ଭୁବନେଶ୍ବର: ଉଷୁନା ଚାଉଳ ନ କିଣିବା ପ୍ରସଙ୍ଗରେ ଗର୍ଜିଲା ବିଜେଡି । କେନ୍ଦ୍ର ସରକାର କେବଳ ପ୍ରତିଶ୍ରୁତି ଦେଇଛନ୍ତି ମାତ୍ରା ତାହା ଫଳଶୂନ୍ୟ । କେନ୍ଦ୍ରର ଏ ଅବହେଳାକୁ ବିରୋଧ କରି ଆଜି ବିଜେଡି ଫୁଡ୍ କର୍ପୋରେସନ ଅଫ୍ ଇଣ୍ଡିଆ ଆଗରେ ବିକ୍ଷୋଭ ପ୍ରଦର୍ଶନ କରୁଛି । କେନ୍ଦ୍ର ସରକାର ଓଡିଶା ଚାଷୀଙ୍କ ସହ ଖେଳୁଛନ୍ତି । ୨୨ ଲକ୍ଷ ମେଟ୍ରିକ ଟନ ଗଚ୍ଛିତ ଉଷୁନା ଚାଉଳ ଉଠାଯାଉ ନଥିବାରୁ ପ୍ରତିବାଦ କରି ଆନ୍ଦୋଳନକୁ ଓହ୍ଲାଇଛି ବିଜେଡି ।
ଖାଦ୍ୟ ସୁରକ୍ଷା ଯୋଜନାରେ କାହିଁକି ଓଡିଶାରୁ ଉଷୁନା ଚାଉଳ ଉଠାଯାଉ ନାହିଁ ତାକୁ ପ୍ରସଙ୍ଗ କରି ରାଜଧାନୀ ଏଫସିଆଇ ଆଗରେ ବିରୋଧ ପ୍ରଦର୍ଶନ କରିଛି ବିଜେଡି । କେନ୍ଦ୍ର ସରକାର ୨ ମେଟ୍ରିକ୍ ଟନ ଅରୁଆ ଓ ୫ ମେଟ୍ରିକ୍ ଟନ ଉଷୁନା ଚାଉଳ କିଣିବେ ବୋଲି ପ୍ରତିଶୃତି ଦେଇଥିଲେ ମଧ୍ୟ ତାହା ନକରି ଆମ ସହ ଖେଳୁଥିବା ବୋଲି ବିଜେଡି କହିଛି । ଏପଟେ ରାଜ୍ୟରେ ଏବେ ୨୨ ଲକ୍ଷ ମେଟ୍ରିକ ଟନ ଉଷୁନା ଓ ଅରୁଆ ଚାଉଳ ରହିଛି ।
ସେହିପରି ବଳକା ଥିବା ଚାଉଳକୁ ସଂଘୀୟ ବ୍ୟବସ୍ଥା ଅନୁସାରେ ଏହାକୁ ଫୁଡ୍ କର୍ପୋରେସନ ଅଫ୍ ଇଣ୍ଡିଆ(FCI) ମାଧ୍ୟମରେ କେନ୍ଦ୍ର ସରକାର କିଣିବା କଥା । ହେଲେ କେନ୍ଦ୍ର ଏହାକୁ ପୂରଣ କରିନାହିଁ । ଫଳରେ କେନ୍ଦ୍ରର ଏହି ମନମୁଖୀ ନୀତିକୁ ବିରୋଧ କରି ଏଫସିଆଇ ଆଗରେ ଧାରଣ ଦେଇଛି ଦଳ । ଏହି ବିକ୍ଷୋଭ ପ୍ରଦର୍ଶନରେ ବିଜେଡିର ବରିଷ୍ଠ ନେତା ଅଶୋକ ପଣ୍ଡା ସମେତ ସୁଲତା ଦେଓ, ଅରବିନ୍ଦ ଢାଲି , ଅରୁପ ପଟ୍ଟନାୟକ ପ୍ରମୁଖ ଯୋଗଦେଇ କେନ୍ଦ୍ର ବିରୋଧରେ ଗର୍ଜନ କରିଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
