ବାଲେଶ୍ବର: ଫକୀର ମୋହନ ମେଡିକାଲ କଲେଜର କର୍ତ୍ତୃପକ୍ଷଙ୍କ ଅବହେଳା ପାଇଁ 13 ବର୍ଷୀୟ ଥାଲାସେମିଆ ଶିଶୁକୁ ମେଡିକାଲ ସଜାଇ ଦେଇଛି ଏଚଆଇଭି ରୋଗୀ । ଏହି ବାବଦରେ AACHHA ସଙ୍ଗଠନ ପକ୍ଷରୁ ବାରମ୍ବାର ପ୍ରମାଣ ସହ ବାଲେଶ୍ବର ଫକୀର ମୋହନ ମେଡିକାଲ କଲେଜର ସୁପରିଟେଣ୍ଡଙ୍କୁ ଜଣାଇଲା ପରେ ମଧ୍ୟ କୌଣସି ସୁଫଳ ମିଳୁନାହିଁ। ମେଡିକାଲ ପକ୍ଷରୁ କୌଣସି ପଦକ୍ଷେପ ନିଆଯିବ ନାହିଁ ବୋଲି ଉତ୍ତର ମିଳୁଛି ।
ଯେହେତୁ ଏଚଆଇଭିର ତଥ୍ୟକୁ ଗୋପନୀୟ ରଖାଯିବା ପାଇଁ ସରକାରଙ୍କ ପକ୍ଷରୁ ନିର୍ଦ୍ଦେଶ ଅଛି ତେଣୁ, ଆମ ସଙ୍ଗଠନ ପକ୍ଷରୁ ମେଡିକାଲ କର୍ତ୍ତୃପକ୍ଷଙ୍କୁ ସହଯୋଗ କରି ଏହାର ସମାଧାନ କରାଇ ପିଲାମାନଙ୍କ ଭବିଷ୍ୟତ ବଞ୍ଚାଇବା ପାଇଁ ଉଦ୍ୟମ କରାଯାଇଥିଲା । ଗତ ୨୦୧୯ ମସିହାରେ ଏହି ବାବଦରେ ଏହି ସଙ୍ଗଠନ ଆମରଣ ଅନଶନରେ ବସିବା ପରେ ପ୍ରଶାସନ ପକ୍ଷରୁ ଏହାର ପୁନରାବୃତ୍ତି ହେବନାହିଁ ବୋଲି ପ୍ରତିଶୃତି ମିଳିଥିଲା ।
ସେଦିନ ବାଲେଶ୍ବର ଜିଲ୍ଲାପାଳ ଥିବା କେ. ସୁଦର୍ଶନ ଚକ୍ରବର୍ତ୍ତୀ ଆଜି ମଧ୍ୟ ଅଛନ୍ତି । ଜିଲ୍ଲାପାଳ କିମ୍ବା ମେଡ଼ିକାଲ ସୁପରିଟେଣ୍ଡଙ୍କୁ ଫୋନ କଲେ ସେମାନଙ୍କର ଖାତିର ନାହିଁ । ଏହି ଘଟଣା ବାବାଦରେ ଉଚ୍ଚସ୍ତରୀୟ ତଦନ୍ତ କରାଇବା ସହ ସୁପରିଟେଣ୍ଡ ଏବଂ ବାଲେଶ୍ବର ଜିଲ୍ଲାପାଳଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସଂଗଠନ ପକ୍ଷରୁ ଦାବି କରିଛନ୍ତି। ଏ ସମ୍ପର୍କରେ ଯଦି କାର୍ଯ୍ୟାନୁଷ୍ଠାନ ନକରାଯାଏ ତେବେ ଆଗାମୀ ୧୫ ଦିନ ମଧ୍ୟରେ ସଙ୍ଗଠନ ପକ୍ଷରୁ ଏହି ବାବଦରେ ଆନ୍ଦୋଳନ ତୀବ୍ରତର ହେବ ବୋଲି ବିଶମିତ ଦାସ କହିଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
