ଭୁବନେଶ୍ବର: ଆଜି ଠାରୁ ଭୁବନେଶ୍ୱରରେ ଆୟୋଜିତ ହେବାକୁ ଯାଉଛି କଳିଙ୍ଗ ସାହିତ୍ୟ ମହୋତ୍ସବ। ଚଳିତବର୍ଷ ଏହି ଉତ୍ସବର ମୁଖ୍ୟ ଆୟୋଜକ ହୋଇଛି ଓଡିଶା ପର୍ଯ୍ୟଟନ। ଏହି ଅବସରରେ 3ଜଣ ବିଶିଷ୍ଟ ବ୍ୟକ୍ତି ପବନ କୁମାର ବର୍ମା,ରାଜେନ୍ଦ୍ର କିଶୋର ପଣ୍ଡା ଓ ପାରୋ ଆନନ୍ଦଙ୍କୁ ସମ୍ମାନଜନକ କଳିଙ୍ଗ ସାହିତ୍ୟ ପୁରସ୍କାରରେ ସମ୍ମାନିତ କରାଯିବ ।
ଏହି ମହୋତ୍ସବରେ ଦେଶ ବିଦେଶରୁ 250ରୁ ଉର୍ଦ୍ଧ୍ବ ଲେଖକ କବି, ଗୀତିକାର, ସାମ୍ବାଦିକ ଓ ବୁଦ୍ଧିଜୀବୀ ଭାଗନେବେ । ଚଳିତ ବର୍ଷ ସାହିତ୍ୟ ଉତ୍ସବର ଥିମ 'ଗାନ୍ଧୀଙ୍କ ଦୃଷ୍ଟିରେ ଭାରତ' ଉପରେ ଆଲୋଚନା କରାଯିବ। ଏହା ସହିତ ବିଭିନ୍ନ ଲେଖକ ଓ କବିଙ୍କ ପୁସ୍ତକ ଉନ୍ମୋଚନ ହେବା ସହିତ ସ୍ବତନ୍ତ୍ର ଅଧିବେଶନରେ ଏସିଡ ପିଡୀତଙ୍କ ବିଷୟରେ ଆଲୋଚନା କରାଯିବ । ସମୁଦାୟ 40ଟି ଅଧିବେଶନରେ ଅନେକ ବିଶିଷ୍ଟ, ବରିଷ୍ଠ , ଯୁବ ଏବଂ ଶିଶୁଙ୍କୁ ନେଇ କାର୍ଯ୍ୟକ୍ରମ ହେବ ବୋଲି ଜଣାପଡିଛି। ଏହା ସହିତ ଆୟୋଜିତ ହେଉଥିବା ତୃତୀୟ କଳାମହୋତ୍ସଵ ରେ 60 ରୁ ଉର୍ଦ୍ଧ୍ବ ଚିତ୍ରଶିଳ୍ପୀ ଗାନ୍ଧୀ ଓ ବୁଦ୍ଧଙ୍କ ଉପରେ ନିଜର କଳାକୃତିର ପ୍ରଦର୍ଶନ କରିବେ । ଯାହାକି ଓଡ଼ିଆ ସାହିତ୍ୟକୁ ରାଷ୍ଟ୍ରୀୟ ଓ ବିଶ୍ୱସ୍ତରରେ ପରୋବ୍ୟାପ୍ତ କରିବା ପାଇଁ ପ୍ରୟାସ ବୋଲି ପ୍ରତିଷ୍ଠାତା ରଶ୍ମିରଞ୍ଜନ ପରିଡା କହିଛନ୍ତି।
ଆଜି କିଟ କନଭେନ୍ସ ସେଣ୍ଟର ଠାରେ ଆରମ୍ଭ ହେବ କଳିଙ୍ଗ ସାହିତ୍ୟ ମହୋତ୍ସବ । ଯେଉଁଥିରେ ବିଶିଷ୍ଟ ସାହିତ୍ୟିକ ସୁଧୀର ଚନ୍ଦ୍ର ମୁଖ୍ୟ ବକ୍ତାଭାବେ ଯୋଗ ଦେବେ । ଏଥିସହ ଅନ୍ୟତମ ବିଶିଷ୍ଟ ବକ୍ତାଭାବେ ପୂର୍ବତନ କେନ୍ଦ୍ରମନ୍ତ୍ରୀ ଯଶବନ୍ତ ସିହ୍ନା ଓ ପବନ ବର୍ମା ପ୍ରମୁଖ ଯୋଗ ଦେବେ ବୋଲି ରଶ୍ମିରଞ୍ଜନ ପରିଡା କହିଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
