ଭୁବନେଶ୍ବର: ପ୍ରକାଶ ପାଇଛି ବିଧାନସଭା ନିର୍ବାଚନ ଫଳାଫଳ । ଶପଥ ଗ୍ରହଣ ଉତ୍ସବକୁ ରହିଛି ଅପେକ୍ଷା । ତେବେ ଏହାରି ଭିତରେ ବିଜେଡିରେ ହାରିବାର କାରଣ ଖୋଜା ଚାଲିଛି । କେଉଁ ପରିସ୍ଥିତିରେ ବିଜେଡି ପ୍ରାର୍ଥୀ ପରାଜୟ ବରଣ କଲେ ତାକୁ ନେଇ ଚାଲିଛି ମାନସ ମନ୍ଥନ ।
ବିଜେଡି ଏକକ ସଂଖ୍ୟା ଗରିଷ୍ଠତା ହାସଲ ପଞ୍ଚମଥର ପାଇଁ କ୍ଷମତା ଦଖଲ କରିଛି । ତେବେ ଦଳ ପୂର୍ବ ନିର୍ବାଚନ ତୁଳନାରେ କମ୍ ଆସନ ପାଇଛି । ଯେଉଁଥିପାଇଁ ଦଳର ସୁପ୍ରିମୋ ଦଳ ଖରାପ ପ୍ରଦର୍ଶନ କରିଥିବା ଆସନ ଗୁଡିକର ନେତାଙ୍କୁ ଡାକି ହାରିବାର କାରଣ ଖୋଜୁଛନ୍ତି । ତେବେ ଏହି ପରିପ୍ରେକ୍ଷୀରେ ନବୀନ ନିବାସରେ ପହଞ୍ଚି କଣ୍ଟାବାଞ୍ଝିରେ ଦଳର ପରାଜୟ ପାଇଁ କେଉଁ ପ୍ରସଙ୍ଗ ଦାୟୀ ତାହା ପୂର୍ବତନ ବିଧାୟକ ଆୟୁବ୍ ଖାନ୍ କହିଛନ୍ତି ।
ତେବେ ଏହି ଅବସରରେ ଗଣମାଧ୍ୟମ ପ୍ରଶ୍ନର ଉତ୍ତର ଦେଇ ଆୟୁବ୍ ପରୋକ୍ଷରେ କଣ୍ଟାବାଞ୍ଝିରେ ପରାଜୟ ପାଇଁ ପୂର୍ବତନ ସାଂସଦ କଳିକେଶ ନାରାୟଣ ସିଂହଦେଓଙ୍କୁ ଦାୟୀ କରିଛନ୍ତି । ସେ କହିଛନ୍ତି, କଳିକେଶ ଅନେକ ଲୋକଙ୍କୁ ପ୍ରାର୍ଥୀ କରିବାକୁ କଥା ଦେଇଥିଲେ । ଯାହା ପରାଜୟର ଅନ୍ୟତମ କାରଣ ।
ସୂଚନାଥାଉକି, ଚଳିତଥର କଂଗ୍ରେସ ପ୍ରାର୍ଥୀ ସନ୍ତୋଷ ସିଂହ ସାଲୁଜା ଏଠାରୁ ଜିତିଛନ୍ତି ।
