ଭୁବନେଶ୍ବର/ବ୍ରହ୍ମପୁର: ପୌର ନିର୍ବାଚନ ପାଇଁ ମେୟର ତାଲିକା ଘୋଷଣା କଲା ବିଜେଡ଼ି । ଭୁବନେଶ୍ବର ମହାନଗର ନିଗମ ପାଇଁ ସୁଲୋଚନା ଦାସ, କଟକ ପାଇଁ ରାଜ୍ୟସଭା ସାଂସଦ ସୁବାସ ସିଂ, ବ୍ରହ୍ମପୁର ମହାନଗର ନିଗମ ପାଇଁ ସଂଘମିତ୍ରା ଦଳେଇ । ଏ ନେଇ ବିଜେଡ଼ି ସୁପ୍ରିମୋ ମୁଖ୍ୟମନ୍ତ୍ରୀ ନାମ ଘୋଷଣା କରିଛନ୍ତି । ଏ ସମ୍ପର୍କରେ ବିଜେଡ଼ିର ସାଧାରଣ ସମ୍ପାଦକ ମାନସ ମଙ୍ଗରାଜ ସୂଚନା ଦେଇଛନ୍ତି ।
ପୌର ନିର୍ବାଚନ ପାଇଁ ବ୍ରହ୍ମପୁର ମହାନଗର ନିଗମରୁ ବିଜୁ ଜନତା ଦଳରୁ ମେୟର ପ୍ରାର୍ଥୀ ଭାବରେ ସଂଙ୍ଘମିତ୍ରା ଦଳେଇଙ୍କର ନାମ ଘୋଷଣା କରାଯାଇଛି । ସଂଘମିତ୍ରା ଦୀର୍ଘ ବର୍ଷ ଧରି ଗଞ୍ଜାମ ଜିଲ୍ଲାରେ ବିଜୁ ଜନତା ଦଳ ପାଇଁ କାର୍ଯ୍ୟ କରି ଆସୁଥିବା ବେଳେ ଦଳର ମହିଳା ବିଜେଡିର ଜିଲ୍ଲା ସଭାନେତ୍ରୀ ଏବଂ ପୂର୍ବତନ କର୍ପୋରେଟର ଭାବରେ ଅନେକ କାର୍ଯ୍ୟ କରି ଆସିଛନ୍ତି । ଚଳିତବର୍ଷ ନିର୍ବାଚନରେ ଏଠାକାର ମେୟର ପଦବୀ ମହିଳାଙ୍କ ପାଇଁ ସଂରକ୍ଷିତ ରହିଥିବା ବେଳେ ବିଜୁ ଜନତା ଦଳ ପକ୍ଷରୁ ଅନେକ ଆଶାୟୀ ପ୍ରାର୍ଥୀ ଏଠାରେ ଆବେଦନ କରିଥିଲେ । ହେଲେ ଶେଷରେ ଦଳ ପକ୍ଷରୁ ଦଳେଇଙ୍କୁ ଚୟନ କରାଯାଇଛି ।