ଭୁବନେଶ୍ବର: ବାର୍ଡ ଫ୍ଲୁ ନେଇ ରାଜଧାନୀରେ ଜୋରଦାର ଅପରେସନ । ଓୟୁଏଟି ଠାରୁ 1 କିଲୋମିଟର ପର୍ଯ୍ୟନ୍ତ ଚାଲିଛି କୁକୁଡା ମରା ଅଭିଯାନ । ଏହାସହ ୧ କିଲୋମିଟର ପର୍ଯ୍ୟନ୍ତ କୌଣସି କୁକୁଡା ବିକ୍ରି ହୋଇପାରିବନି କି ଅଣ୍ଡା କିଣିବେ ନାହିଁ ଗ୍ରାହକ । ସଂକ୍ରମଣର ଦୃଷ୍ଟିରେ ରଖି ଓୟୁଏଟି କର୍ମଚାରୀଙ୍କ ସହ ରାପିଡ୍ ଆକ୍ସନ ଟିମ ଚଳାଇଛନ୍ତି ଅଭିଯାନ ।
ଓୟୁଏଟି ଠାରୁ ୧ କିଲୋମିଟର ପରିଧି ପର୍ଯ୍ୟନ୍ତ ବିକ୍ରୟ ହେଉଥିବା ଅଥବା କୁକୁଡା ପାଳନ ହେଉଥିବା କୁକୁଡାକୁ ନଷ୍ଟ କରାଯାଇଛି । ଏନେଇ ଟିମ ବିଭିନ୍ନ ଦୋକାନ ଓ ବସ୍ତିରେ ଚଢାଉ କରିଛନ୍ତି । କୁକୁଡା ପାଳୁଥିବା ବା ବିକୁଥିବା ଲୋକଙ୍କ କ୍ଷତିପୂରଣ ପାଇଁ ଲିଷ୍ଟ କରିବା ସହ କୁକୁଡା ମାରିଛନ୍ତି । ରାଜଭବନ, ନବୀନ ନିବାସ ପାଖ ଓ ଶିରିପୁର ଓ ପାଖଆଖ ଅଞ୍ଚଳରେ ଜୋରଦାର ଭାବେ କୁକୁଡା ମରା ଅଭିଯାନ ଚାଲୁରହିଛି ।
ତେବେ ଗତ ୨୮ ତାରିଖରେ ଓୟୁଏଟିର କୁକୁଡା ଗବେଷଣା କେନ୍ଦ୍ରରେ କୁକୁଡାଙ୍କୁ ବାର୍ଡଫ୍ଲୁ ହୋଇଥିବା ଖବର ପ୍ରଥମେ ଇଟିଭ ଭାରତ ପ୍ରସାରଣ ପରେ ତତ୍ପର ହୋଇଥିଲା ପ୍ରଶାସନ । ଯେହେତୁ କୁକୁଡାକୁ ହେଉଥିବା ଏନ୫ଏଚ୧ ଭାଇରାସ ଏପରି ଆକ୍ରାନ୍ତ କରିଥାଏ ତା ସହିତ ବାୟୁରେ ଏହି ଭାଇରସ ବ୍ୟାପିବାର ଆଶଙ୍କା ଥାଏ । ସେ ଦୃଷ୍ଟିରୁ ଓୟୁଏଟିରୁ ୧କିମି ପର୍ଯ୍ୟନ୍ତ କୁକୁଡା ନଷ୍ଟ ସହ ୧୦ କିମି ପର୍ଯ୍ୟନ୍ତ କୁକୁଡାଙ୍କର ନମୁନା ସଂଗ୍ରହ ହେଉଛି।
ଏହା ସହିତ କୁକୁଡା ରହୁଥିବା ଅଞ୍ଚଳକୁ ଭଲଭାବେ ବ୍ଲିଚିଂ ସହ ସ୍ପ୍ରେ କରାଯାଉଛି ଯେପରି ସଂକ୍ରମଣ ବ୍ୟାପିବ ନାହିଁ ସେନେଇ ଧ୍ୟାନ ଦିଆଯାଉଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
