ଭୁବନେଶ୍ବର: ଓଡ଼ିଶାରେ ଆୟୁଷ୍ମାନ ଯୋଜନା ଲାଗୁ କରାଯାଉ । ଗରିବ, ସାଧାରଣ ଲୋକଙ୍କ ପାଇଁ ଏହି ଯୋଜନାକୁ ଲାଗୁ କରିବାକୁ ମୁଖ୍ୟମନ୍ତ୍ରୀ ଅନୁରୋଧ କରିଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ । ଆଜି ଭୁବନେଶ୍ବର ସ୍ଥିତି ଏମ୍ସରେ ପୂର୍ବତନ ପ୍ରଧାନମନ୍ତ୍ରୀ ତଥା ଭାରତରତ୍ନ ଅଟଲ ବିହାରୀ ବାଜେପେୟୀଙ୍କ ପ୍ରତିମୂର୍ତ୍ତି ଉନ୍ମୋଚିତ କରି ଏପରି କହିଥିଲେ ।
ଏଥିସହ 6ଟି ଆକାଂକ୍ଷିତ ଜିଲ୍ଲାରେ ହସ୍ପିଟାଲ ଗୁଡିକୁ ମେଡିକାଲ କଲେଜ କରାଯିବ । ସାଧାରଣ ଲୋକଙ୍କୁ ଚିକିତ୍ସା ପାଇଁ ଯେଉଁ ଡାକ୍ତରଖାନାର ସ୍ବପ୍ନ ଦେଖିଥିଲେ, ଭିତ୍ତି ପ୍ରସ୍ତର ସ୍ଥାପନା ପକାଇଥିଲେ, ସେହି ବିଶ୍ବ ସ୍ତରୀୟ ଡାକ୍ତରଖାନାରେ ସ୍ଥାପିତ ହୋଇଛି ସେହି ମହାନାୟକଙ୍କ ପ୍ରତିମୂର୍ତ୍ତି । ବାଜପେୟୀଙ୍କ 95ତମ ଜନ୍ମ ତିଥିରେ ଆଜି ଅଟଳ ଜୀଙ୍କ ସ୍ବପ୍ନ ପୁରଣ ହୋଇଛି ବୋଲି ହର୍ଷବର୍ଦ୍ଧନ କହିଛନ୍ତି । ଏଥିସହ ରାଜ୍ୟ ଭିତରେ ଏମ୍ସର ସ୍ୟାଟେଲାଇଟ କ୍ୟାମ୍ପସ ନିର୍ମାଣ କରାଯିବ । ଅନ୍ୟପଟେ, ଏମ୍ସରେ 40ଟି ବିଭାଗ ଖୋଲାଯାଇ ଗୁଣାତ୍ମକ ଚିକିତ୍ସା ଯୋଗାଇବାକୁ ଭାରତ ସରକାର ପ୍ରତିବଦ୍ଧ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ବାଜପେୟୀଙ୍କ ପ୍ରତିମୂର୍ତ୍ତି ଅନାବରଣ ସହ ନୂତନ ଭାବେ ନିର୍ମିତ 10ଟି ମୋଡୁଲାର ଓଟି, ଆଇସିୟୁ କମ୍ପ୍ଲେକ୍ସ, କ୍ୟାଥ ଲ୍ୟାବ ଓ ଫ୍ଲୋରେସ୍କୋପି ସେବା ମଧ୍ୟ ଲୋକାର୍ପିତ ହୋଇଛି । ବର୍ତ୍ତମାନ ଭୁବନେଶ୍ବର ଏମ୍ସରେ 15ଟି ଓଟି କାର୍ଯ୍ୟକ୍ଷମ ଥିବାବେଳେ ଏବେ ଏହା 25ରେ ପହଞ୍ଚିଛି । ସେହିପରି 797ଟି ସାଧାରଣ ଶଯ୍ୟା ରହିଛି । 63ଟି ଆଇସିୟୁ ବେଡ, 41ଟି ବିଭାଗ ରୋଗୀ ସେବାରେ ନିୟୋଜିତ । 11ଶହ ଡାକ୍ତର ଛାତ୍ରଛାତ୍ରୀ ଅଧ୍ୟୟନ କରୁଥିବାବେଳେ 117 ଏକର ଜମିରେ ନିର୍ମାଣ ହେବାକୁ ଥିବା ଏମ୍ସ ପ୍ରତିଷ୍ଠାନ ଏବେ 92 ଏକର ଜମିରେ ନିଜର ବିଲ୍ଡିଂ ନିର୍ମାଣ କରିବାରେ ସକ୍ଷମ ହୋଇଛି । ଦୈନିକ ଏଠାକୁ 3ହଜାରରୁ ଅଧିକ ରୋଗୀ ଚିକିତ୍ସା ପାଇଁ ଆସୁଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
