରିଛି । ଟଙ୍କା ଫେରସ୍ତ କଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିବା ପରେ ବର୍ତ୍ତମାନ ଚାଷୀ ଏବେ ଭୟଭୀତ"।
କେଉଁଠୁ ଟଙ୍କା ଆଣି ଫେରାଇବ ଚାଷୀ ବୋଲି ପ୍ରଶ୍ନ କରିଛନ୍ତି ବିଜେପି ନେତା ପୃଥ୍ବୀରାଜ ହରିଚନ୍ଦନ। ସାମ୍ବାଦିକ ସମ୍ମିଳନୀରେ ଏନେଇ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀ ଯେଉଁମାନେ କି ତାଲିକା ପ୍ରସ୍ତୁତରେ ଜଡିତ ଥିଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉ । ସେମାନଙ୍କ ଠାରୁ ଟଙ୍କା ଆଦାୟ ହେଉ ବୋଲି ସେ ଦାବି କରିଛନ୍ତି । ଯାହାକୁ ନେଇ ବର୍ତ୍ତମାନ ସରକାର ହରଡ଼ଘଣାରେ ପଡିଛନ୍ତି । ଚାଷୀଙ୍କ ତାଲିକା ନଥାଇ ଯୋଜନା ପ୍ରସ୍ତୁତ କରିବା, ଟଙ୍କା ନଥାଇ ଜରୁରୀକାଳିନ ପାଣ୍ଠିରୁ ଟଙ୍କା ବାଣ୍ଟିବା କଣ ଆବଶ୍ୟକତା ଥିଲା ବୋଲି ସେ ପ୍ରଶ୍ନ କରିଛନ୍ତି ।
ସେପଟେ ଏନେଇ କଂଗ୍ରେସ ବି ରାଜ୍ୟ ସରକାରଙ୍କୁ ଟାର୍ଗେଟ କରିଛି ।" ସରକାରଙ୍କ କାଳିଆ ଯୋଜନାର ଉଦ୍ଦେଶ୍ୟ ପୂରଣ ହୋଇଯାଇଛି । ଆମର ଧାରଣା 3 ଲକ୍ଷ 41 ହଜାରରୁ ଅଧିକ ଅଯୋଗ୍ୟ ହିତାଧିକାରୀ ଅଛନ୍ତି ।ସବୁ ଭୁଲ କାମ କରିଥିବାରୁ ସରକାର ତଥ୍ୟ ଲୁଚାଇ ବେନି ତ ଆଉ କଣ କରିବେ? ସରକାରଙ୍କ ସବୁ କାର୍ଯ୍ୟକ୍ରମ ନିର୍ବାଚନ ଓ ଭୋଟ ପାଇଁ " ବୋଲି କହିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ।
ସେପଟେ ବିଜେଡି ଏହାର ଜବାବ ରଖି କହିଛି କାଳିଆରେ କିଛି ସ୍କାମ ହୋଇନାହିଁ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
