ଭୁଆଶୁଣି ଡମ୍ପିୟାର୍ଡ ବିବାଦ, ଫିଟିଲାନି ବାଟ, ତୁଟୁନି ଅଳିଆ ଅଡୁଆ

ଭୁଆଶୁଣି ଡମ୍ପିୟାର୍ଡ ବିବାଦକୁ ନେଇ ସମାଧାନ ବାହାରିବ ବୋଲି ଆଶା ସଞ୍ଚାରିତ ହୋଇଥିଲା । ମାତ୍ର ଆଜି ଦ୍ବିପାକ୍ଷିକ ଆଲୋଚନାରେ ବାହାରି ପାରିଲାନି ନିଷ୍କର୍ସ । ଅଧିକ ପଢନ୍ତୁ

ଭୁବନେଶ୍ବର: ଭୁଆଶୁଣି ଡ଼ମ୍ପିଂୟାର୍ଡ ବିବାଦର ସମାଧାନ ଲାଗି ଦ୍ବିପାକ୍ଷିକ ଆଲୋଚନା ଶେଷ ହୋଇଛି। ଦୀର୍ଘ ଦେଢ଼ ଘଣ୍ଟା ଧରି ଚାଲିଥିବା ବୈଠକରେ ବାହାରିଲାନି ନିଷ୍କର୍ଷ । ଏବେ ବି ଜିଦରେ ଅଟଳ ରହିଛନ୍ତି ଗ୍ରାମବାସୀ । ଦୁଇ ଦିନ ମଧ୍ୟରେ ଡକାଯିବ ଗ୍ରାମସଭା । ଗ୍ରାମସଭାର ନିଆଯିବାକୁ ଥିବା ନିଷ୍ପତ୍ତି ହେବ ଚୂଡାନ୍ତ ନିଷ୍ପତ୍ତି । ତେବେ ସୌହାର୍ଦ୍ଦ୍ୟପୂର୍ଣ୍ଣ ବାତାବରଣ ମଧ୍ୟରେ ବୈଠକ ଚାଲିଥିବା ବୋଲି କହିଛନ୍ତି ଭୁବନେଶ୍ବର ମେୟର ସୁଲୋଚନା ଦାସ ।

ଡମ୍ପିୟାର୍ଡରେ ପ୍ରସ୍ତାବିତ ବାୟୋ ମାଇନିଂ ପ୍ଲାଣ୍ଟ ନିର୍ମାଣ ସାମୟିକ ଭାବେ ସ୍ଥଗିତ ରଖିବାକୁ ବୈଠକରେ ନିଷ୍ପତ୍ତି ନିଆଯାଇଛି । ତେବେ ଏ ନେଇ ୯ ମାସର ମହଲତ ମାଗିଲା ବିଏମସି । ଗ୍ରାମସଭାର ନିଷ୍ପତ୍ତି ନହେବା ପର୍ଯ୍ୟନ୍ତ ଭୁଆଶୁଣି ଡମ୍ପିଂୟାର୍ଡରେ ଅଳିଆ ପକାଇବାକୁ ନଦେବା ଜିଦରେ ଅଟଳ ଗ୍ରାମବାସୀ । ଦୁଇ ଦିନ ପରେ ଗ୍ରାମବାସୀଙ୍କ ସହଯୋଗରେ ସମାଧାନର ବାଟ ବାହାରିବା ନେଇ ଆଶାବାଦୀ ବିଏମସି କର୍ତ୍ତୃପକ୍ଷ । ତେବେ ଭୁବନେଶ୍ବର ମେୟର ସୁଲୋଚନା ଦାସଙ୍କ ଅଧ୍ୟକ୍ଷତାରେ ଗୁରୁତ୍ବପୂର୍ଣ୍ଣ ବୈଠକ ହୋଇଥିଲା ।

ବିଏମସି ସମ୍ମିଳନୀ କକ୍ଷରେ ଅନୁଷ୍ଠିତ ହେଉଥିବା ବୈଠକରେ ଭର୍ଚ୍ଚୁଆଲରେ ଯୋଗ ଦେଇଥିଲେ ବିଏମସି କମିଶନର, ଜଟଣୀ ବିଧାୟକ ସୁର ରାଉତରାୟ, ଭୁବନେଶ୍ବର ଡିସିପି ପ୍ରତୀକ ସିଂ ସମେତ କମିଶନରେଟ ପୋଲିସର ପ୍ରତିନିଧି, ବିଏମସିର ବରିଷ୍ଠ ଅଧିକାରୀଙ୍କ ଉପସ୍ଥିତ ଥିଲେ । ଦାରୁଠେଙ୍ଗ ସରପଞ୍ଚ ତପନ କୁମାର ଚକ୍ରବର୍ତ୍ତୀ ଏବଂ ଦାରୁଠେଙ୍ଗ ପଞ୍ଚାୟତ ପକ୍ଷରୁ ୩୦ଜଣ ପ୍ରତିନିଧି ଓ ବ୍ଲକର ନିର୍ବାଚିତ ଲୋକ ପ୍ରତିନିଧି ଉପସ୍ଥିତ ଥିଲେ ।

୨୦୦୮ରୁ ଏହି ସମସ୍ୟା ଭୋଗୁଛନ୍ତି ଦାରୁଠେଙ୍ଗ ଗ୍ରାମବାସୀ । ତେଣୁ ଏହାର ସ୍ଥାୟୀ ସମାଧାନ ପାଇଁ ପୂର୍ବରୁ ଦୁଇ ଦୁଇ ଥର ଆଲୋଚନା ହୋଇଥିଲେ ହେଁ ସମାଧାନର କୌଣସି ବାଟ ବାହାରି ପାରିନଥିଲା । ଆଉ ଆଜି ମଧ୍ୟ ସମାଧାନ ହୋଇନଥିବା ବେଳେ ଆଗକୁ ସହରର ଅଳିଆ ସମସ୍ୟା ଦୂର ହେବ କି ନାହିଁ ତାହା ଅନିଶ୍ଚିତତା ଘେରରେ ରହିଛି । ସୂଚନା ଥାଉ କି ପରିମଳ ଜନିତ ପ୍ରଦୂଷଣ ସମସ୍ୟାକୁ ଗ୍ରାମରେ ବାୟୋ ମାଇନିଂ ପ୍ଲାଣ୍ଟ ନିର୍ମାଣକୁ ଦାରୁଠେଙ୍ଗ ପଞ୍ଚାୟତବାସୀ ବିରୋଧ କରିଛନ୍ତି ।

ପରିମଳ ସମସ୍ୟାର ସମାଧାନ ପାଇଁ ଭୁଆଶୁଣି ଡ଼ମ୍ପିଂୟାର୍ଡରେ ବିଏମସି ପକ୍ଷରୁ ବାୟୋ ମାଇନିଂ ପ୍ଲାଣ୍ଟ ସ୍ଥାପନ ପାଇଁ ରାଜ୍ୟ ସରକାରଙ୍କ ପକ୍ଷରୁ ୧୦୩କୋଟି ଟଙ୍କାର ଅନୁଦାନ ମିଳିଥିଲେ ମଧ୍ୟ ପ୍ଲାଣ୍ଟ ପ୍ରତିଷ୍ଠାରେ ବିଳମ୍ବ ହେଉଛି। ସମସ୍ୟାର ସମାଧାନ ପାଇଁ ବିଏମସି କର୍ତ୍ତୃପକ୍ଷ ଓ ଦାରୁଠେଙ୍ଗ ପଞ୍ଚାୟତବାସୀଙ୍କ ସହ ଆଲୋଚନା ହେଉଥିଲେ ମଧ୍ୟ କୌଣସି ନିଷ୍କର୍ଷ ବାହାରି ପାରୁନାହିଁ ।

ଇଟିଭି ଭାରତ, ଭୁବନେଶ୍ବର