ଭୁବନେଶ୍ବର: ଜୋର ଧରିଲା ପୁରୀ ଶ୍ରୀମନ୍ଦିର ୩୦୦ ମିଟର ନିୟନ୍ତ୍ରିତ ଅଞ୍ଚଳ କଟକଣା ପ୍ରତ୍ୟାହାର ଦାବି। ଏହାକୁ ନେଇ ଜାତୀୟ ସ୍ମାରକ ପ୍ରାଧିକରଣ ବା ଏନଏମଏ(NMA) ଚିଠା ପ୍ରସ୍ତାବ ଦେଇଛି । ଏହାକୁ ନେଇ ବିଭିନ୍ନ ରାଜନୈତିକ ଦଳର ମତ ସାମ୍ନାକୁ ଆସିଛି। ଏହି ନିଷ୍ପତ୍ତି ଏକ ବିସ୍ଫୋରକ ସ୍ଥିତି ସୃଷ୍ଟି କରିପାରେ ବୋଲି କହିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର। ସେପଟେ କଂଗ୍ରେସ ଓ ବିଜେଡି ମଧ୍ୟ ଏହାକୁ ନେଇ ପ୍ରତିକ୍ରିୟା ଦେଇଛନ୍ତି।
ବରିଷ୍ଠ ବିଜେପି ନେତା ବିଜୟ ମହାପାତ୍ର କହିଛନ୍ତି ଯେ,‘ଏହି ନିଷ୍ପତ୍ତି ଏକ ବିସ୍ଫୋରକ ପରିସ୍ଥିତି ସୃଷ୍ଟି କରିପାରେ। ସମଗ୍ର ପୃଥିବୀରେ ପୁରୀ ଶ୍ରୀମନ୍ଦିର ଅନନ୍ୟ। ସେଠି ଜୀବନ୍ତ ଦେବତା ପୂଜା ପାଆନ୍ତି । ପୁରୀ ଶ୍ରୀମନ୍ଦିର ପାଇଁ ଏଭଳି ନିୟମ ଉଚିତ ନୁହେଁ। ପୁରୀ ଶ୍ରୀମନ୍ଦିରକୁ ସ୍ବତନ୍ତ୍ର ଭାବେ ବିଚାର କରାଯିବାର ଆବଶ୍ୟକତା ରହିଛି । ଏଭଳି ନିୟମକୁ ରାଜ୍ୟ ସରକାର ଅନୁଧ୍ୟାନ କରି ତୁରନ୍ତ ନିଷ୍ପତ୍ତି ନିଅନ୍ତୁ।’
ସେପଟେ ଜାତୀୟ ସ୍ମାରକ ପ୍ରାଧିକରଣ ଏଭଳି ନିଷ୍ପତ୍ତିକୁ ନେଇ ଶାସକ ବିଜେଡି ମଧ୍ୟ ସମାଲୋଚନା କରିଛି । ବିଜେଡି ସାଧାରଣ ସମ୍ପାଦକ ଶଶୀ ଭୂଷଣ ବେହେରା ଏଥିରେ ରାଜନୀତିର ବାସ୍ନା ଆସୁଥିବା କଥା କହିଛନ୍ତି । ସେ କହିଛନ୍ତି ଯେ, "ସାଢ଼େ ଚାରି କୋଟି ଲୋକଙ୍କ ଭାବାବେଗକୁ ଆଘାତ ଦେଇଛି ଜାତୀୟ ସ୍ମାରକ ପ୍ରାଧିକରଣର ଏଭଳି ନିୟମ । ଧାର୍ମିକ ଭାବନାର ଡିଣ୍ଡିମ ପିଟୁଥିବା ବିଜେପି କିଭଳି ଲୋକଙ୍କ ଭାବନାକୁ ଆଘାତ ଦେଇଛି ତାହା ଆଲୋଚନାର ବିଷୟ ହୋଇଛି। ଏଭଳି ନିଷ୍ପତ୍ତି ପୂର୍ବରୁ କାହିଁକି ନେଲେ ନାହିଁ ? ମନ୍ଦିର ସ୍ଥଳୀ ସୌନ୍ଦର୍ଯ୍ୟକରଣ ହେବା ପରେ ଭକ୍ତଙ୍କ ପାଇଁ ଆକୃଷ୍ଟର କେନ୍ଦ୍ରବିନ୍ଦୁ ପାଲଟିଛି। ଜାଣିଶୁଣି ଏହାକୁ ବିବାଦୀୟ ସ୍ଥିତିକୁ ନିଆଯାଇଛି।
କଂଗ୍ରେସ ମଧ୍ୟ ଜାତୀୟ ସ୍ମାରକ ପ୍ରାଧିକରଣର ଏଭଳି ନିଷ୍ପତ୍ତିକୁ ସହଜରେ ଗ୍ରହଣ କରିପାରିନି। ବରିଷ୍ଠ କଂଗ୍ରେସ ନେତା ଓ ବିଧାୟକ ସୁର ରାଉତରାୟ ଏହାକୁ ନେଇ ତୀବ୍ର ପ୍ରତିକ୍ରିୟା ଦେଇଛନ୍ତି। ଏଏସଆଇର ବିଭିନ୍ନ ମନ୍ଦିରରେ ରୋକ ଲଗାଇ ଏକ ଡ୍ରାମା କରୁଛି। ପ୍ରାଚୀନ କୀର୍ତିରାଜିର ରକ୍ଷଣାବେକ୍ଷଣ ହେଉନାହିଁ । ପୁରୀ ମନ୍ଦିରରୁ ପାଣି ଗଳୁଛି। ପ୍ରଥମେ ବିକାଶ କରାଯାଉ ପରେ ରାଜନୀତି। ଯେତେବେଳେ ସୌନ୍ଦର୍ଯ୍ୟକରଣ କାର୍ଯ୍ୟ ହେଲା ସେତେବେଳେ କାହିଁକି ଚୁପ ବସିଥିଲେ ଜାତୀୟ ସ୍ମାରକ ପ୍ରାଧିକରଣ ଅଧିକାରୀ ? ଏବେ ନୂଆ ନିୟମ କରୁଛନ୍ତି।"
ସେପଟେ ଜାତୀୟ ସ୍ମାରକ ପ୍ରାଧିକରଣ ପକ୍ଷରୁ ବାଇ ଲ' ପ୍ରସଙ୍ଗରେ ଚିଠା ପ୍ରସ୍ତାବ ପରେ ଏନଏମଏ ଅଧିକାରୀଙ୍କୁ ଚିଠି ଲେଖିଲେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ କ୍ରିଷ୍ଣନ କୁମାର। ପ୍ରସ୍ତାବ ପ୍ରତ୍ୟାହାର ନେଇ ଚିଠିରେ ଉଲ୍ଲେଖ ରହିଛି। ଚିଠିରେ ଭକ୍ତ, ଠାକୁର ଓ ସେବାୟତଙ୍କ ସ୍ବାର୍ଥକୁ ଗୁରୁତ୍ବ ଦିଆଯିବା ଆବଶ୍ୟକ ରହିଛି । ତେଣୁ ସମସ୍ତ କଥାକୁ ଦୃଷ୍ଟିରେ ରଖି ଅଧିନିୟମକୁ ତୁରନ୍ତ ପ୍ରତ୍ୟାହାର କରନ୍ତୁ ବୋଲି ଦାବି କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ଶ୍ରୀମନ୍ଦିର ନେଇ ଯେକୌଣସି ନିଷ୍ପତ୍ତି ପୂର୍ବରୁ ମନ୍ଦିର ପ୍ରଶାସନ ସହ ଆଲୋଚନା କରାଯାଉ ବୋଲି ଦାବି ହୋଇଛି।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
