ଭୁବନେଶ୍ବର: ମମିତା ମେହେର ହତ୍ୟାକାଣ୍ଡକୁ ନେଇ ସରକାରୀ ଦଳକୁ ଘେରୁଛନ୍ତି ବିରୋଧୀ । ଘଟଣାରେ ଗୃହରାଷ୍ଟ୍ର ମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ରଙ୍କ ସମ୍ପୃକ୍ତି ଅଭିଯୋଗ କରି ଗାଁରୁ ସହର ସବୁଠି ଆନ୍ଦୋଳନ ମୁଣ୍ଡ ଟେକିଛି । ଏହାକୁ ପ୍ରତିହାତ କରିବା ଲାଗି ବିଜେଡି଼ର କାଉଣ୍ଟର ଷ୍ଟ୍ରାଟେଜି ଆପଣେଇଛି । ଆନ୍ଦୋଳନର ଜବାବ ଆନ୍ଦୋଳନରେ ଦେବ ବୋଲି ବିଜେଡି଼ ନିଷ୍ପତ୍ତି ନେଇଛି । ଦରଦାମ ବୃଦ୍ଧି ପ୍ରସଙ୍ଗକୁ ନେଇ ଦଳ ଆନ୍ଦୋଳନକୁ ଓହ୍ଲାଇବ । ଆଜି ଏ ନେଇ ଯୁବ ବିଜେଡି଼ର କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ କରି ଆନ୍ଦୋଳନର କାର୍ଯ୍ୟସୂଚୀ ଜାରି କରିଛି ଦଳ ।
ସାମ୍ବାଦିକ ସମ୍ମିଳନୀ କରି ଦରବୃଦ୍ଧି ପ୍ରସଙ୍ଗକୁ ନେଇ କେନ୍ଦ୍ର ସରକାରଙ୍କ ଉପରେ ବର୍ଷିଛି ବିଜେଡି଼ । ବିଜେଡି଼ର ମୁଖପାତ୍ର ପ୍ରତାପ ଦେବ, ବିଧାୟକ ଅତନୁ ସବ୍ୟସାଚୀ ନାୟକ ଓ ଉପ ସଭାନେତ୍ରୀ ପ୍ରମିଳା ମଲ୍ଲିକ ଉପସ୍ଥିତ ରହି ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରିଛନ୍ତି । ଇନ୍ଧନ ଗ୍ୟାସ୍ ଦର ହଜାରେ ଟଙ୍କା ପାଖାପାଖି ରହିଛି । ଏହା ମଧ୍ୟବିତ୍ତଙ୍କ ଲାଗି ବୋଝ ଉପରେ ନଳିତା ବିଡ଼ା । ଦର ବୃଦ୍ଧି ଯନ୍ତ୍ରଣାଦାୟକ, ଦୁର୍ଭାଗ୍ୟଜନକ ବୋଲି କହିଛି ବିଜେଡି଼ । ଜୁଲାଇରୁ ଅକ୍ଟୋବର ମଧ୍ୟରେ ୯୦ ଟଙ୍କା ବଢ଼ିଛି ଗ୍ୟାସ୍ ଦର । ଖାଲି ଗ୍ୟାସ୍ ନୁହେଁ ପେଟ୍ରୋଲ ଓ ଡିଜେଲ୍ ଦର ସବୁଦିନ ବଢ଼ି ବଢ଼ି ଚାଲିଛି ।
୨୦୧୯ରେ ଦ୍ବିତୀୟ ଥର ବିଜେପି କେନ୍ଦ୍ରରେ କ୍ଷମତାକୁ ଆସିବାବେଳେ ପେଟ୍ରୋଲ ୭୧ ଟଙ୍କା ଓ ଡିଜେଲ ୬୫ ଟଙ୍କା ରହିଥିଲା । ୨ ବର୍ଷ ଭିତରେ ତୈଳଦର ୩୦ ପ୍ରତିଶତରୁ ଅଧିକ ବୃଦ୍ଧି ପାଇଛି । କେବଳ ଇନ୍ଧନ ଦର ନୁହେଁ, ଅତ୍ୟାବଶ୍ୟକ ସାମଗ୍ରୀ ଦର ମଧ୍ୟ ବଢ଼ିଛି । ତୈଳଦର ବୃଦ୍ଧି ଯୋଗୁଁ ପରିବହନ ଖର୍ଚ୍ଚ ବଢ଼ି ସବୁଦର ବଢ଼ିଛି । ଅତ୍ୟାବଶ୍ୟକୀୟ ସାମଗ୍ରୀର ଦର ୪୦ରୁ ୧୦୦ ପ୍ରତିଶତ ବଢ଼ିଛି ।
ମହାମାରୀ ଓ ଲକଡାଉନ୍ ଯୋଗୁଁ ଲୋକେ ପରିବାର ପ୍ରତିପୋଷଣ ପାଇଁ ସଂଗ୍ରହ କରୁଛନ୍ତି । କଷ୍ଟ ଅଫ୍ ଲିଭିଂ ୩.୧୭ ପ୍ରତିଶତ ବୃଦ୍ଧି ପାଇଛି । ସବୁକିଛିର ଦରଦାମ ବଢ଼ିଥିବା ବେଳେ ଲୋକଙ୍କ କ୍ରୟ କ୍ଷମତା ହ୍ରାସ ପାଇଛି, ବେରୋଜଗାରୀ ବଢ଼ିଛି । ସ୍ଥିତିରେ ସୁଧାର ପାଇଁ କେନ୍ଦ୍ର ସରକାର ବିଶେଷ କିଛି ପଦକ୍ଷେପ ନେଉନାହାଁନ୍ତି । କୋରୋନା ପରେ କେନ୍ଦ୍ର ଅର୍ଥନୀତିକୁ ଠିକଣା ଭାବେ ସଜାଡ଼ିଥିଲେ ଦରବୃଦ୍ଧି ହୋଇନଥାନ୍ତା ।
ବିଜେପି ସରକାରର ଆର୍ଥିକ ପରିଚାଳନା ଠିକ୍ ଭାବରେ ହେଉନି । ବିଜେପି ବିକାଶ କଥା କହୁଛି, ସାଧାରଣ ଜନତା ଭୋକରେ ରହିଲେ ବିକାଶ ହୁଏନି । ଲୋକେ ଡାଲି ଟିକିଏ, ତେଲ ଟିକିଏ ଖାଇବା ପାଇଁ ପାଉନାହାନ୍ତି । ଲୋକଙ୍କ ପେଟକୁ ଯଦି ଦାନା ନାହିଁ ତାହେଲେ ବିକାଶ କେମିତି ହେଉଛି ? ଦରଦାମ ବୃଦ୍ଧିକୁ ବିରୋଧ କରି ବିଜେଡି ବିଭିନ୍ନ କାର୍ଯ୍ୟକ୍ରମ ବୋଲି ଦଳର ବରିଷ୍ଠ ନେତା ଅତନୁ ସବ୍ୟସାଚୀ ନାୟକ କହିଛନ୍ତି ।
ଆସନ୍ତାକାଲି ବିଜେଡି଼ ରାଜଭବନ ସମ୍ମୁଖରେ ଗଣଧାରଣା ଦେବା ସହ ରାଜ୍ୟପାଳଙ୍କୁ ସ୍ମାରକ ପତ୍ର ଦେବ । ନଭେମ୍ବର ପହିଲାରେ ଦରଦାମ ବୃଦ୍ଧିକୁ ବିରୋଧ କରି ୧୪୭ଟି ନିର୍ବାଚନ ମଣ୍ଡଳୀରେ ମହିଳା ବିଜେଡି଼ ପକ୍ଷରୁ ପ୍ରତିବାଦ ସଭା କରାଯିବ । ୫ ତାରିଖରୁ ୭ ତାରିଖ ଯାଏଁ ପେଟ୍ରୋଲ ଓ ଡିଜେଲ୍ ଦର ବୃଦ୍ଧିକୁ ବିରୋଧ କରି ବିଜୁ ଯୁବ ଓ ଛାତ୍ର ସଂଗଠନ ପକ୍ଷରୁ ପେଟ୍ରୋଲ ପମ୍ପ ସମ୍ମୁଖରେ ଧାରଣା ଓ ପ୍ରତିବାଦ ସଭା ହେବ । ପ୍ରେସମିଟରେ ଏହି ସୂଚନା ଦେଇଛନ୍ତି ବିଜେଡି ନେତ୍ରୀ ପ୍ରମିଳା ମଲ୍ଲିକ ।
କୋରୋନା ମହାମାରୀ ପ୍ରଭାବ କମୁଥିବାବେଳେ ଦରଦାମ ବୃଦ୍ଧି ଲୋକଙ୍କୁ ଅସ୍ତବ୍ୟସ୍ତ କରୁଛି । ପ୍ରତି ପରିବାରକୁ ଏହା କଷ୍ଟ ଦେଉଥିବା କହିଛନ୍ତି ବରିଷ୍ଠ ନେତା ପ୍ରତାପ ଦେବ । ଦୀର୍ଘ ଦିନ ପରେ ପୁଣି ଥରେ ଦରଦାମ ବୃଦ୍ଧି ପ୍ରସଙ୍ଗ ଉଠାଇ କେନ୍ଦ୍ରକୁ ଟାର୍ଗେଟ କରିଛି ବିଜେଡି଼ । LPG ଦର ବୃଦ୍ଧି ସାଧାରଣ ଲୋକଙ୍କୁ ପ୍ରଭାବିତ କରିଛି । କେବଳ ଗ୍ୟାସ ଓ ତୈଳ ଦର ନୁହେଁ ଅତ୍ୟାବଶ୍ୟକ ସାମଗ୍ରୀର ମୂଲ୍ୟ ବଢ଼ିଛି । ଏଥିପାଇଁ ସାଧାରଣ ଲୋକଙ୍କ ଜୀବନ ଓ ଜୀବିକା ପ୍ରଭାବିତ ହୋଇଥିବା କହିଛନ୍ତି ଅତନୁ । ସ୍ଥିତିରେ ସୁଧାର ଆଣିବା ପାଇଁ କେନ୍ଦ୍ର ସରକାର କିଛି ପଦକ୍ଷେପ ନେଉନଥିବା ବିଜେଡି଼ କହିଛି । କୋରୋନା କମିଥିଲେ ବି ଦରଦାମରେ ରୋକ ଲାଗୁନି । ବିଜେପି ସରକାର ଆର୍ଥିକ ପରିଚାଳନାରେ ବିଫଳ ହୋଇଛି । ସଧାରଣ ଲୋକଙ୍କ ସମସ୍ୟାକୁ ଦୃଷ୍ଟିରେ ରଖି ରାଜରାସ୍ତାକୁ ଓହ୍ଲାଇବ ବିଜେଡି଼ ।
୨ ବର୍ଷ ଭିତରେ 30 ପ୍ରତିଶତ ତୈଳ ଦର ବୃଦ୍ଧି ପାଇଛି । ଯାହାଦ୍ବାରା ଟ୍ରାନ୍ସପୋର୍ଟ ଉପରେ ପ୍ରଭାବ ପଡୁଛି । ଉଜ୍ଜ୍ବଳା ପ୍ରସଙ୍ଗ ଉଠାଇ କହିଛନ୍ତି ସେ ଗ୍ୟାସ ଗୁଡିକ ରିପିଲିଂ ହୋଇପାରୁନି । 31 ତାରିଖରେ ବିଜୁ ଜନତା ଦଳର ଛାମୁଆ ସଂଗଠନ ରାଜଭବନ ସମ୍ମୁଖରେ ଦରଦାମ ବୃଦ୍ଧି ନେଇ ପ୍ରତିବାଦ କରିବା ସହ ରାଜ୍ୟପାଳଙ୍କୁ ସ୍ମାରକ ପତ୍ର ଦେବେ । ନଭେମ୍ବର 1 ତାରିଖରେ ମହିଳା ସଂଗଠନ 147ଟି ନିର୍ବାଚନ ମଣ୍ଡଳୀରେ ଗ୍ୟାସ ଦର ବୃଦ୍ଧି ନେଇ ପ୍ରତିବାଦ କରିବେ । ନଭେମ୍ବର 5ରୁ 7 ଯୁବ ଛାତ୍ରମାନେ ରାଜ୍ୟର ସମସ୍ତ ତେଲ ଟାଙ୍କି ଆଗରେ ବିକ୍ଷୋଭ କରିବେ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
