ଭୁବନେଶ୍ବର: ଆବାସ ଯୋଜନା ନେଇ ରାଜ୍ୟ ସରକାରଙ୍କୁ ସମାଲୋଚନା କରିଥିଲେ ରାଜ୍ୟ ବିଜେପି ସଭାପତି ସମୀର ମହାନ୍ତି । ଯାହାର ଜବାବ ଦେଇଛନ୍ତି ବିଜେଡି ମୁଖପାତ୍ର ଲେନିନ ମହାନ୍ତି । ନିରୁତ୍ସାହିତ କର୍ମୀଙ୍କୁ ଉତ୍ସାହିତ କରିବା ପାଇଁ ବିଜେପି ସଭାପତି ଉଦ୍ୟମ କରୁଥିବା କହିଛନ୍ତି ଲେନିନ ।
ଲେନିନ କହିଛନ୍ତି ଯେ, ସମୀର ମହାନ୍ତି ରାଜ୍ୟ ବିଜେପି ସଭାପତି ଭାବେ ତାଙ୍କ କର୍ମୀଙ୍କୁ ଉତ୍ସାହିତ କରିବା ପାଇଁ ଏଭଳି ଅଭିଯୋଗ ଆଣିଛନ୍ତି । ପଶ୍ଚିମବଙ୍ଗ ନିର୍ବାଚନ ବିଫଳତା, ଉତ୍ତରପ୍ରଦେଶର ସମେତ ଅନ୍ୟ ରାଜ୍ୟରେ ବିଜେପିର ସ୍ଥିତିକୁ ନେଇ ନିରୁତ୍ସାହିତ ଅଛନ୍ତି ରାଜ୍ୟର ଦଳୀୟ କର୍ମୀ । ଆଉ ଏହି ନିରୁତ୍ସାହିତ କର୍ମୀଙ୍କ ମନରେ ଉତ୍ସାହ ଭରିବା ଲାଗି ଚେଷ୍ଟା କରିଛନ୍ତି ସମୀର ।
ଲେନିନ ଆହୁରି କହିଛନ୍ତି ଯେ, ସମୀର ମହାନ୍ତିଙ୍କ ଦୁଃଖ ଆମେ ବୁଝି ପାରୁଛୁ । ଯେତେବେଳେ କେନ୍ଦ୍ର ସରକାର ରାଜ୍ୟକୁ ପ୍ରଶଂସା କରୁଛନ୍ତି, ସେତେବେଳେ ରାଜ୍ୟ ବିଜେପି ଏହାକୁ ବିରୋଧ କରୁଛି । ତେଣୁ ଏହା ନିହାତି କର୍ମୀଙ୍କୁ ଉତ୍ସାହିତ କରିବାର ଯୋଜନା ବୋଲି କହିଛନ୍ତି ଲେନିନ । ବିଜେପିର ବାମ ହାତ କଣ କରୁଛି, ତାହା ଡାହାଣ ହାତକୁ ଜଣାପଡୁନି । ପିଏମ ଆବାସ ଯୋଜନାରେ ଦୁର୍ନୀତି ହୋଇଥିବା ଅଭିଯୋଗ କରି ସମୀର ମିଛ କହୁଛନ୍ତି । ଯାହାକୁ ଖଣ୍ଡନ କରିଛନ୍ତି ବିଜେଡି ମୁଖପାତ୍ର । ଏ ପ୍ରସଙ୍ଗରେ ରାଜ୍ୟକୁ କେନ୍ଦ୍ର ସରକାର ବାରମ୍ବାର ପ୍ରଶଂସା କରିଛନ୍ତି । ଏହାକୁ ରାଜ୍ୟ ବିଜେପି କାହିଁକି ଭୁଲି ଯାଉଛି ବୋଲି ପ୍ରଶ୍ନ କରିଛନ୍ତି ଲେନିନ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
