ଭୁବନେଶ୍ବର: ନକଲି ଭିନ୍ନକ୍ଷମ ସାର୍ଟିଫିକେଟ ଦାଖଲ କରି କଲେଜରେ ପାଠ ପଢୁଛନ୍ତି ଛାତ୍ରଛାତ୍ରୀ । ରାଜଧାନୀର ବିଜେବି କଲେଜ ଓ ରାଜଧାନୀ କଲେଜରୁ ଏପରି ଘଟଣା ସାମ୍ନାକୁ ଆସିଥିବା ବେଳେ ଏବେ ମହର୍ଷି ଆଇନ ମହାବିଦ୍ୟାଳୟରେ ଏହି ଘଟଣା ସାମ୍ନାକୁ ଆସିଛି । ଯୁକ୍ତ ତିନି ବିଜ୍ଞାନ ବିଭାଗର ନକଲି ଭିନ୍ନକ୍ଷମ ସାର୍ଟିଫିକେଟ ଦାଖଲ କରି ଛାତ୍ରୀ ଜଣକ କଲେଜରେ ଆଡମିଶନ ନେଇ ପାଠ ପଢୁଥିଲେ।
ତେବେ ନକଲି ସାର୍ଟିଫିକେଟ ଚିହ୍ନଟ ହେବାପରେ ତାଙ୍କର ଆଡମିଶନକୁ ବାତିଲ ପାଇଁ ନିର୍ଦ୍ଦେଶ ଦିଆଯାଇଛି । ନକଲି ଭିନ୍ନକ୍ଷମ ଡାକ୍ତରୀ ପ୍ରମାଣପତ୍ର ଦାଖଲ କରି ଆଡମିଶନ ପାଇଁ ସଂରକ୍ଷଣ ଦାବୀ କରିଥିଲେ । ଛାତ୍ରୀଙ୍କ ଆଡମିଶନ ବାତିଲ କରିବା ପରେ SAMS ପୋର୍ଟାଲରେ ଅପଡେଟ କରିବାକୁ ଉଚ୍ଚ ଶିକ୍ଷା ବିଭାଗ ପକ୍ଷରୁ ତୁରନ୍ତ ନିର୍ଦ୍ଦେଶ ଦିଆଯାଇଛି ।
ସୂଚନା ଅନୁଯାୟୀ, ଭଦ୍ରକ କଲେଜରେ 28 ଜଣ ଛାତ୍ର ଛାତ୍ରୀ ନକଲି ଭିନ୍ନକ୍ଷମ ସାର୍ଟିଫିକେଟରେ ପାଠ ପଢୁଥିବା ଚିହ୍ନଟ ହୋଇଥିବା ବେଳେ ପରବର୍ତ୍ତୀ ସମୟରେ ଭୁବନେଶ୍ୱରର ବିଜେବି କଲେଜରୁ 8 ଜଣ ଓ ରାଜଧାନୀ କଲେଜରୁ ଚିହ୍ନଟ ହୋଇଥିଲେ 6 ଜଣ ଛାତ୍ରଛାତ୍ରୀ । ଏବଂ ଏସମସ୍ତଙ୍କର ଆଡମିଶନକୁ ପରବର୍ତ୍ତୀ ସମୟରେ ବାତିଲ କରାଯାଇଛି ।
ଇଟିଭି ଭାରତ, ଭୁବନେଶ୍ବର
