ନୂଆଦିଲ୍ଲୀ: ଲୋକସଭାରେ ଅଭାବନୀୟ ଘଟଣା । ବିଜେପିର ବଲାଙ୍ଗୀର ସାଂସଦ ସଂଗୀତା କୁମାରୀ ସିଂଦେଓଙ୍କୁ ସଂସଦରେ ଦୁଇ ବିରୋଧୀ ମହିଳା ସାଂସଦ ଆକ୍ରମଣ କରିଥିବା ଅଭିଯୋଗ ହୋଇଛି ।
ମଙ୍ଗଳବାର ନିଜେ ସଂଗୀତା ସିଂଦେଓ ଏନେଇ ଅଭିଯୋଗ କରିଛନ୍ତି । ସଂଗୀତା କହିଛନ୍ତି ବିରୋଧୀ ଦଳର ଦୁଇ ସାଂସଦ ରାମ୍ୟା ହରିଦାସ ଓ ଜ୍ୟୋତିମଣି ଆକ୍ରମଣ କରିଛନ୍ତି । ସେ ଆହୁରି କହିଛନ୍ତି ବିରୋଧୀ ଦଳର ସାଂସଦ ମାନେ ଲୋକସଭାରେ ବାଚସ୍ପତିଙ୍କୁ କାମ କରାଇ ଦେଉନଥିଲେ । ବ୍ୟାନର ଆଣି କାର୍ଯ୍ୟରେ ବ୍ୟାଘାତ ସୃଷ୍ଟି କରୁଥିଲେ । ନିଜ ନିଜ ଆସନ ଛାଡି ସଂସଦରେ ପାଟିତୁଣ୍ଡ କରୁଥିଲେ । ମୋ ହାତକୁ ଧରି ଭିଡିବା ସହ କହୁଣୀରେ ଆଘାତ ଦେଇଥିବା କହିଛନ୍ତି ସଂଗୀତା । ମନ୍ତ୍ରୀ ସ୍ମୃତି ଇରାନୀ ପାଖରେ ନଥିଲେ ମୁଁ ତଳେ ପଡିଯାଇଥାନ୍ତି ବୋଲି ସଂଗୀତା ସଂଗୀନ ଅଭିଯୋଗ କରିଛନ୍ତି ।
ଫଳରେ ସେ ସଂସଦ ପରିସରରେ ଥିବା ହସ୍ପିଟାଲ ଯାଇ ଚିକିତ୍ସିତ ହୋଇ ଡାକ୍ତରୀ ରିପୋର୍ଟ ସହ ବାଚସ୍ପତି ଓମ ବିର୍ଲାଙ୍କ ନିକଟରେ ଅଭିଯୋଗ କରି କାର୍ଯ୍ୟାନୁଷ୍ଠାନ ଦାବି କରିଥିବା ସଂଗୀତା କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
