ଭୁବନେଶ୍ବର: ପ୍ରଧାନମନ୍ତ୍ରୀ ଆବାସ ଯୋଜନା ନେଇ ପୁନର୍ବାର କେନ୍ଦ୍ର ଗ୍ରାମୀଣ ବିକାଶ ଏବଂ ପଞ୍ଚାୟତରାଜ ମନ୍ତ୍ରୀ ଗିରିରାଜ୍ ସିଂହଙ୍କୁ(Union Rural Development & Panchayati Raj Minister Giriraj Singh ) ଭେଟିଛନ୍ତି ବିଜେଡି ସାଂସଦଗଣ । ସୋମବାର ନୂଆଦିଲ୍ଲୀସ୍ଥିତ କୃଷି ଭବନରେ ବିଜେଡିର ଉଭୟ ଲୋକସଭା ଓ ରାଜ୍ୟସଭା ସାଂସଦ କେନ୍ଦ୍ରମନ୍ତ୍ରୀଙ୍କ ସହ ଆଲୋଚନା କରିଛନ୍ତି । ପ୍ରଧାନମନ୍ତ୍ରୀ ଆବାସ ଯୋଜନା ଓ MNREGA ଯୋଜନାରେ ଓଡ଼ିଶାର ଦାବି ସମ୍ପର୍କରେ ଜଣାଇଛନ୍ତି ବିଜେଡି ସାଂସଦ । ବୈଠକ ସକରାତ୍ମକ ଭାବେ ହୋଇଥିବା ବିଜେଡି ପକ୍ଷରୁ ସୂଚନା ଦିଆଯାଇଛି ।
ଗତ 14 ତାରିଖରେ ସମାନ ପ୍ରସଙ୍ଗ ନେଇ ବିଜେଡି ସାଂସଦ କେନ୍ଦ୍ରମନ୍ତ୍ରୀଙ୍କୁ ଭେଟି ଦାବିପତ୍ର ଦେଇଥିଲେ । ଫନିର ଫଁରେ ରାଜ୍ୟର 1 ଲକ୍ଷ 84 ହଜାର ପରିବାର ଘର ହରାଇଥିଲେ । ପ୍ରଧାନମନ୍ତ୍ରୀ ଓଡିଶା ଆସି ଫନି ପ୍ରଭାବିତ 5 ଲକ୍ଷ ଲୋକଙ୍କୁ ପିଏମଏୱାଇ( PMAY)ରେ ଘର ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲେ । କିନ୍ତୁ ବର୍ତ୍ତମାନ ସୁଦ୍ଧା 1.84 ଲକ୍ଷ ପରିବାରକୁ ଯୋଜନାରେ ସାମିଲ କରାଯାଇନାହିଁ । ବାସହରାଙ୍କୁ ଖୁବଶୀଘ୍ର ଘର ଦେବାକୁ ବିଜେଡି ଦାବି କରିଛି । ସେହିପରି ଅଣ ଫନି ପ୍ରଭାବିତ 16 ଜିଲ୍ଲାର 5.09 ଲକ୍ଷ ଯୋଗ୍ୟ ପରିବାର ପ୍ରଧାନମନ୍ତ୍ରୀ ଆବାସ ଯୋଜନା( PMAY)ରୁ ବାଦ୍ ପଡିଛନ୍ତି । ବିଶେଷକରି ଆଦିବାସୀ ବହୁଳ ପଶ୍ଚିମ ଓଡ଼ିଶା, ଅନୁସୂଚିତ ଅଞ୍ଚଳ ଓ କେବିକେ ଅଞ୍ଚଳର ଏହି ଲୋକ ରହିଛନ୍ତି । ତେଣୁ ଆବାସ ପ୍ଲସ ପୋର୍ଟାଲ ମାସକ ପାଇଁ ଖୋଲିଲେ ବଳକା ପରିବାରଙ୍କ ଡାଟା ଏଥିରେ ଯୋଡା ଯାଇପାରିବ ବୋଲି କିଛିଦିନ ପୂର୍ବରୁ ପ୍ରଧାନମନ୍ତ୍ରୀଙ୍କୁ ଚିଠି ଲେଖି ଜଣାଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
